ޕިއާ މަރުވީ
4 އޮކްޓޯބަރ 2013 6:02
އިންޒާރު: މިއީ ހަގީގީ ހާދިސާތަކުގެ މައްޗަށް ބިނާކޮށް ލިޔެފައިވާ ވާހަކައެކެވެ. މިފަރާތްތަކުގެ ނަންތައްވަނީ ބަދަލު ކުރެވިފައެވެ. މިކަންތައްތަކަކީ ފުރާނައަށް ނުރައްކާތެރި ކަންތައް ތަކެވެ. މިކަން ތަޖުރިބާ ނުކުރާށެވެ. މަރުވެދާނެއެވެ
ކިޔުންތެރިންނަށް ތަފާތު ރަހަތަކާއެކު ގެނެސްދެން މިއުޅޭ ސީރީޒް ފަށައިގަންނާނީ ވަރަށް ތަފާތު އަދި ދުނިޔޭގައި މަދުންނަމަވެސް ފެންނަ ނުރައްކާތެރި ސިއްހީ މައްސަލައެއް ދިމާވެފައިވާ 32 އަހަރުގެ މީހެއްގެ ވާހަކައެވެ. އޭނާއަކީ ފްރާންސް މީހެކެވެ. ނަމަކީ ޕިއާއެވެ. ގެނެސް ދޭން މިއުޅެނީ އޭނާ މަރުވި ހާދިސާގެ ވާހަކައެވެ.
ޕިއާއަކީ ކެއުމުގެ ޑިސްއޯޑައެއް ކަމުގައިވާ ޕައިކަ (pica) ސިންޑްރޯމްގެ ބަލިމީހެކެވެ. ކާނާގެ ބާވަތްތައް ފިޔަވައި އެހެން އެއްޗެހި ކެއުމުގެ ޝައުގު ވެރިކަން މިފަދަ ބަލިމީހުގެ ކިބައިގައި ހުރެއެވެ. މިފަދަ މީހުން އެންމެ ކާހިތްވަނީ ވެލި، ކްލޭ، ދަގަނޑު ފައިސާފޮތި، ބިއްލޫރި، ދަގަނޑު ފަދަ އެއްޗިއްސެވެ.
ޕިއާގެ އެންމެ ކާހިތުން ކަނީ ދަގަނޑު ފައިސާއެވެ. ޕިއާގެ މިއާދަ ހުއްޓުވަން އޭނާގެ ބޭބެ ވަރަށް މަސައްކަތް ކުރިއެވެ. ނަމަވެސް ގޭގެ އެކިތަންތަނުގައި އެއްޗެހި ފޮރުވައިގެން އޭނާ ކައި އުޅެއެވެ. ކުއްތާގެ ކަރުގައި އަޅައިފައި އޮންނަ ވާކޮޅުވެސް ކާލައެވެ.
ބަނޑުގައި ރިއްސާތާ ދުވަސް ކޮޅަކަށްފަހު ކެތްނުވާ ހިސާބަށް ދިޔުމުން ޑޮކްޓަރަށް ދައްކައިފިއެވެ. ޑޮކްޓަރު އެކްސްރޭ ނެނގިއެވެ. އެކްސްރޭއަށް ބަލާލިއެވެ. ޑރ. ގެ ދެލޯ ބޮޑުވެގެން ދިޔައެވެ. އަނގަ ތަންމިނަށް ހުޅުވިގެން ދިޔައެވެ. އެކްސްރޭއިން ފެންނަން ހުރީ ޑރ. ގެ މުޅި ހަޔާތުގައިވެސް އޭގެ ކުރިން ނުފެންނަ މަންޒަރެކެވެ.
ފެންނަން ހުރީ ބެދިފައިވާ ހަޖަމް ކުރުމުގެ ނިޒާމެވެ. ބަނޑު ތެރޭގައި ހުރި ދަގަނޑުގެ ބާވަތްތަކަކީ ހަޖަމް ކުރެވޭނެ އެއްޗެއް ނޫނެވެ. އަދި އެތަކެތީގެ ސަބަބުން ގޮހުރު ބެދިފައިވެއެވެ. އަދި ގުނަވަންތަކަށް އުފުލާ ނުލެވޭ ވަރުގެ ބުރައަކަށް އެކަން ވިއެވެ.
މިބަލީގެ އެންމެ ނުރައްކާތެރި ކަމަކީ މާބަނޑު ދުވަސްވަރު މިކަން ދިމާވުމެވެ. މާބަނޑު ވުމުން ބައެއް މީހުން ތަފާތު އެއްޗެހި ކާހިތްވެއެވެ.
އެންމެ ފަހުން ޑޮކްޓަރުން އިމަޖެންސީކޮށް ޕިއާ އޮޕަރޭޝަން ކުރިއެވެ. ނަމަވެސް އޭރުވަނީ މާބޮޑަށް ލަސްވެފައެވެ. އޭނާ ކައިފައިވާ މޮހޮރެއްގެ ސަބަބުން ނާރެއް ފެޅުނެވެ. ބަނޑުތެރެއަށް ހޯސްލާފައި ލޭއެޅުނެވެ. ޑޮކްޓަރުން ނިންމީ އޭނާގެ ބަނޑުތެރެ ސާފު ކުރާށެވެ. އަދި މަރާމާތު ކުރުމަށެވެ. ނޫނީ އާޓީފިޝަލް ބަނޑެއް ލެއްވުމަށެވެ. ނަމަވެސް ޑޮކްޓަރުންނަށް އެވަރަށް ވަގުތު ނުލިބުނެވެ. އިސާ ހިތަކު ޕިއާ މިދުނިޔެ ދޫކޮށްލައިފިއެވެ.. މަރުވީއެވެ.
މިކަހަލަ ނުރަނގަޅު އާދަތަކުން އިބްރަތް ލިބިގަންނާށެވެ. އަދި ދިރިއުޅުން އާބާދު ކުރާށެވެ. ހަރުލާފައި ހުންނަ ނޭދެވޭ އާދަކާދަ (ދުންފަތުން އިސްތިއުމާލު ކުރުން، ފިޒީ ޑްރިންކްސް، އެނަޖީ ޑްރިންކްސް ބޭނުން ކުރުން، މާ ގިނައިން ތެޔޮ އެއްޗެހި ކެއުން..) ތަކަކީ އިސްލާހު ކުރަން ޖެހޭ ކަންކަމެވެ. ބަލިޖެހުމުގެ ކުރިން ބަލިން ރައްކާތެރި ވުމަށް މަސައްކަތް ކުރާށެވެ. ރައްކާވެ ތިބިއްޔާ ދަތުރެވެ... ނިމުނީ
ކިޔުންތެރިންގެ ހިޔާލު