އައްޑޫގައި ފުޓުސަލް މުބާރާތެއް ބާއްވަނީ
10 ޑިސެމްބަރ 2015 2:58
އައްޑޫސިޓީ އަންހެނުންނަށް ޚާއްސަކޮށްގެން ބާއްވާ ފުޓުސަލް މުބާރާތެއް ޖެނުއަރީމަހު އޮންނެއެވެ.
މިއީ އައްޑޫ ސިޓީ ހިތަދޫގެ ޖަމިއްޔާއެއް ކަމަށްވާ މެދުވަލު ސިޓީ ޔުނައިޓެޑް (އެމްސީޔޫ) އިން އިންތިޒާމް ކޮށްގެން ބާއްވާ މުބާރާތެކެވެ. "އެމްސީޔޫ ވިމެންސް ވަންޑޭ ކަޕް 2016 އައްޑޫ ސިޓީ" ގެ ނަމުގައި ބާއްވާ މި މުބާރާތުގައި ބައިވެރިވެވޭނީ އައްޑޫ ކޮންމެ ރަށަކުން ޓީމަކަށެވެ.
ޓީމް ބައިވެރި ކުރެވޭނީ ޖަމިއްޔާއެއްގެ ފަރާތުންނެވެ. މި މުބާރާތުގައި ބައިވެރިކުރާނީ އެންމެ ހަރަކާތްތެރި ޖަމިއްޔާތަކުގެ ޓީމްތަކެވެ.
އަންނަ އަހަރުގެ ޖެނުއަރީމަހު އޭގާރަ ވަނަ ދުވަހު ފަށާ މިމުބާރާތުގައި ބައިވެރިވުމުގެ ފުރުސަތު މިހާރުވަނީ ހުޅުވާލައިފައެވެ. މުބާރާތުގައި ބައިވެރި ވުމުގެ މުއްދަތު ހަމަވާނީ ޑިސެންބަރު މަހުގެ ތިރީސްވަނަ ދުވަހުގެ ނިޔަލަށެވެ. އެމްސީ ޔުނައިޓެޑުން ބުނީ މުބާރާތުގެ ޤަވާއިދާއި، ޓީމް ލިސްޓް ޖެނުއަރީ 4 ވަނަ ދުވަހު ޓީމްތަކާ ހަވާލު ކުރާނެ ކަމަށެވެ.
އެމްސީޔޫ އިންވަނީ ވަރަށް ފޯރިގަދަ ފުޓުސަލް މުބާރާތެއް މިއަހަރު ބާއްވައިފިއެވެ. އެއީ އައްޑޫ ސްކޫލްތަކަށް ހުޅުވާލައިގެން ބޭއްވި މުބާރާތެކެވެ.
އައްޑޫސިޓީއަކީ ފުޓުސަލް ފޯރި ގަދަވަމުން އަންނަ އަތޮޅެކެވެ. އެ އަތޮޅުގައި ވަރަށް މޮޅަށް ފުޓުސަލް ކުޅޭ އަންހެން ކުޅުންތެރިން އުޅެއެވެ. މިފަދަ މުބާރާތްތަކަށް އެދި އެދި ތިބި އެތައް ބަޔަކު އައްޑޫގައި އެބައުޅެއެވެ.
ކިޔުންތެރިންގެ ހިޔާލު