ބައިނަލް އަޤުވާމީ ޔޮޓްރޭހެއްގައި ފުރަތަމަ ފަހަރަށް ރާއްޖެއިން ބައިވެރިވަނީ

އަންނަ އޮގަސްޓްމަހުގެ 1 އިން 8 އަށް ރިޔޫނިއަންގައި ބާއްވާ އިންޑިއަން އޯޝަން އައިލެންޑް ގޭމްސްގައި ހިމެނޭ ޔޮޓް ރޭހުގެ ބައިގައި ރާއްޖެއިން ބައިވެރިވާނެ ކަމަށް މޯލްޑިވްސް ސެއިލިން އެސޯސިއޭޝަނުން ބުނެފިއެވެ. މިއީ މިފަދަ މުބާރާތެއްގައި ރާއްޖެއިން ބައިވެރިވާ ފުރަތަމަ ފަހަރެވެ.

މޯލްޑިވްސް ސެއިލިން އެސޯސިއޭޝަނުން ނެރެފައިވާ ނޫސްބަޔާނެއްގައި ބުނެފައިވަނީ މިމުބާރާތުގައި ރާއްޖެއިން ވާދަކުރާ ޓީމުގައި ހިމެނެނީ 4 ފިރިހެނުންނާއި، 2 އަންހެނުން ކަމަށެވެ. މޯލްޑިވްސް ސެއިލިން އެސޯސިއޭޝަނުގެ ރައީސް ޙުސައިން އާމިލް ވިދާޅުވެފައިވަނީ މިއީ ދިވެހިޓީމުގެ ފެންވަރު ޓެސްޓްކޮށްލުމަށް ލިބިގެންދިޔަ ވަރަށް ރަނގަޅު ފުރުސަތެއް ކަމަށެވެ. އޭނާ ވިދާޅުވެފައިވަނީ ރާއްޖޭގެ ޓީމާމެދު ވަރަށް ބޮޑު އުންމީދެއް އެބައޮތް ކަމަށެވެ. މިމުބާރާތުން ރަނގަޅު ނަތީޖާއެއް ލިބިދާނެ ކަމުގެ އުންމީދުވެސް ވަރަށް ބޮޑު ކަމަށް ވިދާޅުވެފައިވެއެވެ. ރާއްޖޭގެ ޓީމް ރިޔޫނިއަން އަށް ދިޔުމުގެ ކުރިން ސީޝެލްގައި އެއްމަހުގެ ތަމްރީންތަކެއް ހެދުމަށްވަނީ ހަމަޖެހިފައެވެ.

މޯލްޑިވްސް ސެއިލިން އެސޯސިއޭޝަނުން ބުނެފައިވަނީ މިމުބާރާތުގެ ސަބަބުން ޒުވާނުންގެ ތެރެއިން ގިނަބަޔަކު މިކުޅިވަރަށް ޝައުގުވެރިވެ މީގެ ތެރެއަށް ވަންނާނެ ޒުވާނުން އިތުރުވެގެންދާނެ ކަމަށް ވަރަށް ބޮޑަށް އުންމީދު ކުރާ ކަމަށެވެ. ރާއްޖެއަކީ 99 އިންސައްތަ ކަނޑު އޮންނަ ޤައުމަކަށްވާތީ މިފަދަ ކުޅިވަރަކީ ރާއްޖެއަށް ވަރަށް މުހިންމު ކުޅިވަރަކަށް ވާނެ ކަމަށްވެސް އެ އެސޯސިއޭޝަނުން ބުނެފައިވެއެވެ.

ފަހަކަށް އައިސް މިފަދަ ރޭސްތައް ރިސޯޓުތަކުގައި ދަނީ ބާއްވަމުންނެވެ. ރާއްޖޭގައި މޫދުކުޅިވަރު ތަރައްގީ ކުރުމަށް ސެއިލިން އެސޯސިއޭޝަނެއް ރަޖިސްޓްރީކޮށްފައިވަނީ 2002 ވަނަ އަހަރުއެވެ.