މާޒިޔާ އާއި ޕީޑީއާރުއެމް ޕީޕަލްސް ކަޕް ފައިނަލުން ޖާގަ ހޯދައިފި

މާލޭގައި މިހާރު ކުރިއަށްދާ ޕީޕަލްސް އޮފް މޯލްޑިވްސް އިންވިޓޭޝަނަލް ކަޕް (ޕީޕަލްސް ކަޕް) ގެ ފައިނަލުން ރާއްޖޭގެ މާޒިޔާ ސްޕޯޓްސް އެންޑް ރެކްރިއޭޝަން ކްލަބާއި މެލޭޝިޔާގެ ޕީޑީއާރުއެމް ޖާގަ ހޯދައިފިއެވެ.

ފައިނަލުން މާޒިޔާ ޖާގަ ހޯދީ އިއްޔެ ހަވީރު ނިއުރޭޑިއަންޓާ 0-0 އިން އެއްވަރުކޮށް 5 ޕޮއިންޓް ހޯދައިގެންނެވެ. ރާއްޖޭ ގައުމީ ޓީމުގެ ކެޕްޓަން އަލީ އަޝްފާޤް (ދަގަނޑޭ) ކުޅެމުން އަންނަ ޕީޑީއާރުއެމް ފައިނަލުން ޖާގަ ހޯދީ ސިންގަޕޫރުގެ ލަޔަންސްގެ މައްޗަށް 1-0 އިން ރޭ ކުރި ހޯދައި 7 ޕޮއިންޓާއެކުއެވެ. މެޗުގެ ހަމައެކަނި ލަނޑު ދެވަނަ ހާފުގައި ކާމިޔާބު ކޮށްދިނީ މާލީގެ ތަޖުރިބާކާރު ފޯވާޑް ޓްރައޮރޭއެވެ.

މިއީ ދަގަނޑޭއަށް ލަޔަންސްގެ ކެޕްޓަން ކުރި ފައުލަކާ ގުޅިގެން ލިބުނު ޕެނަލްޓީއަކުން ކާމިޔާބު ކުރިއެވެ. މިޕެނަލްޓީ ދަގަނޑޭ ޖެހުމަށް ސަޕޯޓަރުން ވަނީ ގޮވައިފައެވެ. މިމެޗުގައި ލަނޑެއް ނުޖެހުނު ނަމަވެސް ދަގަނޑޭ ވަނީ ލަނޑު ޖަހާނެ ދެތިން ފުރުސަތު ހޯދައި ނުރައްކާތެރި ތިން ހަމަލާއެއް ލަޔަންސްގެ ގޯލަށް އަމާޒުކޮށް ފޮނުވާލާފައެވެ.ހަތަރު ޓީމު ވާދަކުރި މިމުބާރާތް ކުރިއަށް ގެންގޮސްފައިވަނީ ކޮންމެ ޓީމެއް ކޮންމެ ޓީމަކާ ބައްދަލުކޮށް އެންމެ ގިނަ ޕޮއިންޓް ލިބޭ ދެޓީމް ފައިނަލަށްދާ ގޮތަށެވެ. ލީގް އުސޫލުން ކުޅުނު ބުރުގައި ޕީޑީއާރުއެމް އާއި މާޒިޔާ ބައްދަލު ކުރި މެޗް ނިމުނީ 2-2 އިން އެއްވަރު ވެގެންނެވެ.

ފައިނަލް މެޗް ކުޅުމަށް ހަމަޖެހިފައި ވަނީ މާދަމާ ރޭ 21:00 ގައެވެ.