ލަޔަންސް އަތުން ބަލިވެ ފައިނަލުން ޖާގަ ހޯދުމުގެ އަމިއްލަ ބާރު ނިއުއަށް ގެއްލިއްޖެ

މާލޭގައި މިހާރު ކުރިއަށްދާ ޕީޕަލްސް އޮފް މޯލްޑިވްސް އިންވިޓޭޝަނަލް ކަޕް (ޕީޕަސް ކަޕް) ގައި މިއަދު ހަވީރު ސިންގަޕޫރުގެ 23 އަހަރުން ދަށުގެ ގައުމީ ޓީމް (ލަޔަންސް) އަތުން 1-3 އިން ބަލިވެ މުބާރާތުގެ ފައިނަލުން ޖާގަ ހޯދުމުގެ އަމިއްލަ ބާރު ނިއުރޭޑިއަންޓަށް ގެއްލިއްޖެއެވެ.

ދެރަތްކާޑާއި 10 ރީނދޫކާޑް ފެނިގެންދިޔަ މިމެޗުގައި ނިއުގެ ތަޖުރިބާކާރު ކުޅުންތެރިން ކޮޅަށް ލަޔަންސުން ފުރަތަމަ ލަނޑު ޖަހައި ލީޑް ނެގީ 4 ވަނަ މިނެޓުގައެވެ. މިލަނޑު ކާމިޔާބު ކޮށްދިނީ މުހައްމަދު ފިރްދައުސްއެވެ. މިލަނޑު ފިރްދައުސް ކާމިޔާބު ކުރީ ނިއުގެ އޭރިޔާގެ ބޭރުން ފޮނުވާލި ހިތްގައިމު ހަމަލާއަކުންނެވެ.

ދެވަނަ ހާފް ފަށައިގެން ނިއުއަށް ހަމަޖެހި ނުލެވި އުޅެނިކޮށް 48 ވަނަ މިނެޓުގައި ލަޔަންސްއިން ލީޑް ފުޅާކުރީ މެޗުގައި މޮޅު ކުޅުމެއް ދެއްކި ޑިފެންޑަރު މުހައްމަދު މޮހަނާއެވެ. ފުރަތަމަ މެޗުގައި މާޒިޔާ ކޮޅަށް ބޮލުން ލަނޑު ޖެހި މޮހަނާ މިމެޗުގައި ނިއުކޮޅަށްވެސް ލަނޑު ޖެހީ ބޮލުންނެވެ.

ލަޔަންސްއިން ދެލަނޑުގެ ލީޑެއް ނެގުމާއެކު ނިއުގެ ކުޅުންތެރިން ލަނޑެއް ޖެހުމަށް އަވަސްވެގަތެވެ. އެހެންނަމަވެސް ލަޔަންސް ކުޅުންތެރިން ވަގުތު ބޭކާރު ކުރުމަށް މަސައްކަތް ކުރަމުންދިޔުމާއި ފައުލްތައް ކުރަން ފެށުމުން ނިއުގެ ކުޅުންތެރިންގެ ފަރާތުންވެސް ގިނަ ފައުލްތަކެއް ފެނިގެންދިޔައެވެ.

ނަތީޖާ ހަމަހަމަ ކުރުމަށް ނިއުއިން ކުރަމުންދިޔަ މަސައްކަތްތަކަށް ބޮޑު ހުރަހެއް ކުރިމަތިވީ 58 ވަނަ މިނެޓުގައި ފޯވާޑް މުހައްމާ ހައިރުލް ކާމިޔާބު ކުރި ރީތި ލަނޑުންނެވެ. މުހައްމާ މިލަނޑު ޖެހީ ލަޔަންސްއިން އުފެއްދި ކައުންޓަ އެޓޭކެއްގައި ނިއުގެ ކީޕަރު ސްޕެއިންގެ މަރެންކޯ ކައިރިން ދެފަހަރު ނައްޓާލުމަށްފަހު އޭނާ އޮފް ބެލެންސްކޮށް ވައްޓާލުމަށްފަހުއެވެ. މުހައްމާ ލަނޑު ޖެހިއިރު ހަމަލާ ދިފާއު ކުރުމަށް ނިއުގެ އަހުމަދު ޝާފިއު (ޝާފީ) އާއި އަހުމަދު އަބްދުﷲ (ލިލީ) ހުރީ ގޯލު ލައިން މަތީގައެވެ.

މިލަނޑާއެކު ދެޓީމުގެ ކުޅުން ވަރަށް ބޮޑަށް ފިސިކަލް ވެގެންދިޔައެވެ. ނަތީޖާއަކަށް ވެގެންދިޔައީ 72 ވަނަ މިނެޓުގައި ލަޔަންސްގެ ގުއަކް ޔީ ގެބްރިއެލްއަށް އަދި 77 މިނެޓުގައި ނިއުގެ މުހައްމަދު ރަޝީދު (ހޮކޭ) އަަށް ދެވަނަ ރީނދޫ ކާޑާއެކު ރަތް ކާޑެއް ދެއްކުމެވެ.

ލަޔަންސްގެ ކުޅުންތެރިޔާއަށް ރަތްކާޑް ދެއްކީ ރެފްރީއާ ބޭއަދަބީ ބަހުން މުހާތަބު ކުރުމުންނެވެ. ހޮކޭއަށް ރަތްކާޑް ދެއްކީ ލަޔަންސްގެ ކުޅުންތެރިއެއްގެ ކަރުގައި ގަސްދުގައި ފައިން ޖެހުމުންނެވެ. ހޮކޭ ގަސްދުގައި ލަޔަންސްގެ ކުޅުންތެރިއެއްގައި ޖެހުމުން ލަޔަންސްގެ ކެޕްޓަން ހޮކޭ ކަރުގައި ހިފި މަންޒަރުވެސް ވަނީ ފެނިފައެވެ.

ހޮކޭއަށް ރަތްކާޑް ދެއްކުމުން ނިއުގެ ސަޕޯޓަރަކު ވަނީ ދަނޑަށް އަރާފައެވެ. އަދި ނިއުގެ ސަޕޯޓަރުންތަކެއް ވަނީ ލަޔަންސްގެ ކުޅުންތެރިޔާ ވެއްޓިފައި އޮތް ދިމާއަށް އައިސް ބޭއަދަބީ ބަހުން ލަޔަންސްގެ ކުޅުންތެރިންނާއި ދިމާއަށް އެއްޗެހި ބޭއަދަބީ ހަރަކާތްތައް އަތުން ދައްކާފައެވެ.

މެޗުގައި ނިއުގެ ފަރާރުން ފެނިގެންދިޔަ ހަަމައެކަނި ލަނޑު 85 ވަނަ މިނެޓުގައި ކާމިޔާބު ކޮށްދިނީ ތަޖުރިބާކާރު މިޑްފީލްޑަރު އަހުމަދު ނިޔާޒް (ނިޔާ) އެވެ.

ހަތަރު ޓީމު ވާދަކުރާ މިމުބާރާތުގައި ނިއު ކުޅުނު ފުރަތަމަ މެޗުގައި މެލޭޝިޔާގެ ޕީޑީއާރުއެމް އަތުން ނިއު ބަލިވީ 1-0 އިންނެވެ. ފުރަތަމަ މެޗުގައި ލަޔަންސް ބަލިވީ މާޒިޔާ އަތުން 2-1 އިންނެވެ.

ކޮންމެ ޓީމަކަށްވެސް ބާކީ އެއްމެޗް އޮތްއިރު ތާވަލުގެ ފުލުގައި ނިއު އޮތީ ޕޮއިންޓެއް ނުލިބިއެވެ. އަނެއް ތިން ޓީމް ވަނީ 3 ޕޮއިންޓް ހޯދާފައެވެ.

މިމުބާރާތުގައި މިރޭ ބައްދަލު ކުރާނީ ރާއްޖޭ ގައުމީ ޓީމުގެ ކެޕްޓަން އަލީ އަޝްފާޤް (ދަގަނޑޭ) ކުޅެމުން އަންނަ ޕީޑީއާރުއެމް އާއި މާޒިޔާއެވެ.