މިނިވަން ރަންޔޫބިލްއާ ގުޅުވައިގެން ވަރުގަދަ ފުޓްބޯޅަ މުބާރާތެއް ރައީސް ބާއްވަވަނީ
19 ޖެނުއަރީ 2015 21:20
ގައުމީ ޓިމުތައް ބައިވެރިކޮށް ރާއްޖޭގައި ރާއްޖެއިން ބޭއްވި ފުރަތަމަ މުބާރާތުގައި އިންޑިޔާއާ ދެކޮޅަށް އަލީ އުމަރު ކުޅެނީ
ރާއްޖޭގެ މިނިވަންކަމަށް 50 އަހަރު ފުރުމާ ގުޅުވައިގެން މިއަހަރުގެ ޖުލައި 26 ގެ ފަހުން ގައުމީ ޓީމުތައް ބައިވެރިކޮށް ވަރުގަދަ ފުޓްބޯޅަ މުބާރާތެއް ބޭއްވުމަށް ރައީސުލް ޖުމްހޫރިއްޔާ އަބްދުﷲ ޔާމީން އަބްދުލް ޤައްޔޫމް ނިންމަވައިފިއެވެ.
މިކަން ހާމަކުރީ އަންނަ ބްރާސްފަތި ދުވަހު ފެށުމަށް ހަމަޖެހިފައިވާ "ޕީޕަލްސް އޮފް މޯލްޑިވްސް އިންވިޓޭޝަނަލް ސޮކާ ކަޕް" ނުވަތަ ޕޮމިސް ކަޕުގެ ގުރު ނެގުމުގެ ރަސްމިއްޔާތުގައި ޓޫރިޒަމް މިނިސްޓަރ އަހުމަދު އަދީބެވެ.
"ރާއްޖޭގެ ފަންސާސް ވަނަ މިނިވަންދުވަހާއި ގުޅުވައިގެން، ގައުމީ ޓީމުތައް ބައިވެރިކޮށްގެން ޖުލައި 26 ގެ ފަހުން ރައީސް އިންވިޓޭޝަނަލް ކަޕް ބޭއްވުމަށް ވަނީ ނިންމަވާފައި" ޕޮމިސް ކަޕުގެ ޗެއާމަންކަން ކުރައްވަމުން އަންނަ އަދީބު ވިދާޅުވިއެވެ.
ގައުމީ ޓީމުތައް ބައިވެރިކޮށްގެން ރާއްޖޭގައި ފުޓްބޯޅަ މުބާރާތެއް ސަރުކާރުން ބާއްވާފައި ވަނީ ހަމައެކަނި 2000 ވަނަ އަހަރުއެވެ. އެއީ ރާއްޖޭގެ ފުޓްބޯޅައަށް ފަންސާސް އަހަރު ފުރުމުގެ މުނާސަބަތާއި ގުޅުވައިގެން ބޭއްވި މުބާރާތެކެވެ. ރާއްޖެ ބަލިކޮށް އެމުބާރާތުގެ ޗެމްޕިއަންކަން ހޯދީ އަވަށްޓެރި ސްރީލަންކާއެވެ.
ކިޔުންތެރިންގެ ހިޔާލު