ރިޒްވާނުގެ ހެޓްރިކުން ކުނބުރުދޫ ބަލިކޮށް ދިއްފުށި ފައިނަލަށް

އެފްއޭއެމް ޒޯން ހަތަރެއްގެ ފުޓްބޯޅަ މުބާރާތުގައި މިއަދު ހަވީރު ކެޕްޓަން އަހުމަދު ރިޒްވާނުގެ ހެޓްރިކާއެކު އދ.ކުނބުރުދޫ 3-4 އިން ބަލިކޮށް މާލެ އަތޮޅު ދިއްފުށި ފައިނަލުން ޖާގަ ހޯދައިފިއެވެ.

ރަސްދޫ ދަނޑުގައި ކުޅުނު މިމެޗުގައި ދިއްފުށިން ޖެހި ހަތަރު ލަނޑުގެ ތެރެއިން ތިން ލަނޑު ކާމިޔާބު ކޮށްދިނީ، މެޗުގެ މޮޅު ކުޅުންތެރިޔާގެ މަގާމްވެސް ހޯދި ރިޒްވާނެވެ. އަނެއް ލަނޑަކީ ކުނބުރުދޫ ކުޅުންތެރިން އަތުން ބައިކޮޅަށް ވަން ލަނޑެކެވެ.

ހަތަރު ޓީމު ވާދަކުރި މިމުބާރާތުގައި، މާލެ އަތޮޅުގެ ޗެމްޕިއަން ދިއްފުށި ވަނީ ފުރަތަމަ މެޗުގައި މަންދޫ އަތުން 3-0 އިން މޮޅުވެފައެވެ. އެހެންނަމަވެސް ދެވަނަ މެޗުގައި ރަސްދޫ އަތުން 3-0 އިން ދިއްފުށި ވަނީ ބަލިވެފައެވެ. ދިއްފުށި ފައިނަލުން ޖާގަ ހޯދީ 6 ޕޮއިންޓާއެކުއެވެ.

ފައިނަލް މެޗުގައި އަންނަ ބުރާސްފަތި ދުވަހު ދިއްފުށި ނިކުންނާނީ ރަސްދޫއާ ދެކޮޅަށެވެ.