މިޔަންމާ ކްލަބަކަށް ބަކާ ސޮއި ކޮށްފި

ރާއްޖޭ ގައުމީ ޓީމުގެ އިތުބާރު މިޑްފީލްޑަރު މުހައްމަދު އާރިފް (ބަކާ) އެއްއަހަރުގެ އެއްބަސްވުމެއްގެ ދަށުން މިޔަންމާގެ ފުރަތަމަ ޑިވިޝަނުގެ ކްލަބެއް ކަމުގައިވާ ކަންބައުޒާ އެފްސީ (ކޭބީޒެޑް) އަށް ސޮއި ކޮށްފިއެވެ.

ކޭބީޒެޑަށް ބަކާ ސޮއި ކޮށްފައި މިވަނީ ރާއްޖޭގެ ލީގް ޗެމްޕިއަން ނިއުރޭޑިއަންޓާއި އެފްއޭކަޕުގެ ޗެމްޕިއަން މާޒިޔާއިން ބަކާއާއެކު މަޝްވަރާ ކުރަމުން ދަނިކޮށެވެ.

ކޭބީޒެޑަށް ސޮއި ކުރުމަށްފަހު މޯލްޑިވްސޮކާ.ކޮމްއަށް ދިން ހާއްސަ ބަސްދީގަތުމެއްގައި ބަކާ ބުނީ އެކްލަބަށް ސޮއި ކުރީ ހުށަހެޅުން ރަގަޅު ވުމުންނާއި އޭނާގެ ކުޅުމުގެ ފެންވަރުގެ މަތި ކުރުމުގެ ބޭނުމުގައި ކަަމަށެވެ.

"ކޭބީޒެޑަށް ސޮއި ކުރީ އެކްލަބުން ހުށަހެޅި ހުށަހެޅުން ވަރަށް ރަގަޅުވުން. އަނެއް ސަބަބަކީ އަހަރެންގެ ކުޅުމުގެ ފެންވަރު މަތިކުރުން. " ރާއްޖޭގައި މިހާތަނަށް އުފެދުނު އެންމެ މޮޅެތި މިޑްފީލްޑަރުންގެ ތެރޭގައި ހިމެނޭ ބަކާ ބުންޏެވެ.

މީގެ އިތުރުން ބަކާ ބިދޭސީ ކްލަބުތަކުން ރާއްޖޭގެ ކުޅުންތެރިންނަށް ދޮރުތައް ހުޅުވިފައިވާ ކަމަށެވެ. "މިއީ ބިދޭސީ ކްލަބުތަކުގެ ދޮރުތައް ރާއްޖޭގެ ކުޅުންތެރިންނަށް ހުޅުވިފައިވާ ކަމުގެ ހެއްކެއް. އަހަރެން އެދެނީ ގިނަ ކުޅުންތެރިންތަކެއް ބިދޭސީ ޓީމުތަކާ ގުޅުން" ރާއްޖޭގެ އެންމެ މޮޅު ފުޓްބޯޅަ ކުޅުންތެރިޔާގެ މަގާމް 2010 ވަނަ އަހަރު ހޯދި ބަކާ ބުންޏެވެ.

އައިއެފްސީން ވިދާލުމަށްފަހު ކްލަބު ވެެލެންސިޔާ އާއި އައްޑޫ އެފްސީ އަދި އީގަލްސް އާއި ނިއުރޭޑިއަންޓަށްވެސް ކުޅެފައިވާ ބަކާ ބުނީ ބިދޭސީ ކްލަބަކަށް ބަދަލުވިޔަސް ގައުމީ ޓީމަށް ކުޅެން ލިބޭ ފުރުސަތުތައް ދޫކޮށް ނުލާނެކަމަށެވެ. "ގައުމީ ޓީމަށް ކުޅުމަކީ އަބަދުވެސް ލިބޭ އުފަލެއް" ބަކާ ބުންޏެވެ.

ކޭބީޒެޑް ވަނީ 2012 ވަނަ އަހަރު މިޔަންމާގެ ފުރަތަމަ ޑިވިޝަނުގެ ދެވަނަ މަގާމް ހޯދާފައެވެ. އަދި 2013 ވަނަ އަހަރު މިޔަންމާ ފެޑެރޭޝަން ކަޕް އެކްލަބުން ކާމިޔާބު ކުރިއެވެ. ނިމިގެންދިޔަ 2014 ވަނަ އަހަރު ކޭބީޒެޑް ނިންމާލީ ލީގުގެ 3 ވަނައިގައެވެ.