މާލެ އަތޮޅު ޗެމްޕިއަންކަން ދިއްފުށި ހޯދައިފި

އެފްއޭއެމް ކ.އަތޮޅު ފުޓްބޯޅަ މުބާރާތުގެ ފައިނަލުގައި ޕެނަލްޓީ ޖަހައިގެން ގުރައިދޫ 6-4 އިން ބަލިކޮށް ދިއްފުށި ޗެމްޕިއަންކަން ހޯދައިފިއެވެ.

މެޗުގެ ފުރަތަމަ ލަނޑު، ފުރަތަމަ ހާފުގައި ކާމިޔާބުކޮށް ލީޑް ނެގީ ދިއްފުށިންނެވެ. މިލަނޑަކީ ގުރައިދޫ ކުޅުންތެރިއެއްގެ އަތުން ބައިކޮޅަށްވަން ލަނޑެކެވެ. ދިއްފުށިން ލީޑް ފުޅާކުރީ ދެވަނަ ހާފުގައި ފޯވާޑް މުހައްމަދު ޝަމީމް ކާމިޔާބު ކޮށްދިން ލަނޑުންނެވެ.

ފުރަތަމަ ޑިވިޝަނުގެ ކުރިން ކުޅެފައިވާ ކުޅުންތެރިންތަކެއް ތިބި ގުރައިދޫއިން މެޗުގެ ނަތީޖާ ހަމަހަމަ ކުރީ މެޗުގެ ފަހު ދިހަ މިނެޓުގެ ތެެރޭގައި ދެލަނޑު ކާމިޔާބު ކޮށްގެންނެވެ. ގުރައިދޫއަށް ލަނޑު ޖަހައިދިނީ މުހައްމަދު ރިޝްވާން އާއި އާލިމް އަބްދުލް ޤައްޔޫމެވެ.

ޕެނަލްޓީ ޝޫޓްއައުޓުގައި ދިއްފުށިން ޖެހި އެއްޕެނަލްޓީ އަމާޒުވީ ގޯލުގެ މަތީ ދަނޑިއަށެވެ. ގުރައިދޫއިން ފޮނުވާލި އެއްޕެނަލްޓީ ގޯލާ އަމާޒުނުވެ ބޭރަށްދިޔައިރު އަނެއް ޕެނަލްޓީ އަމާޒުވީ ގޯލުގެ ދަނޑިއަށެވެ.

ދިއްފުށްޓަށް ކ.އަތޮޅުގެ ޗެމްޕިއަންކަން ހޯދައި ދިނުމަށްފަހު ކޯޗް އަބްދުރައްހީމް އަހުމަދު (އަދުރޭ ސަރ) ބުނީ މުބާރާތަށް ކަނޑައެޅި އަމާޒު ހާސިލް ކުރެވުމުން ވަރަށް ބޮޑު އުފަލެއް ލިބިއްޖެކަމަށެވެ. "ކާމިޔާބު މިންވަރު ކުރެއްވިކަމަށްޓަކައި ހެއްދެވި ފަރާތަށް ޝުކުރު ކުރަން. ޒުވާން ކުޅުންތެރިންތަކެއް ގޮވައިގެން ނިކުމެ، މުބާރާތުގެ ޗެމްޕިއަންކަން ހޯދުނީތީ ވަރަށް ބޮޑު އުފަލެއް ލިބިއްޖެ. ކާމިޔާބު ހޯދުމަށްޓަކައިި ކުޅުންތެރިން ކުރި ހިތްވަރަށް ސާބަސް ދެން" ކުރީގެ މަޝްހޫރު އޯކިޑް ސްޕޯޓްސްއަށް ކުޅެފައިވާ އަދުރޭ ސަރ ބުންޏެވެ.

މީގެ އިތުރުން އަދުރޭ ސަރ ބުނީ ޗެމްޕިއަންކަން ލިބުމުގައި ސަޕޯޓަރުންގެ ދައުރު ވަރަށް ބޮޑުކަމަށެވެ. "ބާރަވަނަ ކުޅުންތެރިޔާގެ ދައުރު ސ÷ަޕޯޓަރުން ވަރަށް ފުރިހަމައަށް އަދާކުރި. މެޗް ފެށުނީއްސުރެ ނިމެންދެން ޓީމަށް ދެއްވި ތަރުހީބަށް ހުރިހާ ސަޕޯޓަރުންނަށް ޝުކުރު އަދާކުރަން" އަދުރޭ ސަރ ބުންޏެވެ.

ފައިނަލް މެޗުގެ މޮޅު ކުޅުންތެރިޔާގެ މަގާމު ހޯދީ، އީގަލްސްގެ ޔޫތު ޓީމުން މިއަހަރުގެ ޔޫތު ޗެމްޕިއަންޝިޕުގައި ވިދާލި ދިއްފުށީގެ ކެޕްޓަން އަހުމަދު ރިޒްވާނެވެ.

މިއީ ކ.އަތޮޅުގެ ޗެމްޕިއަންކަން ދިއްފުށި ހޯދި ފުރަތަމަ ފަހަރުކަން ފާހަގަ ކޮށްލެވެއެވެ.