ޗެމްޕިއަންކަން ހޯދޭނެކަމުގެ އުއްމީދު އެބައޮތް – ދިއްފުށީ ކޯޗް
23 ޑިސެމްބަރ 2014 22:40
އެފްއޭއެމް ކ.އަތޮޅު ފުޓްބޯޅަ މުބާރާތުގެ ފައިނަލުގައި މާދަމާ ހަވީރު އަމިއްލަ ރަށުގައި ގުރައިދޫ ބަލިކޮށް ޗެމްޕިއަންކަން ހޯދޭނެކަމުގެ އުއްމިީދު އެބައޮތްކަމަށް ދިއްފުށީ ކޯޗް އަބްދުއްރަހީމް އަހުމަދު (އަދުރޭ ސަރ) ބުނެފިއެވެ.
އަދުރޭ ސަރ ބުނީ ފައިނަލް މެޗަށް ނިކުންނާނީ ގުރައިދޫއަކީ ފުޓްބޯޅައިގައި ބޮޑެތި ތަޖުރިބާތަކެއް ހޯދާފައިވާ ޓީމެއްކަން ދަނެ، އެޓީމަށް އިހްތިރާމް ކޮށްގެންކަމަށެވެ. "ގުރައިދޫއަކީ ފުޓްބޯޅައިގެ ތަޖުރިބާހުރި ޓީމެއްކަން ދަނެގެން ފައިނަލް މެޗަށް އަހަރެމެން ނިކުންނާނީ. މިއީ ދިއްފުއްޓަށް ވަރަށް މުހިއްމު މުބާރާތެއް. ހުރިހާ ކުޅުންތެރިން ތިބީ ޗެމްޕިއަންކަން ހޯދުމުގެ އަޒުމުގައި. އަދި ރަށުގެ ހުރިހާ ރައްޔިތުން ތިބީ ޗެމްޕިއަންކަން ހޯދުމުގެ އުއްމީދުގައި. ރަށާއި ދުރުގައި ތިބި އެތައްބަޔަކު ވަނީ ޓީމަށް ތަރުހީބު ދިނުމަށްޓަކައި ރަަށަށް އައިސްފައި. މިއީ ފައިނަލް މެޗް ކާމިޔާބު ކުރުމަށް ލިބޭ ވަރަށް ބޮޑު ހިތްވަރެއް" އަދުރޭ ސަރ ބުންޏެވެ.
އަދުރޭ ސަރ ބުނީ އަނިޔާގެ ސީރިއަސް މައްސަަލަތަކެއް ނޫޅޭކަމަށާއި ޓީމު އޮތީ ފައިނަލް މެޗަށް ފުރިހަމައަށް ތައްޔާރުވެފައި ކަމަށެވެ. "ކުދިކުދި އަނިޔާތައް އެބައުޅޭ. އެކަމަކު ފައިނަލް މެޗުގައި ނުކުޅެވޭހައި ސީރިއަސް އަނިޔާގައި ހުރި ކުޅުންތެރިޔަކު ނެތް" އަދުރޭ ސަރ ބުންޏެވެ.
މީގެ އިތުރުން އަދުރޭ ސަރ ބުނީ، އަތޮޅު ފުޓްބޯޅަ މުބާރާތް ދިއްފުށީގައި ބޭއްވުމަށްޓަކައި ރަށުގެ ހުރިހާ ރައްޔިތުންނާއި ރަށުގެ ހުރިހާ މުއައްސަސާތަކުން ދެއްވަމުން ގެންދަވާ އެއްބާރުލުމަށް ޝުކުރު އަދާކުރާކަމަށެވެ. "ރަށު ލޯބީގައި އަދި އެކުވެރިކަމުގެ ރޫހުގައި ރައްޔިތުން ވެދެއްވަމުން ގެންދަވާ އެހީތެރިކަމަށް ހިފެހެއްޓުމެއްނެތި ޝުކުރު އަދާކުރަން" މީގެ ދުވަސްތަކެއް ކުރިން ފެށިގެން ދިއްފުށީ ފުޓްބޯޅަ ޓީމަށް އިރުޝާދު ދެމުން އަންނަ ކޯޗް އަދުރޭ ސަރ ބުންޏެވެ.
ކ.އަތޮޅުގެ ފުޓްބޯޅަ މުބާރާތުގެ ޗެމްޕިއަންކަން ދިއްފުށްޓަށް މިހާތަނަށް ހޯދިފައި ނެތްނަމަވެސް ދިއްފުށި ވަނީ 2001 ވަނަ އަހަރު ތިންވަނަ ޑިވިޝަނުގެ ފުޓްބޯޅަ މުބާރާތުގެ ފައިނަލުގައި ކުޅެފައެވެ. އަދި ދެވަނަ ޑިވިިޝަނުގައި ދިއްފުށި ވާދަކޮށްފައިވާކަންވެސް ފާހަގަ ކޮށްލެވެއެވެ.
ފައިނަލް މެޗާއި ގުޅޭ ގޮތުން ގުރައިދޫގެ ބަހެއް ހޯދުމަށް ކުރި މަސައްކަތް ވަނީ ކާމިޔާބުވާގޮތް ނުވެފައެވެ. ގުރައިދޫއަކީ ކުރިން ރާއްޖޭގެ ފުރަތަމަ ޑިވިޝަނުގައި ވާދަކޮށް ރަގަޅު ނަތީޖާތަކެއް ނެރެފައިވާ ޓީމެކެވެ.
ކ.އަތޮޅު ފުޓްބޯޅަ މުބާރާތުގައި މިއަހަރު ބައިވެރިވެފައިވަނީ ދިއްފުއްޓާއި ގުރައިދޫ އެކަންޏެވެ.
ކިޔުންތެރިންގެ ހިޔާލު