ކުރިއަށް އޮތް ސީޒަނުގައި ވެލެންސިޔާއިން ފެނިދާނެ – ޓޫކިލޯ
22 ޑިސެމްބަރ 2014 17:39
ކުރިއަށް އޮތް ސީޒަނުގައި ކްލަބު ވެލެންސިޔާއިން ފެނިދާނެކަމަށް ގައުމީ ޓީމުގެ ކުރީގެ އިތުބާރު ވިންގަރ މުހުތާރު ނަސީރު (ޓޫކިލޯ) ބުނެފިއެވެ.
"ކުރިއަށް އޮތް ސީޒަނުގައި ކުޅޭނެ ވަކި ކްލަބެއް އަދި ނުނިންމަން. ވެލެންސިޔާ އާއި ބީޖީން ދަނީ އަހަންނާއެކު މަޝްވަރާ ކުރަމުން. ވެލެންސިޔާއިން ބުނެފައި އޮތީ ކުރިއަށް އޮތް ސީޒަނުގައި ކްލަބު ރަގަޅުވާނެކަމަށް. ކުރިއަށް އޮތް ސީޒަނުގައި ވެލެންސިޔާއިން ފެނުން އެކަށީގެންވޭ" ފުޓްބޯޅަ ކެރިޔަރުގެ ރަން ދުވަސްތައް ވެލެންސިޔާގައި ހޭދަކޮށް ރާއްޖޭގެ އެންމެ މޮޅު ފުޓްބޯޅަ ކުޅުންތެރިޔާގެ މަގާމް 2008 ވަނަ އަހަރު ހޯދި ޓޫކިލޯ ބުންޏެވެ.
ޒޯން ފުޓްބޯޅަ މުބާރާތުގައި އއ.ރަސްދޫ ޓީމުން ވިދާލި ޓޫކިލޯ ފުރަތަމަ ޑިވިޝަނުގައި ކުޅެން ފެށީ ވެލެންސިޔާއިންނެވެ. އެއަށްފަހު އޭނާ ވަނީ ވިކްޓަރީ އާއި ނިއުރޭޑިއަންޓް އަދި އީގަލްސްއަށް ކުޅެފައެވެ.
2008 ވަނަ އަހަރުގެ ސާފް ޗެމްޕިއަންޝިޕުގެ ފައިނަލުގައި އިންޑިޔާ އަތުން 1-0 އިން މޮޅުވެ ސާފް ޗެމްޕިއަންޝިޕުގެ ތަށި ރާއްޖެއިން އުފުލާލީ ޓޫކިލޯ ޖަހައިދިން ހަމައެކަނި ލަނޑުންނެވެ.
ކިޔުންތެރިންގެ ހިޔާލު