ކެރަމް އަމްޕަޔަރު އިބްރާހީމް ލިފާަައު އެއްއަހަރަށް ސަސްޕެންޑް ކޮށްފި

ރާއްޖޭގައި ބޭއްވި ކެރަމް ވޯލްޑް ކަޕްގައި އަންޕަޔަރެއްގެ މަގާމް އަދާކުރި އިބްރާހީމް ލިފާއު އާމިރަށް، ކެރަމް އެސޯސިއޭޝަނުން ހިންގާ އެއްވެސް ހަރަކާތެއްގައި ބައިވެރި ނުވެވޭގޮތަށް އެއް އަހަރު ދުވަހަށް ސަސްޕެންޑު ކޮށްފި ކަމަށް ކެރަމް އެސޯސިއޭޝަނުން ހާމަކޮށްފިއެވެ.

އެނގިފައިވާ ގޮތުގައި އޭނާ ސަސްޕެންޑްކުރީ ވޯލްޑް ކަޕްގެ އަންޕަޔަރުން ސޮއިކުރި ކޯޑް އޮފް ކޮންޑަކްޓްސްއާ އޭނާ ޚިލާފުވެފައިވާތީ ކަމަށެވެ. އެއާ ޚިލާފުވާން އޭނާ ކޮށްފައިވާ ކަމަކީ މިފަހަރުގެ ކެރަމް ވޯލްޑް ކަޕް ނިމިގެން މާލެއައުމަށް އައި މަގުމަތީގައި ސަން އައިލެންޑްގެ ޖެޓީ މަތީގައިހުރެ ކެރަމް އެސޯސިއޭޝަންގެ ސެކްރެޓެރީ ޖެނެރަލް އަމީން ފައިސަލާ ހަޑި ހުތުރު ބަހުން ވާހަކަ ދެއްކުމެވެ.

"ކޯޑް އޮފް ކޮންޑަކްޓްސްގެ 5.1 ވަނަ މާއްދާގައި ބުނެފައިވަނީ ކުޅުންތެރިޔަކު އެ ކޯޑާ ޚިލާފު ވެއްޖެ ހާލަތެއްގައި ޖޫރިމާނާ ކުރުމުގެ އިޚުތިޔާރު ކެރަމް އެސޯސިއެޝަނަށް ދީފައިވާ ކަމަށެވެ. ނަމަވެސް އެމާއްދާގެ ދަށުން އޭނާއަށް ދީފައިވާ އަދަބަކީ އެއްއަހަރަށް ސަސްޕެންޑް ކުރުމެވެ. މިއީ ކުރެވިގެންވާނެ ކަމެއް ނޫން ކަމަށް ކެރަމްގެ އިސްބޭފުޅަކު ވަނީ ވިދާޅުވެފައެވެ.

އޭނާ ވިދާޅުވ ގޮތުގައި އެނިންމުން ގޯސްވާ ސަބަބަކީ "ޑިސިޕްލިނަރީ ކޮމިޓީން ފިޔަވަޅު އަޅާފައިވަނީ ކޯޑް އޮފް ކޮންޑަކްޓްގެ 5.1 ވަނަ މާއްދާގެ ދަށުން ކަމުގައި މައްސަލަ ނިންމިގޮތުގެ ލިޔުމުގައި ވާއިރު، ކޯޑް އޮފް ކޮންޑަކްޓްގެ އެ މާއްދާގައި އޮންނަނީ ސަސްޕެންޑްކުރުމެއް ނޫން. ކޯޑް އޮފް ކޮންޑަކްޓްގެ 5.1 ގައި އޮތީ "ޖޫރިމަނާ ކުރުން" އޭނާ ވިދާޅުވިއެވެ.

ކޯޑް އޮފް ކޮންޑަކްޓްގެ 5.2 ވަނަ މާއްދާގައި "ވަކި މުއްދަތަކަށް ލޯކަލް މުބާރާތްތަކުން ސަސްޕެންޑް ކުރުން"، 5.3 ވަނަ މާއްދާގައި "ވަކި މުއްދަތަކަށް އިންޓަރނޭޝަނަލް މުބާރާތްތަކުން ސަސްޕެންޑް ކުރުން"، 5.4 ވަނަ މާއްދާގައި " ދާއިމީކޮށް ކެރަމް އެސޯސިއޭޝަނުން ރާވާ ހިންގާ އެކްޓިވިޓީސް ތަކުން ސަސްޕެންޑް ކުރުން" އަދި 5.5 ވަނަ މާއްދާގައި ބުނެފައިވާ " ކެރަމް އެސޯސިއޭޝަނަށް ފެންނަ މި ނޫންވެސް އެހެން އަދަބެއް ކަނޑައެޅުމުގެ އިޚުތިޔާރު ލިބިގެންވޭ."

މިހެން އޮތް ނަމަވެސް ލިފާއު އާ ދޭތެރޭގައި އެޅި ފިޔަވަޅުގައި ސަސްޕެންޝަންގެ އެއްވެސް މާއްދާއަކަށް ރިއާޔަތް ކޮށްފައެއް ނުވެއެވެ. ރިއާޔަތްކޮށްފައިވާ މާއްދާގައި އޮންނަނީ "ޖޫރިމަނާކުރުން" މިހެންނެވެ.

ހަމަ މިފަދަ އެހެން މައްސަލައެއްގައި އެހެން ކުޅުންތެރިއަކު ވަނީ 500 ރުފިޔާއިން ޖޫރިމަނާކޮށްފައެވެ. އެއީ ކެރަމްއެސޯސިއޭޝަންފެ ރައީސް އަހުމަދު މުބީންއާ ހަޑިހުތުރު ބަހުން މުޚާތަބު ކުރި މީހަކާމެދު އެޅި ފިޔަވަޅު ކަމަށް އެނގިފައިވެއެވެ.

މިކާމާ ގުޅޭގޮތުން ކެރަމް އެސޯސިއޭޝަންގެ ރައީސް އަޙްމަދު މުބީން ވިދާޅުވެފައިވަނީ އެ އެސޯސިއޭޝަނުން ލިފާއުއަށް ދިން ލިޔުމުގައި ވަނީ ޓައިޕިންގް އެރަރއެއް ކަމަށާއި، އޭނާ ސަސްޕެންޑް ކޮށްފައި ވަނީ ކޯޑް އޮފް ކޮންޑަކްޓްސްގެ 5 ވަނަ މާއްދާގެ ދަށުންކަމަށެވެ.

އޭނާ ސަސްޕެންޑް ކޮށްފައިވަނީ ޖޫރިމަނާ ކުރަން އޮންނަ މާއްދާ އެއްގެ ދަށުން ކަމަށްވުމުން ކެރަމް އެސޯސިއޭޝަންގެ މިނިންމުމާމެދު ޝަކުވާތަކެއް ލިބެމުން އަންނަ ކަމަށް މަޢުލޫމާތު ލިބިފައިވެއެވެ. މިކަމާ ގުޅިގެން ކެރަމް އެސޯސިއޭޝަންގެ ސެކްރެޓަރީ ޖެނެރަލް އަމީން ފައިސަލް އަށް ގުޅުމުން އޭނާ ފޯން ނުނަންގަވާތީ އޭނާގެ ބަހެއް ލިބޭ ގޮތެއް ނުވިއެވެ.