އޭޝިޔާގައި ފުރަތަމަ ފަހަރަށް ބާއްވާ ދުނިޔޭގެ ކެރަމް ބުރާތް ސަންއައިލެންޑުގައި

އޭޝިޔާގައި ފުރަތަމަ ފަހަރަށް ބާއްވާ ވޯލްޑްކަޕް ކެރަމް ބުރާތް ރާއްޖޭގެ ސަންއައިލެންޑު ރިސޯޓުގައި ކަމަށް މޯލްޑިވްސް ކެރަމް އެސޯސިއޭޝަންގެ ރައީސް އަޙުމަދު މުބީން ވިދާޅުވެއްޖެއެވެ.

މިމުބާރާތް ސަން އައިލެންޑުގައި އޮންނާނީ އަންނަ ސެޕްޓެމްބަރު 13 އިން 17 އަށެވެ. މިމުބާރާތުގައި ޖުމްލަ 16 ގައުމަކުން ބައިވެރިވާނެ ކަމަށްވެސް އޭނާ ވިދާޅުވިއެވެ.

އޭގެ ތެރޭގައި އިނގިރޭސި ވިލާތާއި، ކެނެޑާާއި، ފްރާންސާއި، ސްވިޒަރލެންޑާއި، އިޓަލީއާއި، ހޮލެންޑާއި، ޖަޕާނާއި، ސައުތު ކޮރެއާއާއި، މެލޭޝިޔާއާއި، އިންޑިއާ އާއި، ބަންގްލަޑޭޝާއި، ޝްރީ ލަންކާއާއި، ޕާކިސްތާންވެސް ހިމެނެއެވެ.

މިމުބާރާތް ރާއްޖޭގައި ބޭއްވުމަށް ފުރުޞަތު ލިބިފައިވަނީ ސައުތު ކޮރެއާއާ، ވާދަކޮށްގެންނެވެ.

މުބީން ވިދާޅުވީ މުބާރާތަށް ތައްޔާރުވުމުގެ ގޮތުން ތަފާތު މަސައްކަތްތައް އެއެސޯސިއޭޝަނުން ގެންދަވަނީ ކުރައްވަމުން ކަމަށެވެ. އަދި މުބާރާތް ޕްރޮމޯޓު ކުރެއްވުމަށްވެސް ވަރަށް ބޮޑަށް މަސައްކަތް ކުރައްވަމުން ގެންދަވާ ކަމަށް އޭނާ ވިދާޅުވިއެވެ.މިމުބާރާތް ސްޕޮންސަރ ކޮށްފައިވަނީ ސްޓޭޓް ޓްރޭޑިންގ އޮގަނައިޒޭޝަން (އެސްޓީއޯ) އިންނެވެ. މިމުބާރާތުގެ އިތުރަށް ކުރިއަށްއޮތް ތިން އަހަރު ކެރަމް އެސޯސިއޭޝަނުން ބާއްވާ މުބާރާތްތައްވެސް އެސްޓީއޯއިންވަނީ ސްޕޮންސަރ ކުރައްވާފައެވެ.

މިމުބާރާތް އެސްޓީއޯއިން ސްޕޮންސަރ ކުރެއްވި އެއްބަސްވުމުގައި މިއަދުވަނީ ސޮއިކުރައްވާފައެވެ. އެސްޓީއޯގައި މިކަމަށްޓަކައި މިއަދު ބޭއްވި ރަސްމިއްޔާތުގައި މޯލްޑިވްސް ކެރޮމް އެސޯސިއޭޝަންގެ ފަރާތުން ސޮއިކުރެއްވީ އެތަނުގެ ރައީސް އަހްމަދު މުބީނެވެ. އެސްޓީއޯގެ ފަރާތުން ސޮއިކުރެއްވީ އެކުންފުނީގެ މެނޭޖިންގ ޑިރެކްޓަރ އާދަމް އާޒިމެވެ.

މިއެއްބަސްވުމުގައި ސޮއިކުރެއްވުމަށްފަހު އާޒިމް ވިދާޅުވީ މިމުބާރާތުގެ މައި ސްޕޮންސަރަކަށްވުމުގެ ފުރުސަތު ލިބުމަކީ އުފާކުރައްވާ ކަމެއް ކަމަށެވެ. އެސްޓީއީއިން އުންމީދު ކުރަނީ މިފަދަ މުބާރާތްތަކުގައި ބައިވެރިވެ ރާއްޖެއިން ރަނގަޅު ކާމިޔާބީއެއް ހޯދުން ކަމަށެވެ. އެފަދަ ކަންކަމަށް އެސްޓީއޯއިން ހިތްވަރު ދެއްވާ ކަމަަށެވެ. އަދި މިމުބާރާތުން ރާއްޖެއަށް އެއްވަނަ ލިބުމަކީ ކުރައްވާ އުންމީދެއް ކަމަށްވެސް ވިދާޅވިއެވެ.

އާޒިމް ވިދާޅުވީ މުބާރާތް ޕްރޮމޯޓު ކުރެއްވުމަށް އެސްޓީއޯގެ އަމިއްލަ ބްރޭންޑް ކަމަށްވާ "ނޫފަހި" މަރުކާގެ އުފެއްދުންތައް ބޭނުން ކުރައްވާނެ ކަމަށެވެ. މިފަދަ ކަމެއްގައި އަމިއްލަ ބްރޭންޑެއް ބޭނުން ކުރުމަކީވެސް ގައުމަށް ލިބިގެންދާނެ ފަޚުރެއް ކަމަށް ވިދާޅުވިއެވެ.

މިރަސްމިއްޔާތުގައި މުބީން ވިދާޅުވީ މިމުބާރާތަށް މާބޮޑު ޚަރަދެއް ނުދާނެ ކަމަށެވެ،. އަންދާޒާ ކުރައްވާ އަދަދަކީ 5 މިލިއަން ރުފިޔާ ވަރު ކަމަށެވެ. ބޮޑު ޚަރަދެއް ކުރަން ޖެހެނީ ބޭރުން އަންނަ ޓީމުތައް ރިޒޯޓުތަކުގައި ބެއިތިއްބުމަށާއި އެމީހުންގެ ދަތުރުފަތުރަށް ކަމަށެވެ.

 ކެރޮމް ވޯލްޑް ކަޕް މުބާރާތް ބާއްވާފައިވަނީ ފުރަތަމަ ފަހަރަށް އިނގިރޭސިވިލާތުގައެވެ. ދެވަނަ މުބާރާތް ބައްވާފައިވަނީ ފްރާންސްގައެވެ. ތިން ވަނަ މުބާރާތް ބާއްވާފައިވަނީ އެމެރިކާގައެވެ.