ވަރުގަދަ ކުރިމަތި ލުމަކަށްފަހު ޗެލެންޖު ކަޕުގެ ތިންވަނަ ރާއްޖެ ހޯދައިފި

އޭއެފްސީ ޗެލެންޖް ކަޕުގައި ސަރަހައްދުގެ ޗެންޕިއަން އަފްޣާނިސްތާނު އަތުން މޮޅުވެ، މުބާރާތުގެ ތިންވަނަ މަޤާމު ދިވެހިރާއްޖެއިން ހޯދައިފިއެވެ.

ގައުމީ ފުޓުބޯޅަ ސްޓޭޑިއަމްގައި ކުޅުނު މެޗުގެ ފުރިހަމަ ވަގުތު ހަމަވިއިރު، ލަނޑެއް ދެޓީމުންކުރެ ޓީމަކަށް ލަނޑެއް ނުޖެހެއެވެ. އެހެން ކަމުން ކުޅުނު 15 މިނިޓުގެ ދެހާފް ނިމިގެން ދިޔައީ 1-1 ލަނޑުން އެއްވަރުވެގެންނެވެ. އެހެން ކަމުން ނަތީޖާާ ނެރެފައިވަނި ޕެނަލްޓީ ޖަހައިގެންނެވެ. ޕެނަލްޓީ ޖަހައިގެން ރާއްޖެ މޮޅުވީ 8-9 ލަނޑުންނެވެ.

މުޅި މެޗުގައިވެސް އަފްޣާނިސްތާންވަނީ މޮޅަށް ކުޅެ ރާއްޖެއަށް ޕްރެޝަރ ކޮށްފައެވެ. ނަމަވެސް ރާއްޖޭގެ ޑިފެންސް ލައިނުން ވަނީ އަފްޣާނިސްތާނުގެ ފޯވާޑުން ހުއްޓުވުމަށް އަވަދިނެތި އުޅޭށެވެ. އެކަން ދިވެހި ޓީމުން ކާމިޔާބުވެސް ކުރިއެވެ.

މެޗުގައި ދެޓީމަށްވެސް ލަނޑުޖަހާނެ ފުރުސަތު ލިބިވަނީ ބޭކާރުވެފައެވެ. މެޗުގެ ފުރަތަމަ ހާފުގެ އިތުރު ވަގުތު ޙުސައިން ނިޔާޒް (ބޮކުރީ) ނަގައިދިން ހުރަސް އަސަދުﷲ އަބްދުﷲ އަށް ގޯލަށް ފޮނުވާލެވޭ ގޮތެއް ނުވިއެވެ.

 މެޗުގެ 80 ވަނަ މިނެޓްގައި އަޝްފާގު ހުސްކޮށްލާފައި ބޮކުރީ ދިންބޯޅަވަނީ ގޯލާ ސީދާވާ ގޮތެއްނުވެ ބާކާރުވެފައެވެ.

މެޗުގެ ފުރިހަމަ ލަނޑު އަފްޣާނިސްތާނުން ޖެހީ މެޗުގެ 111 ވަނަ މިނިޓުގައެވެ. އެލަނޑު ޖަހައިދިނީ ޙާމިދު ކަރީމީ އެވެ. އެލަނޑު ޖެހިތާ 6 މިނިޓުފަހުން ރާއްޖޭގެެ ޢަލީ ފާސިރު (ސެންޓޭ) މޮޅު ލަނޑެއްޖަހައި ނަތީޖާ ހަމަހަމަ ކުރިއެވެ. މިލަނޑާއެކު މެޗު ނިމިގެންދިޔައިރުވެސް އިތުރު ލަނޑެއް ނުޖެހުމުން ނަތީޖާ ނެރުނީ ޕެނަލްޓީ ޖަހައިގެންނެވެ.

ޕެނަލްޓީ ޖެހިއިރު އަފްޣާނިސްތާނުން ޖެހި 7 ޕެނަލްޓީގެ ތެރެއިން ދެ ޕެނަލްޓީ ރާއްޖޭގެ ގޯލްކީޕަރު އިމްރާން މުޙައްމަދު ދިފާއުކުރިއެވެ. ރާއްޖޭއިން ޕެނަލްޓީ ބޭކާރު ކޮށްލި ރާއްޖެއަށް ލަނޑު ޖަހައިދިން ސެންޓޭއެވެ. އޭނާގެ ޕެނަލްޓީ ދިޔައީ ބޭރަށެވެ.

ރާއްޖެއިން ޕެނަލްޓީތައް ކާމިޔާބު ކުރީ ކެޕްޓަން ޢަލީ އަޝްފާގާއި، އަކްރަމް ޢަބްދުލް ޣަނީ އާއި ރިޟްވާން ވަޙީދާއި، ޝަމްވީލް ގާސިމް (ބޮންޑާ) އާއި ކީޕަރު އިމްރާނާއި، އަސްއަދު ޢަލީ (އަޑުބަރޭ) އާއި އިބްރާހިމް ފަޒީލް (އޮއްޕޮ) އެވެ.

މުބާރާތުގެ ތިންވަނަ ރާއްޖެ ލިބުމުން ބްރޮންޒް މެޑެލް ޙަވާލުކޮށްދެއްވީ އުއްތަމަ ފަނޑިޔާރު އަޙުމަދު ފާއިޒު ހުސައިނެވެ.

މިމުބާރާތުގެ ފައިނަލްމެޗު ކުޅޭނީ މާދަމާރޭ 9.00 ގައި ގައުމީ ސްޓޭޑިއަމްގައެވެ، ބައްދަލު ކުރާނީ ފިލިޕީންސާއި ފަލަސްތީނެވެ.