ރާއްޖެއާ ދެކޮޅަށް ކުޅެން "މެންޓަލީ ފިޓް" – ކެޕްޓަން

އޭއެފްސީ ޗެލެންޖް ކަޕް ސެމީފައިނަލުގައި މިރޭ ދިވެހިރާއްޖެއާ ދެކޮޅަށް ކުޅެން ފިލިޕީންސް ކުޅުންތެރިން "މެންޓަލީ ފިޓް" ކަމަށް ކެޕްޓަން ރޮބް ގިއާ ބުނެފިއެވެ.

"ދިވެހި ސަޕޯޓަރުން އަހަރެމެންނަށް ވަރަށް ރަނގަޅަށް އެނގޭ. އެއީ އަހަރެމެންނަށް އޮތް ބިރެއް. އެކަމަކު ރާއްޖެއާ ދެކޮޅަށް ކުޅުންތެރިން ތިބީ ނަފްސާނީ ގޮތުން ތައްޔާރުވެފައި" ގިއާ ބުންޏެވެ.

މީގެ އިތުރަށް ގިއާ ބުނީ ދިވެހި ސަޕޯޓަރުންގެ ސަބަބުން ފިލިޕީންސް ކުޅުންތެރިން "ޕްރެޝަރަށް" ދާނެކަމަށް ގަބޫލް ނުކުރެވޭކަމަށެވެ. "އަހަރެމެންގެ ތެރޭގައި ނަގާ ކިޔަންތިބި ކުޅުންތެރިންނަކީ ޔޫރަޕުގެ ބޮޑެތި ލީގުތަކުގައި ކުޅެފައި ތިބި ކުޅުންތެރިން. އެހެންކަމުން ދިވެހި ސަޕޯޓަރުންގެ ސަބަބުން އަހަރެމެން ޕްރެޝަރަށް ދާނެކަމަށް ގަބޫލެއް ނުކުރެވޭ" ގިއާ ބުންޏެވެ.

ފިލިޕީންސް ގައުމީ ޓީމުގެ ކޯޗް، އެމެރިކާ ގައުމީ ޓީމުގެ ކުރީގެ ކެޕްޓަން ތޯމަސް ޑޫލޭ ބުނީ ރާއްޖެ ބަލިކުރުމަކީ "މުސްތަހީލް" ކަމެއް ނޫންކަމަށެވެ.

"ގްރޫޕް ސްޓޭޖުގައި މިޔަންމާ އަތުންވެސް 3-2 އިން ރާއްޖެ ބަލިވި. އެހެންވީމާ ރާއްޖެ އަތުން މޮޅު ވުމަކީ ނުވާވަރުގެ ކަމެއް ނޫން" ފިލިޕީންސްގެ ނޫހަކަށް ދީފައިވާ ބަސްދީގަތުމެއްގައި ޑޫލޭ ބުންޏެވެ.

ފިލިޕީންސާއި ރާއްޖެ ވަނީ މީގެ ކުރިން އެއްފަހަރު ބައްދަލު ކޮށްފައެވެ. އެއީ އޭއެފްސީ ޗެލެންޖް ކަޕް ކޮލިފައިންގައި 2009 ވަނަ އަހަރުއެވެ. އެފަހަރު 3-2 އިން މޮޅުވީ ރާއްޖެއެވެ.