މާޒިޔާ ބަލިކޮށް އެފްއޭ ކަޕް ޗެމްޕިއަންކަން ނިއުރޭޑިއަންޓް ހޯދައިފި

ބީފިފްޓީޓޫ އެފްއޭ ކަޕް ފައިނަލުގައި އެންމެފަހުގެ ޗެމްޕިއަން މާޒިޔާ 1-0 އިން ބަލިކޮށް އެފްއޭ ކަޕުގެ ޗެމްޕިއަންކަން ނިއުރޭޑިއަންޓް އެގާރަ ވަނަ ފަހަރަށް ހޯދައިފިއެވެ.

 އެފްއޭކަޕް ދެފަހަރަށް މިލްކް ކޮށްފައިވާ ނިއުރޭޑިއަންޓަށް ރޭ މާޒިޔާ ކޮޅަސް ލަނޑު ޖަހައިދިނީ ފުރަތަމަ ހާފްގެ 23 ވަނަ މިނެޓުގައި މަންސާއެވެ. މަންސާ މިލަނޑު ޖެހީ މިދިޔަ އަހަރު ރާއްޖޭގެ އެންމެ މޮޅު ކުޅުންތެރިޔާގެ މަގާމް ހޯދި މުހައްމަދު އުމައިރު ނަގައިދިން ކޯނަރު ބޮލުން ގޯލުގެ މަތީ ކަނަށް ވައްދާލައިގެންނެވެ.

މެޗުގައި ދެޓީމުގެ ފަރާތުންވެސް އަވަސް އެޓޭކިން ފުޓްބޯޅައެއް ފެނިގެންދިޔައިރު މެޗުގެ އެންމެ ފަހު ވަގުތު ކޮޅުގެ ތެރޭގައި ނިއުގެ ރިލްވާން ވަހީދު (ރިލޭ)އަށް މާޒިޔާގެ ބަލްގޭރިޔާ މިޑްފީލްޑަރު ބްރިސޯފް ހަމަލާދީ އޭނާ ވައްޓާލުމުން ނިއުގެ ސަޕޯޓަރުން ވަނީ ފުޅި އާއި ފައިވާންފަދަ ތަކެތި ދަނޑަށް އުކާފައެވެ. ހަމަނުޖެހުން އިތުރަށް ހޫނުވީ މިއަހަރުގެ މޭމަހު މާޒިޔާ ކުޅުނު މެޗެއްގައި ރެފްރީ އަސްލަމަށް ( ފައިނަލް މެޗުގައިވެސް ރެފްރީއަކަށް ހުރި) ހަމަލާ ދިނުމާ ގުޅިގެން ދަނޑަށް ނުވަދެވޭ ގޮތަށް ތިން އަހަރަށް ސަސްޕެންޑް ކޮށްފައި ހުރި މަޒިޔާގެ ކުރީގެ ނައިބް ރައީސް އަބްދުﷲ މޫސާ ނިއުރޭޑިއަންޓުގެ ސަޕޯޓަރުން ތިބޭ ދިމާއަށް ދިޔުމުންނެވެ. މިހަމަނުޖެހުންތައް ހަމައަކަށް ކުޅުން އަލުން ފެށުނީ ހަތް މިނެޓްފަހުންނެވެ.

މެޗަށްފަހު ވާހަކަ ދައްކަމުން ނިއުރޭޑިއަންޓުގެ ކޯޗް ވެލީޒާ ޕޮޕޯފް ބުނީ ޗެމްޕިއަންކަން ލިބުނީ ކުޅުންތެރިން ދެއްކި ގަދަ ހިތްވަރުގެ ސަބަބުންކަމަށެވެ. "މިއީ ކުޅުންތެރިން ވަރަށް އާދަޔާ ހިލާފް ހިތްވަރެއް ކޮށް ހޯދި ކާމިޔާބެއް. މިމެޗަށް ނިކުތް އިރުވެސް ކުޅުންތެރިން ތިބީ ވަރަށް ވަރުބަލިކޮށް. މެޗުގެ ފަސްދޮޅަސް މިނެޓާ ހިސާބުން ކުޅުންތެރިން ތިބީ އެއްކޮށް ހުސްވެފައި. ކުޅުންތެރިން ކުރި ހިތްވަރަށް އަހަރެން ޝުކުރު އަދާކުރަން" ޕޮޕޯފް ބުންޏެވެ.

މީގެ އިތުރުން ޕޮޕޯފް ބުނީ ތިން ތަށި ކާމިޔާބު ކާމިޔާބު ކުރެވުމުން ހާއްސަ އުފަލެއް ލިބިއްޖެކަމަށެވެ.

"އަހަންނަށް މިކާމިޔާބު ކުރެވުނީ ތިން ތަށި. ޗެރިޓީ ޝީލްޑާއި ދިރާގް ދިވެހި ލީގާއި އެފްއޭ ކަޕް. ތިން ތަށި ކާމިޔާބު ކުރެވުމުން ހާއްސަ އުފަލެއް ލިބިއްޖެ. ހާއްސަކޮށް އެފްއޭކަޕް ފަދަ ޝަރަފްވެރި މުބާރާތެއް ކާމިޔާބު ކުރެވުމުން" ޕޮޕޯފް ބުންޏެވެ.

ޕޮޕޯފް އިތުރަށް ބުނީ މެޗް ހޫނު ވެގެންދިޔައީ ކާޑް ދައްކަން ޖެހޭ ތަންތަނުގައި ރެފްރީ ކާޑް ނުދެއްކުމުގެ ސަބަބުންކަމަށެވެ. "ރެފްރީ ޑިޝިސަން ނުނެގުމުގެ ސަބަބުން މެޗް ހޫނު ވެގެންދިޔައީ" ޕޮޕޯފް ބުންޏެވެ.

ރާއްޖޭގެ އެއްވެސް މުބާރާތެއްގައި މިސީޒަނުގައި ނިއުރޭޑިއަންޓް ބަލިވެފައި ނުވާކަން ފާހަގަ ކޮށްލެވެއެވެ. ނިއުގެ ކެޕްޓަން އަދި ގައުމީ ޓީމުގެ ކީޕަރު އިމްރާން މުހައްމަދު ބުނީ ހުރިހާ މެޗެއް ކާމިޔާބުކޮށް މިސީޒަން ނިންމާލުމަކީ މިހާރު އެކްލަބުގެ އަމާޒުކަމަށެވެ.