ބޮޑުތަފާތަކުން ލަންކާ ބަލިކޮށް ގައުމީ ޓީމާއި ދަގަނޑޭ ރެކޯޑް ހަދައިފި

ފުޓްބޯޅައިގައި އެންމެ ބޮޑު ވާދަވެރިޔާ ސްރީލަންކާގެ މައްޗަށް މިރޭ 0-10 އިން ކުރި ހޯދައި ސާފް ޗެމްޕިއަންޝިޕުގެ ތާރިހުގައި އެންމެ ތަފާތު ބޮޑުކޮށް މޮޅުވި ގައުމުގެ ރެކޯޑް ރާއްޖެއިން ހަދައިފިއެވެ. އަދި ސާފް ޗެމްޕިއަންޝިޕުގެ ތާރިހުގައި އެންމެ ގިނަ ލަނޑު ޖެހުމުގެ ރެކޯޑް ރާއްޖޭގެ ކެޕްޓަން އަދި ނުރައްކާތެރި ފޯވާޑް އަލީ އަޝްފާގް (ދަގަނޑޭ) މުގުރާލައިފިއެވެ.

ނޭޕާލްގެ ދަޝްރަތު ސްޓޭޑިއަމްގައި މިރޭ ކުޅުނު މިމެޗުގެ ފުރަތަމަ ލަނޑު 5 ވަނަ މިނެޓުގައި ކާމިޔާބު ކޮށްދިނީ ޒުވާން ފޯވާޑް އަސަދުﷲ އަބްދުﷲއެވެ. މިއީ ލަންކާގެ އޭރިޔާގެ ތެރެއިން އަލީ ފާސިރު (ސެންޓޭ) ނަގައިދިން ހުރަހަކުން އަސަދުﷲ ކާމިޔާބު ކުރި ލަނޑެކެވެ. ރާއްޖޭގެ ދެވަނަ ލަނޑު 20 ވަނަ މިނެޓުގައި ލިބުނު ޕެނަލްޓީއަކުން ކާމިޔާބު ކޮށްދިނީ ދަގަނޑޭއެވެ. މިއީ ލަންކާ ކީޕަރު އިމްރާމް މުހައްމަދު ކައިރިން ނައްޓާލުމަށްފަހު ދަގަނޑޭ ދެމިގަތް ވަގުތު އޭނާ ދަގަނޑޭއަށް ކުރި ފައުލަކާ ގުޅިގެން ލިބުނު ޕެނަލްޓީއަކުން ކާމިޔާބު ކުރި ލަނޑެކެވެ. ދަގަނޑޭއަށް ކުރި ފައުލާ ގުޅިގެން ލަންކާ ކީޕަރަށް ވަނީ ރަތްކާޑް ދައްކާ ދަނޑުން ފޮނުވާލާފައެވެ.

ރާއްޖޭގެ ތިންވަނަ ލަނޑު ދަގަނޑޭ ކާމިޔާބު ކުރީ 45 ވަނަ މިނެޓުގައެވެ. މިއީ ލަންކާގެ ޑިފެންޑަރަކު ދަގަނޑޭއަށް ހަމަލާދީ ވައްޓާލުމުން ލިބުނު ޕެނަލްޓީއަކުން ކާމިޔާބު ކުރި ލަނޑެކެވެ. ދެވަނަ ހާފް ފަށައިގެން ރާއްޖެއިން ކުޅެމުންދިޔައީ ބައިނަލްއަގުވާމީ މުބާރާތެއްގައި ރާއްޖެއިން މިހާތަނަށް ދައްކާފައި ނުވާފަދަ ރީތި މޮޅު ކުޅުމެކެވެ. ނަތީޖާއަކަށް ވެގެންދިޔައީ ލަންކާ ކުޅުންތެރިން ދިވެހި ކުޅުންތެރިން ފަހައި ދުވަން ޖެހުމެވެ. ދެވަނަ ހާފްގައި ލަންކާގެ ގޯލު ރާއްޖެއަށް ހުޅުވާލަދީ ދަގަނޑޭ ފުރަތަމަ ހެޓްރިކް ހެދީ 51 ވަނަ މިނެޓުގައެވެ. އަދި 53 ވަނަ މިނެޓާއި 58 ވަނަ މިނެޓާއި 89 ވަނަ މިނެޓުގައި ތިން ލަނޑު ކާމިޔާބުކޮށް ދަގަނޑޭ ވަނީ ދެވަނަ ހެޓްރިކް ހަދާފައެވެ. ރާއްޖެއަށް ދެން ލަނޑު ޖަހައިދިނީ 76 ވަނަ މިނެޓުގައި ހަސަން އަދްހަމް އާއި 83 ވަނަ މިނެޓުގައި ސެންޓޭ އާއި 86 ވަނަ މިނެޓުގައި ތަޖުރިބާކާރު ފޯވާޑް އަލީ އުމަރެވެ.

ދަގަނޑޭ މިމެޗުގައި ހެދި ދެހެޓްރިކާއެކު ސާފް ޗެމްޕިއަންޝިޕުގެ ތާރިހުގައި އެންމެ ގިނަ ލަނޑު ޖެހުމުގެ ރެކޯޑް ދަގަނޑޭ ގާއިމް ކުރީ އިންޑިޔާގެ މަޝްހޫރު ފުޓްބޯޅަ ކުޅުންތެރިޔާ ބައިޗުން ބުޓިޔާ ފަހަތަށް ޖައްސާލުމަށްފަހުއެވެ. މިހާރު ފުޓްބޯޅަ ކުޅުން ހުއްޓާލައިފައިވާ ބުޓިޔާ ސާފް ޗެމްޕިއަންޝިޕުގައި ކާމިޔާބުކޮށްފައި ވަނީ 12 ލަނޑެވެ. ދަގަނޑޭގެ ރެކޯޑަކީ 14 ލަނޑެވެ. އަނެއް ކޮޅުން މިމެޗުގައި ދަގަނޑޭ ހެދި ދެހެޓްރިކަކީވެސް ސާފް ޗެމްޕިއަންޝިޕުގެ ރެކޯޑެކެވެ.

މިމެޗަށް ނުކުތްއިރުވެސް ސާފް ޗެމްޕިއަންޝިޕުގައި އެންމެ ތަފާތު ބޮޑުކޮށް މޮޅުވުމުގެ ރެކޯޑް އޮތީވެސް ރާއްޖެ އަތުގައެވެ. އެއީ 2005 ވަނަ އަހަރުގެ ސާފް ޗެމްޕިއަންޝިޕުގައި އަފްޣާނިސްތާން އަތުން 9-1 އިން މޮޅު ގާއިމް ކޮށްފައިވާ ރެކޯޑެކެވެ.ލަންކާ އަތުން މޮޅުވެ އެތައް ރެކޯޑެއް ރާއްޖެއިން ހެދިއިރު މިމެޗް ކުޅުނު ސްޓޭޑިއަމްއަކީ 1997 ގެ ސާފް ޗެމްޕިއަންޝިޕުގެ ސެމީފައިނަލުގައި ލަންކާ އަތުން 2-1 އިން މޮޅުވެ ފުރަތަމަ ފަހަރަށް ސާފް ޗެމްޕިއަންޝިޕުގެ ފައިނަލުން ރާއްޖެއިން ޖާގަ ހޯދި ތާރިހީ ސްޓޭޑިއަމްއެވެ.

އެދުވަހު ލަންކާ ކުޅުންތެރިންނާއި އޮފިޝަލުންގެ ފަރާތުން ދިވެހި ކުޅުންތެރިންނަށް ހަމަލާދީ ލޭއޮހޮރުވާލި ނަމަވެސް އޭގެ ސޯޅަ އަހަރުފަހުން މިރޭ ލަންކާ ކުޅުންތެރިންނާއި އޮފިޝަލުން ދަނޑުން ފައިބައިގެން ދިޔައީ ލަންކާއަށްވުރެ ދިވެހި ފުޓްބޯޅަ އެތައް ގުނައެއް ކުރިއަރާފައިވާކަން ގަބޫލްކޮށް އިހްތިރާމް އަދާކުރަމުންނެވެ.

މިރޭގެ މެޗަށްފަހު ބޭއްވި ނޫސްވެރިންގެ ބައްދަލުވުމުގައި ލަންކާ ކޯޗު ކްލައުޑިއޯ ރޮބާޓޯ ބުނީ މެޗުން ބަލިވުމުގެ ޒިންމާ ފުރިހަމައަށް އުފުލާ ކަމަށެވެ. ލަންކާއަށް މައްސަލަ ދިމާވީ މެޗުގެ ކުރީކޮޅު ރާއްޖެއިން ލަނޑު ޖެހުމާއި، ގޯލްކީޕަރަށް ރަތްކާޑު ދެއްކުމުން ކަމަށެވެ. އަދި މެޗުގެ އެންމެ ބޮޑު ތަފާތަކީވެސް ރާއްޖޭގެ ކެޕްޓަން ދަގަނޑޭ ކަމަށް އޭނާ ބުންޏެވެ.

ރާއްޖޭގެ ކޯޗު އިސްތަވާން އުރުބާނީ ބުނީ ރެކޯޑު އަދަދަކަށް ލަނޑު ޖަހައި ލަންކާ ބަލިކުރުމުން ހިތްހަމަޖެހޭ ކަމަށެވެ. މިނަތީޖާއަކީ ކުރިއަށްއޮތް މެޗުތަކަށް ލިބުނު ހިތްވަރެއް ކަމަށެވެ. ރާއްޖެ ދެންކުޅޭނީ މިމަހުގެ 4 ވަނަ ދުވަހު ބޫޓާނަ ދެކޮޅަށެވެ.