ވަގަށް ނަގައިފައިވާ ދެ ތިޖޫރިއެއް ހޯދައިފި
15 މޭ 2016 21:17
އައްޑޫ ސިޓީގައި ކޮންސްޓްރަކްޝަން މަސައްކަތްކުރާ ކުންފުންޏެއްގެ އޮފީހަކުން ވަގަށް ނަގާފައިވާ ދެ ތިޖޫރީއެއް ހޯދައިފި ކަމަށް ފުލުހުން ބުނެފިއެވެ.
މި ދެ ތިޖޫރީ ފެނިފައިވަނީ އައްޑޫ ސިޓީ ހިތަދޫ ޕޮލިސް ސްޓޭޝަނަށް މެއި މަހުގެ 14 ވަނަ ދުވަހުގެ 05:50 އެހައިކަންހާއިރު ހުށަހެޅުނު ވައްކަމުގެ މައްސަލައަކާއި ގުޅިގެން ހިތަދޫގައި މަސައްކަތްކުރާ ފުލުހުން ކުރަމުންދިޔަ މަސައްކަތުން ކަމަށްވެސް ފުލުހުން ބުނެފައިވެއެވެ.
މި ދެ ތިޖޫރީ ތެރެއިން އެއް ތިޖޫރީ ފެނިފައިވަނީ އެކުންފުނީގެ އޮފީސް ހުންނަ ގޯތި ތެރޭގައި އެއްލާލާފައި އޮއްވައި ކަމަށް ފުލުހުންވަނީ ބުނެފައެވެ. ދެވަނަ ތިޖޫރީ ފެނިފައިވަނީ އެ އޮފީސް ހުންނަ އިމާރާތް ކައިރީގައި ހުރި ފަޅު ގޯއްޗެއްގެ ތެރެއިން ކަމަށްވެސް ފުލުހުން ބުނެފައިވެއެވެ.
މި ދެ ތިޖޫރީގައިވެސް ހުރީ ޕާސްޕޯޓާއި އެ އޮފީހުގެ ލިޔެކިޔުންތަކެއް ކަމަށް ފުލުހުން ހާމަކޮށްފައިވެއެވެ. ފުލުހުން ބުނެފައިވަނީ އެއޮފީހުން އެއްވެސް ފައިސާއެއް ގެއްލިފައި ނުވާ ކަމަށެވެ.
މިމައްސަލައާއި ގުޅިގެން އަދި އެއްވެސް މީހަކު ފުލުހުންގެ ބެލުމުގެ ދަށަށް ގެނެސްފައެއް ނުވެއެވެ. މިމައްސަލަ އައްޑޫ ސިޓީ ހިތަދޫ ޕޮލިސް ސްޓޭޝަނުން ދަނީ ތަހުގީގު ކުރަމުންނެވެ.
ކިޔުންތެރިންގެ ހިޔާލު