ރާއްޖެއިން ބޭރުގައި ވިސާ ޑެބިޓް ކާޑު ބޭނުން ކުރެވޭ ލިމިޓް އިތުރު ކޮށްފި

ވިސާ ޑެބިޓް ކާޑު ބޭނުން ކޮށްގެން ރާއްޖެއިން ބޭރުގައި 1000 ޑޮލަރު ބޭނުން ކުރެވޭ ގޮތަށް ބޭންކް އޮފް މޯލްޑިވްސް (ބީއެމްއެލް) އިން ހަމަ ޖައްސަވައިފިއެވެ.

ބީއެމްއެލް އިން މިއަދު ބުނެފައިވަނީ މިއަދުން ފެށިގެން ރާއްޖެއިން ބޭރުގެ އޭޓީއެމް ތަކުން ދުވާލަކަށް 400 ޑޮލަރަށްވާ ފައިސާ ނެގޭނެ ކަމަށެވެ. އޭގެ އިތުރަށް ޕީއޯއެސް މެދުވެރިކޮށް ދުވާލަކަށް 600 ޑޮލަރުގެ ވިޔަފާރި ކުރެވޭނެ ކަމަށެވެ.

މީގެ ކުރިން ވިސާ ޑެބިޓް ކާޑު މެދުވެރިކޮށް ރާއްޖެއިން ބޭރުގައި ބޭނުންކުރެވެނީ ޖުމްލަ 600 ޑޮލަރެވެ. މިއީ ބޭންކުން ކަސްޓަމަރުންނަށް ދެމުން ގެންދާ ޚިދުމަތް ފުޅާ ކުރުމުގެ ގޮތުން ކުރެއްވި ކަމެއް ކަމަށް ބޭންކުން ބުނެފައިވެއެވެ.

ބީއެމްއެލްގެ ރިޓެއިލް ބޭންކިން ޑައިރެކްޓަރ މުހައްމަދު ޝަރީފް ވިދާޅުވީ މި ދުވަސްވަރަކީ ވަރަށްގިނަ ދިވެހީން ރާއްޖެއިން ބޭރުގައި އުޅެމުންދާ ދުވަސް ކޮޅެއް ކަމުން މި ގެނައި ބަދަލުގެ ސަބަބުން އެމީހުންނަށް ވަރަށް ބޮޑަށް ފަސޭހަ ވެގެންދާނެ ކަމަށެވެ.