އެމްޑީޕީން އަނެއްކާވެސް ބޮޑު މުޒާހަރާއަކަށް ނުކުންނަނީ
19 ޑިސެމްބަރ 2015 23:11
އަނެއްކާވެސް ބޮޑު މުޒާހަރާއަކަށް ނުކުންނާނެ ކަމަށް އެމްޑީޕީން ބުނެފިއެވެ. ރ. އަލިފުށީގައި ރޭ ބޭއްވި ޖަލްސާގައި އެމްޑީޕީގެ ނާއިބު ރައީސް މުޙައްމަދު ޝިފާޒު ވިދާޅުވީ މުޒާހަރާ ބާއްވާނީ އަންނަ އަހަރުގެ ފެބުރުއަރީގައި ކަމަށެވެ. މުޒާހަރާ ބާއްވާނެ ދުވަސް ފަހުން އިޢުލާން ކުރައްވާނެ ކަމަށްވެސް އޭނާ ވިދާޅުވިއެވެ.
މި މުޒާހަރާ އަކީ ރައީސް ނަޝީދު ޖަލަށް ލެއްވިތާ އަހަރު ފުރޭތީ އެމަނިކުފާނު ދޫކޮށްލުމަށް އެދި ސަރުކާރަށް ގޮވާލުމަށް ބާއްވާ މުޒާހަރާއެކެވެ. ރައީސް ނަޝީދު ޖަލުގައި ހުންނަވާތާ އެއްއަހަރު ފާނީ އަންނަ އަހަރުގެ ފެބުރުއަރީ 22 ގައެވެ.
ޝިފާޒު ވިދާޅުވީ ރައީސް ޔާމީނަކީ ގޮތްދޫކުރައްވާ ބޭފުޅެއް ނޫންކަމަށެވެ. އެމަނިކުފާނު ކުރައްވަންވީ ކަމަކީ ގޮތް ދޫކުރައްވައި ރައީސް ނަޝީދާއި ސިޔާސީ އެހެން ބޭފުޅުންވެސް ދޫކޮށްލެވުން ކަމަށް ވިދާޅުވިއެވެ. ޝިފާޒު ވިދާޅުވީ ރައީސް ޔާމީން ވެރިމަށް ވަޑައިގެންނެވީވެސް އަދި ވެރިކަމުގައި ހުންނަވަނީވެސް ރައްޔިތުންގެ ތާއީދެއް ނެތި ކަމަށެވެ. އެހެން ކަމުން ރައްޔިތުންގެ ގާތުން އެމަނިކުފާނު އެދިވަޑައިގަންނަވަންވީ ކަމެއް ނޯންނާނެ ކަމަށްވެސް ވިދާޅުވިއެވެ. ރައީސް ނަޝީދު ވެރިކަމަށް ވަޑައިގެން އެމަނިކުފާނުގެ ރިޔާސީ ވަޢުދުތައް ފުއްދަވަމުން ގެންދެވި ނަމަވެސް ރައީސް ޔާމީނަށް އެއްވެސް ވަޢުދެއް އަދި ނުފުއްދޭ ކަމަށްވެސް ޝިފާޒު ވިދާޅުވިއެވެ.
ރައީސް ޔާމީން ގެންދަވަނީ އިޔޫގެ އެންގެވުމާވެސް ދެކޮޅު ހައްދަވަމުން ކަމަށް ޝިފާޒު ވިދާޅުވިއެވެ. އޭގެ ސަބަބުން ރާއްޖެއަށް ދެރައް ލިބޭއިރު އޭގެ ނިކަމެތިކަން އެންމެ ބޮޑަށް ފޯރާނީ ރައްޔިތުންނަށް ކަމަށްވެސް ވިދާޅުވިއެވެ.، އެހެން ކަމުން ރައީސް ނަޝީދާއި ސިޔާސީ އެހެން ކުށްވެރިން ދޫކޮށްލުމަށް އޭނާ ތަކުރާރު ކުރައްވައި ވިދާޅުވިއެވެ.
ކިޔުންތެރިންގެ ހިޔާލު