ރައްޔިތުން ސަލާމަތް ކުރުމަށް އަވަސް ފިޔަވަޅުތަކެއް އަޅަންޖެހޭ: އަދާލަތު

ރާއްޖެއިން ގެންގުޅެމުންދާ ޚާރިޖީ ސިޔާސަތުގެ ސަބަބުން ދިމާވެދާނެ އިޤްތިސާދީ ކާރިސާއަކުން ދިވެހި ރައްޔިތުން ސަލާމަތް ކުރުމަށް ހަރުދަނާ އަވަސް ފިޔަވަޅުތަކެއް އެޅުމަށް ޢަދާލަތު ޕާޓީން ސަރުކާރަށް ގޮވައިލައިފިއެވެ.

މިއަދު ނެރެފައިވާ ބަޔާނެއްގައި އެޕާޓީން ބުނެފައިވަނީ ރާއްޖެއިން ގެންގުޅެމުން އަންނަނީ ގޮތްދޫނުކުރާ ޚާރިޖީ ސިޔާސަތެއް ކަމަށެވެ. އޭގެ ސަބަބުން ބައިނަލްއަޤްވާމީ ދުނިޔޭގައި ރާއްޖެދަނީ މަޑުމަޑުން އެކަހެރިވަމުން ކަމަށެވެ. ސަރުކާރުގެ ހަރުކަށި ވިސްނުން ބަދަލު ކުރުމަށްފަހު ރައްޔިތުންނަށްޓަކައި ހަރުދަނާ، އަވަސް ފިޔަވަޅުތަކެއް ނާޅައިފިނަމަ ދިވެހި ރައްޔިތުންނަށާއި ޤައުމަށް ބޮޑެތި ދަތިތަކެއް ކުރިމަތިވުމަކީ އެކަށީގެންވާ ކަމެއް ކަމަށްވެސް އެބަޔާނުގައި ބުނެފައިވެއެވެ.

ޤައުމު ތަކުގެ ސަލާމަތާއި އިޤްތިޞާދީ ކުރިއެރުން ބިނާވެގެންވާ އެންމެ މުހިންމު އެއް ރުކުނަކީ ޚާރިޖީ ސިޔާސަތުކަމަށްވެސް އެބަޔާނުގައި ބުނެފައިވެއެވެ. ޚާއްސަކޮށް ރާއްޖެ ފަދަ ކުޑަ ޤައުމަކަށް މިކަމުގެ މުހިންމުކަން އިތުރަށް ބޮޑު ކަމަށްވެސް ބުނެފައިވެއެވެ. "ސަލާމަތީ ގޮތުން ދިމާވެދާނެ ގޮންޖެހުން ތަކުންނާއި މެދުވެރިވެދާނެ އިޤްތިޞާދީ ކާރިސާއަކުން ދިވެހި ރައްޔިތުން ސަލާމަތްކުރުމަށްޓަކައި ހަރުދަނާ، އަވަސް ފިޔަވަޅުތަކެއް އެޅުމަށް ދިވެހި ސަރުކާރަށް ގޮވާލަމެވެ."

ބައިނަލްއަޤްވާމީ މުޖުތަމަޢުގައި ދިވެހިރާއްޖެއާމެދު އުފެދިފައިވާ ނުތަނަވަސްކަން ނައްތާލުމަށްޓަކައި ޝަރުޢީ ދާއިރާގެ އިސްލާހު ކޮށް އިތުބާރު ކުރެވޭ ނިޒާމަކަށް އެދާއިރާ ހެދުމަށް ޢަދާލަތުންވަނީ ގޮވައިލައިފައެވެ. އޭގެ އިތުރަށް ބޭރުގެ ބައެއް ޤައުމުތަކުގެ މަސްލަތަށްވުރެ ބޮޑަށް ދިވެހި ރައްޔިތުންގެ މަސްލަހަތަށް އިސްކަން ދެއްވުމަށްވެސް ޢަދަލާތުން ސަރުކާރަށް ގޮވައިލައިފައިވެއެވެ."ޚާއްޞަކޮށް ސަލާމަތާއި ރައްކާތެރިކަމާ، އިޤްތިޞާދީ ކުރިއެރުމާއި އަދި އިންޑިއާ ކަނޑުގެ ސުލްޙަވެރިކަން ކަށަވަރުކުރުމެވެ. ދުނިޔޭގެ ބޮޑެތި ބާރުތަކުގެ މެދުގައި އުފެދިފައި ވާދަވެރިކަމުގެ ތެރެއަށް ދިވެހިރާއްޖެ ވެއްދުމަކީ ސަރުކާރުން އަޅާ ގޯސްފިޔަވަޅެއްކަމުގައި މިޕާޓީން ދެކެމެވެ."

ޤައުމުގެ ކަންކަން އިޞްލާޙްކުމަށްޓަކައި ސަރުކާރާއެކު މަޝްވަރާކޮށްގެން އެއްބަސްވެވޭ ޙައްލެއް ޢަދާލަތުޕާޓީން އޮތީ ތައްޔާރަށް ކަމަށްވެސް ބަޔާނުގައި ބުނެފައިވެއެވެ.