ނަޝީދު ގެއަށް ބަދަލު ކޮށްފާނެ ކަމުގެ އުންމީދު އެބައޮތް: ޙަސަން ލަތީފް
15 ޑިސެމްބަރ 2015 23:00
ރާއްޖޭގެ ކުރީގެ ރައީސް މުޙައްމަދު ނަޝީދުގެ މައްޗަށް ޓެރަރިޒަމްގެ ކުށް ސާބިތުވެ އެމަނިކުފާނުގެ މައްޗަށް ކޮށްފައިވާ 13 އަހަރުގެ ޖަލު ހުކުމުގެ ބާކީބައި ގެއަށް ބަދަލު ކޮށްފާނެ ކަމުގެ އުންމީދު އެބައޮތް ކަމަށް އެމަނިކުފާނުގެ ޤާނޫނީ ވަކީލުންގެ ޓީމުން ބުނެފިއެވެ.
ކޮމިޝަނަރ އޮފް ޕޮލިސް އަޙުމަދު އަރީފާ ބައްދަލު ކުރެއްވުމަށްފަހު ނޫސްވެރިންނަށް މަޢުލޫމާތު ދެއްވަމުން އަލް އުސްތާޒު ޙަސަން ލަތީފް މިއަދު ވިދާޅުވެފައިވަނީ އެފަދަ އުންމީދެއް ކުރެވެނީ ނަޝީދުގެ ޖަލު ހުކުމުގެ ބާކީ އޮތް ބައި ގޭބަންދަށް ބަދަލުކޮށް ކަރެކްޝަަނަލް ސާވިސް އިން ކުރިން ދިންކަމަށް ބުނާ ލިޔުމުގެ މައްސަލަ ވަރަށް ރަނގަޅަށް ފުލުހުން ބަލާނެ ކަމަށް ސީޕީ ވިދާޅުވެފައިވާތީއެވެ.
ޙަސަން ލަތީފް ވިދާޅުވީ އެ ލިޔުމުގެ މައްސަލަ ރަނގަޅަށް ތަޙުގީގު ކޮށްފި ކަމަށްވާނަމަ ރައީސް ނަޝީދު އަލުން ގެއަށް ބަދަލުކޮށްފާނެ ކަމުގެ އުންމީދު ބޮޑު ކަމަށެވެ. ޙަސަން ވިދާޅުވީ ރައީސް ނަޝީދަށް މިހާރު ލިބެމުންދަނީ އެމަނިކުފާނަށް ހައްގު އަދަބެއް ނޫން ކަމަށެވެ. "ޕޮލިހުން މި މައްސަލަ ފުރިހަމައަށް ތަހުގީގުކޮށްފިއްޔާ އެއީ ސަރުކާރުން ރައީސް ނަޝީދަށް ފޮނުވި ލިޔުމެއްކަން އެބޭފުޅުންނަށް (ފުލުހުންނަށް) ފާހަގަކުރެވޭނެ،" ޙަސަން ވިދާޅުވިއެވެ.
އެ ލިޔުމުގެ މައްސަލަ ފުލުހުން ތަހުގީގު ކުރަމުންދާއިރު އެކަމަށް ބޭނުންވާ މައުލޫމާތު ރައީސް ނަޝީދުގެ ޤާނޫނީ ޓީމުން ފުލުހުންނަށް ދެއްވާނެ ކަމަށްވެސް ޙަސަން ވިދާޅުވިއެވެ.
ރައީސް ނަޝީދުގެ މައްސަލައަށް ސިޔާސީ ހައްލެއް ހޯއްދެވުމަށް އެމަނިކުފާނު ކުރެއްވި މަސައްކަތްވަނީ ނާކާމިޔާބު ވެފައެވެ. އެމަނިކުފާނު މިހާރު ނިންމަވާފައިވަނީ އެ މައްސަލަ ސްޕްރީމް ކޯޓުގައި އިސްތިއުނާފް ކުރެއްވުމަށެވެ. އެ މަސައްކަތް އެ މަނިކުފާނުގެ ޤާނޫނީ ޓީމުން ގެންދަވަނީ ކުރައްވަމުންނެވެ.
ކިޔުންތެރިންގެ ހިޔާލު