ރިޔާސީ ލޯންޗުކޮޅުން ގޮއްވާލައިފައިވަނީ ބާރުގަދަ އެއްޗެއް ބޭނުންކޮށްގެން
30 އޮކްޓޯބަރ 2015 5:41
ރިޔާސީ ލޯންޗުކޮޅު "ފިނިފެންމާ" ގައި ބޮމެއް ގޮއްވާލި ހާދިސާއަށްފަހު ސާމްޕަލްތައް ތަހުލީލް ކުރިއިރު ބާރުގަދަ ގޮވުމެއް ގޮވާލަން ބޭނުންކުރާ ކަހަލަ މާއްދާއެއް ފެނިފައިވާ ކަމަށް ސައުދީ ނެޝަނަލް އިންކުއަރީ ކޮމިޝަނުން ބުނެފިއެވެ.
ލޯންޗުކޮޅުން ފެނިފައިވަނީ އާރްޑީއެކްސް ކިޔާ މާއްދާއެއް ކަމަށް ސައުދީގެ ފޮރެންސިކް ޓީމާ ހަވާލާދީ ނެޝަނަލް އިންކުއަރީ ކޮމިޝަނުން ނެރެފައިވާ ބަޔާނެއްގައި ބުނެފައިވެއެވެ.
ނޭޝަނަލް އިންކުއަރީ ކޮމިޝަނުން ނެރެފައިވާ ބަޔާނުގައި ބުނެފައިވަނީ ސައުދީ އަރަބިޔާގެ ފޮރެންސިކް ޓީމްގެ ރިޕޯޓު މިހާރުވަލީ ލިބިފައި ކަމަށެވެ. އެރިޕޯޓުގައި ބުނެފައިވަނީ އާރްޑީއެކްސް އަކީ ބާރުގަދަ އެކްސްޕްލޯސިވްއެއް ކަމުގައިވާ ސީ4 ފަދަ އެކްސްޕްލޯސިވް އުފެއްދުމުގައިވެސް ބޭނުންކުރާ "މައިގަނޑު އަސާސީ މާއްދާއެއް" ކަމަށެވެ.
"ތަހުލީލަށްޓަކައި ގެންދެވުނު ސާމްޕަލްތަކުގެ ކެމިކަލް އެނަލިސިސް ހެދުމުން، އާރުޑީއެކްސް ފެނިފައިވާކަމަށް މި ރިޕޯޓުގައި ބަޔާންކޮށްފައިވެއެވެ. އަދި އާރްޑީއެކްސް މި މާއްދާ އަކީ ހައި އެކްސްޕްލޯސިވް އެއްގެގޮތުގައި ދަރަޖަ ކުރެވޭ މާއްދާއެއް ކަމަށާއި އާރްޑީއެކްސްއަކީ ބާރުގަދަ އެކްސްޕްލޯސިވްއެއް ކަމަށްވާ ސީ4 ފަދަ އެކްސްޕްލޯސިވް އުފެއްދުމުގައި ވެސް ބޭނުންކުރާ މައިގަނޑު މާއްދާއެއް ކަމަށް ރިޕޯޓުގައި ބަޔާންކޮށްފައިވެއެވެ." އިންކުއަރީ ކޮމިޝަނުން ބުނެފައިވެއެވެ.
މިރިޕޯޓާއެކު އެކޮމިޝަނަށް މިހާރު ޔަގީންވެފައިވަނީ އެގޮއްވާލުމަކީ "ހައިއެކްސްޕްލޯސިވް" ބޭނުންކޮށްގެން ހިންގާފައިވާ އަމަލެއް ކަމަށެވެ. އެކޮމިޝަނުން ކުރިންވެސް ނިންމާފައިވަނީ އެހަަމަލާއަކީ ރައީސުލްޖުމްހޫރިއްޔާ އަވަހާރަކޮށްލަން ބަޔަކު ގަސްތުގައި ދިންހަމަލާއެއް ކަމަށެވެ. މިކަން ސަރީލަންކާގެ މާހިރުންގެ ޓީމުންވެސް ޔަގީން ކޮށްދީފައިވާ ކަމަށް އެކޮމިޝަނުންވަނީ ބުނެފައެވެ.
ސައުދީގެ ރިޕޯޓާއި ސްރީލަންކާގެ ރިޕޯޓުގެ މައްޗަށް ބިނާކޮށް އެ ކޮމިޝަނުން ކުރަންޖެހޭ މަސައްކަތްތައް ކުރައްވަމުން ގެންދަވާނެ ކަމަށްވެސް އެރިޕޯޓުގައި ބުނެފައިވެއެވެ. ރިޔާސީލޯންޗުކޮޅުގެ ހާދިސާއަށްފަހު ފުލުހުންނާއި ސިފައިން ގެންދަނީ މާލޭގެ ބައެއްގެތައް ފާސްކުރަުންނެވެ. ބައެއްގެތައް ފާސްކުރަމުން ގެންދަނީ ހަތިޔަރު ގެންގުޅޭ ކަމުގެ މައުލޫމާތު ލިބިގެންނެވެ. މިމަސައްކަތުގައި ހަރަކާތްތެރިވަނީ އެމްއެންޑީއެފްގެ ސްޕެޝަލް ފޯސް (އެސްއެފް) މީހުންނެވެ. ގެތައް ފާސްކުރުމުގެ ތެރޭގައި މިރޭވަނީ ގެއަކުން ފިސްތޯލައެއް ފެނިފައެވެ. އެހެން ނަމަވެސް ފުލުހުންވެސް ސިފައިންވެސް މިކަމާބެހޭ އެއްވެސް ތަފްސީލެއް ނުދެއްވައެވެ.
ކިޔުންތެރިންގެ ހިޔާލު