ނަޝީދު މިނިވަން ކުރުމަށް ގޮވާލައި އެކިކަންކޮޅު ތަކުގައި އިހުތިޖާޖު ކުރަނީ
13 އޮކްޓޯބަރ 2015 22:31
ރާއްޖޭގެ ކުރީގެ ރައީސް އަދި އެމްޑީޕީގެ ރައީސް މުހައްމަދު ނަޝީދު މިނިވަން ކުރުމަށް ގޮވާލައި އިހުތިޖާޖު ކުރުން އޮކްޓޯބަރ ސޯޅަވަނަ ދުވަހު ރާއްޖޭގެ ހުރިހާ ކަންކޮޅުތަކުގައި އޮންނާނެ ކަމަށް އެމްޑީޕީން މިއަދު ބުނެފިއެވެ.
އެޕާޓީގެ ވެބްސައިޓުގައި ބުނެފައިވަނީ މި އިހުތިޖާޖުގައި ގޮވާލާނީ 13 އަހަރުގެ ޖަލު ހުކުމެއް މިހާރު ތަންފީޒު ކުރަމުންދާ ރައީސް ނަޝީ މިނިވަން ކުރުމަށް ކަމަށެވެ. އޭގެ އިތުރަށް ސިޔާސީ ހުރިހާ ހައްޔަރީން ދޫކޮށްލުމަށްވެސް ގޮވާލާނެ ކަމަށް ބުނެފައިވެއެވެ. އެޕާޓީން ބުނެފައިވަނީ ރައީސް ނަޝީދު ޖަލަށްލައިފައިވަނީ "ޣައިރު ގާނޫނޫ ގޮތުން" ކަމަށެވެ. އެހެންކަމުން އެމަނިކުފާނު ވަގުތުން ދޫކޮށްލުމަށް ގޮވާލާނެ ކަމަށް ބުނެފައިވެއެވެ.އެމަނިކުފާނު މިނިވަން ކުރުމަށް ދުނިޔޭގެ އެތައް ގައުމުތަކާއި، އދ. އިން ވެސްވަނީ ގޮވާލައްވާފައެވެ. އެހެން ނަަމަވެސް ދިވެހި ސަރުކާރުން އަދި އެކަމަށް އެދެވޭ ޖަވާބެއް ނުދެއްވައެވެ.
މި އިހުތިޖާޖަކީ ރާއްޖޭގެ އެތަކެއް ރަށްރަށުގެ ރައްޔިތުންގެ އެދުމުގެ މަތިން ބާއްވާ އިހުތިޖާޖެއް ކަމަށް އެމްޑީޕީން ބުނެފައިވެއެވެ. އިހުތިޖާޖު ކުރާނީ އެބައެއްގެ ރަށުގައި އެބަޔަކު ތިބެގެން ކަމަށްވެސް ބުނެފައިވެއެވެ.
އިހުތިޖާޖު ފަށާނީ އޮކްޓޯބަރ 16 ވާ ހުކުރު ދުވަހު ހަވީރު 4.00 ގައެވެ. ނަމަވެސް ނިންމާނެ ގަޑިއެއް އެމްޑީޕީން ބުނެފައެއް ނުވެއެވެ.
ކިޔުންތެރިންގެ ހިޔާލު