އައިއެންއޭއަކީ ރައްކާތެރި މާހައުލެއްއޮތް ތަނެއް-އެމްޑީ

އިބްރާހިމް ނާސިރު އިންޓަނޭޝަނަލް އެއާޕޯޓް (އައިއެންއޭ) އަކީ ސަލާމަތާއި ރައްކާތެރި މާހައުލެއްއޮތް އެއާޕޯޓެއްކަމަށް މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއެންސީއެލް) ގެ މެނެޖިންގ ޑައިރެކްޓަރ (އެމްޑީ) އާދިލް މޫސާ ވިދާޅުވެއްޖެއެވެ.

ފަންސާސްއެއްވަނަ ބޭސިކް އޭވިއޭޝަން ސެކިއުރިޓީކޯސް ފުރިހަމަކުރި ފަރާތްތަކަށް ސެޓްފިކެޓް ދިނުމަށް މިއަދު ބޭއްވި ރައްމިއްޔާތުގައި ވާހަކަ ދައްކަވަމުން އާދިލް މޫސާ ވިދާޅުވީ، އެ އެއާޕޯޓަކީ ރައްކާތެރި މާހައުލެއް އޮތް އެއާޕޯޓެއް ކަމަށާއި އޭގެ އެންމެ ބޮޑު ހެއްކަކީ، އޭވިއޭޝަން ސެކިއުރިޓީ ކޮމާންޑު ކަމަށެވެ. އަދި އެކަމަށް އެންމެބޮޑު އެހީތެރިކަމެއް ލިބެނީ އޭވިއޭޝަން ސެކިއުރިޓީ ކޮމާންޑުން ކަމަށްވެސް ވިދާޅުވިއެވެ.

ކޯސް ފުރިހަމަކުރި ފަރާތްތަކަށް ނިސްބަތްކޮށް އޭނާ ވިދާޅުވީ، ކޯހުގެ ސެޓްފިކެޓް ހާސިލް ކުރުމަށް މަސައްކަތްކުރި ގޮތަށް އަމަލީ މައިދާނަށް ނިކުމެ މަސައްކަތް ކުރުމަކީ އެދިވަޑައިގަންނަވާކަމެއް ކަމަށެވެ.

އެމްސީއެލްގައި 2500 މުވައްޒިފުން އުޅޭއިރު ކޮންމެ ދުވަހަކީވެސް ވަރަށްގިނަ ބަޔަކު ސަލާމް ބުނަމުންދާ ދުވަހެއްކަން ފާހަގަ ކުރައްވައި، އޭނާ ވިދާޅުވީ، މަސައްކަތުގެ މާހައުލުގައި އޮންނަ ރަނގަޅު ގޮތްތައް ބޭނުންކޮށްގެން އެންމެ ފުރިހަމައަށް ޑިއުޓީ އަދާ ކުރުމަށް ކޯހުން ސެޓްފިކެޓް ހާސިލްކުރި ފަރާތްތަކުގެ ކިބައިން އެދިވަޑައިގަންނަވާކަމަށެވެ.

މި ރަސްމިއްޔާތުގައި ވާހަކަ ދައްކަވަމުން، އޭވިއޭޝަން ސެކިއުރިޓީ ކޮމާންޑްގެ ކޮމާންޑަރު ބްރިގޭޑިއާ ޖެނެރަލް ޒަކަރިޔާ މަންސޫރު ވިދާޅުވީ، ގައުމީ ސަލާމަތާއި ރައްކާތެރި ކަމުގެ ގިއުގަނޑުގެ ތެރޭގައި އޭވިއޭޝަން ސެކިއުރިޓީ ކޮމާންޑަކީ މުހިއްމުބައެއް ކަމަށެވެ. އަދި އަމިއްލަ ޒިންމާ އާއި ފަރުދީ ޒިންމާ ނަގައިގެން ތިބެ ދިވެހި ގައުމުގެ އޭވިއޭޝަން ސެކިއުރިޓީ ކޮމާންޑަކީ ދިވެހި ދައުލަތާއި ސަރުކާރާއި ދިވެހި ރައްޔިތުންގެ ސަލާމަތާއި ރައްކާތެރިކަމާއި ސަލާމަތަށްޓަކައި މަސައްކަތްކުރާ ބަޔަކަށްވުމަށް، ކޯސްފުރިހަމަކުރި ފަރާތްތަކުގެ ކިބައިން އެދި ވަޑައިގެންނެވިއެވެ.