ތެލަސީމިއާއަށް ޓެސްޓް ކުރުމުގެ ޚިދުމަތް ހިތަދޫރީޖަނަލް ހޮސްޕިޓަލުގައި ފަށަނީ
3 ސެޕްޓެމްބަރ 2015 19:00
އައްޑޫސިޓީ ހިތަދޫ ރީޖަނަލް ހޮސްޕިޓަލަށް މީހަކުވަންނަނީ. ތެލަސީމިއާ ޓެސްޓް ކުރުމުގެ ޚިދުމަތް ހިލޭ ފޯރިކޮށްދިނުމަށް މިތަނުންވަނީ ތައްޔާރުވެފައި- ފޮޓޯ: ދުވަސް
ތެލަސީމިއާއަށް ޓެސްޓް ކުރުމުގެ ޚިދުމަތް އައްޑޫސިޓީ ހިތަދޫ ރީޖަނަލް ހޮސްޕިޓަލުގައި ފެށުމަށް ތައްޔާރުވެފައިވާ ކަމަށް އެހޮސްޕިޓަލުން ބުނެފިއެވެ.
މެނޭޖަރ ޚަދީޖާ ހަފްސާ ވިދާޅުވީ އެ ޚިދުމަތް ފެށުމަށް ވާންޖެހޭ ހުރިހާ ތައްޔާރީތައް މިހާރުވަނީ ވެފައި ކަމަށެވެ. "އެކަމަށް ބޭނުންވާ މީހަކުވެސް މިހާރުވަނީ ތަމްރީންކޮށް ނިމިފައި،" ހަފްސާ ވިދާޅުވިއެވެ.
ޚިދުމަތް ފަށާނެ ތާރީޚެއް އަދި ކަނޑައެޅިފައިނެތަސް އަންނަ ހަފްތާތެރޭގައި ޚިދުމަތް ފަށާނެ ކަމަށް އޭނާ ވިދާޅުވިއެވެ. ސަރުކާރުން ބޭނުންވަނީ ތެލެސީމިއާއަށް ޓެސްޓް ކުރުމުގެ ޚިދުމަތް އެއްވެސް އަގެއް ނެގުމަކާނުލައި ހިލޭދޭން ކަމަށް ހަފްސާ ވިދާޅުވިއެވެ. މިފަދަ ޚިދުމަތެއް ފެށިގެން ދިއުމަކީ ހޮސްޕިޓަލަށް ލިބިގެންދިޔަ ވަރަށް ބޮޑުކުރިއެރުމެއް ކަމަށާއި އަދި ޑަކްޓަރުންނަށް އެނީމިއާގެ ބަލިތައް ޑައަގްނޯސް ކުރުމުގައި ފަސޭހަތަކެއް ލިބިގެންދާނެކަމެވެ. އަދި ތެލަސީމިއާ ހުރިތޯ ބެލުމަށް ޓެސްޓް ކުރަން ބޭނުންވާ މީހުންނަށްވެސް މި ޚިދުމަތް ފެށުމުން ވަރަށް ބޮޑަށް ފަސޭހަވެގެންދާނެ ކަމަށް ހަފްސާ ވިދާޅުވިއެވެ.
ހިތަދޫ ރީޖަނަލް ހޮސްޕިޓަލުން ގެންދަނީ ޚިދުމަތްތައް އިތުރުކޮށް އެއާއެކު ފެންވަރުވެސް ރަނގަޅު ކުރުމަށް މަސައްކަތް ކުރަމުން ކަމަށް ހަފްސާ ވިދާޅުވިއެވެ.
ކިޔުންތެރިންގެ ހިޔާލު