އަޒުފާ ނިޔާވި ހާދިސާއާ ގުޅިގެން ހައުސިން މިނިސްޓަރުގެ އިސްތިއުފާއަށް ގޮވާލައިފި

އަންގާރަ ދުވަހުގެރޭ މާފަންނު ޢިއްޒުއްދީން މަގު 392 ވަނަ ކޮށީ ކައިރީ ހިނގި ހިތާމަވެރި އެކްސިޑެންޓުގައި ބޮޑެތި އަނިޔާތައް ލިބި، އެ އަނިޔާތަކަށް ފަރުވާދެމުން ދަނިކޮށް ނިޔާވި ސ. ހިތަދޫ ލިލަކް 24 އަހަރުގެ އަޒުފާ ޒުހައިރު ނިޔާވި މައްސަލައިގައި ހައުސިން މިނިސްޓަރު ޑރ.މުހައްމަދު މުއިއްޒުގެ އިސްތިއުފާއަށް އިދިކޮޅު އެމްޑީޕީން ގޮވާލައިފި އެވެ.

އަންގާރަ ދުވަހުގެރޭ މާފަންނު ޢިއްޒުއްދީން މަގު 392 ވަނަ ކޮށީ ކައިރީ ހިނގި ހިތާމަވެރި އެކްސިޑެންޓުގައި ބޮޑެތި އަނިޔާތައް ލިބި، އެ އަނިޔާތަކަށް ފަރުވާދެމުން ދަނިކޮށް ނިޔާވި ސ. ހިތަދޫ ލިލަކް 24 އަހަރުގެ އަޒުފާ ޒުހައިރު ނިޔާވި މައްސަލައިގައި ހައުސިން މިނިސްޓަރު ޑރ.މުހައްމަދު މުއިއްޒުގެ އިސްތިއުފާއަށް އިދިކޮޅު އެމްޑީޕީން ގޮވާލައިފި އެވެ.

ޑރ.މުއިއްޒުގެ އިސްތިއުފާއަށް ގޮވާލައި އެމްޑީޕީން ނެރެފައިވާ ބަޔާނެއްގައި ބުނެފައިވަނީ، މިފަދަ ހިތާމަވެރި ޙާދިސާއެއް ހިނގުމަށް މެދުވެރިވި ސަބަބު ތަޙްޤީޤްކޮށް އެކަމުގައި ޒިންމާވާންޖެހޭ ފަރާތްތަކާ މެދު މިހާރުން މިހާރަށް ފިޔަވަޅު އަޅައި މާލޭގެ މަގުތަކަކީ ރައްޔިތުންނަށް އަމާން ތަނެއް ކަމުގައި ހެދުމަށް ސަރުކާރަށް ގޮވާލާ ކަމަށެވެ.

"މާލޭ މަގުތައް ބެލެހެއްޓުމާއި މަރާމާތު ކުރުމާއި މިނޫންވެސް މިފަދަ އެހެން ހުރިހާ ކަމެއް ކުރުމުގެ ޤާނޫނީ ބާރު ރައްޔިތުން އިންތިޚާބުކޮށްފައިވާ ސިޓީ ކައުންސިލުން ނިގުޅައިގަނެ ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ޤާނޫނާއި ދިވެހިރާއްޖޭގެ ޤާނޫނު އަސާސީގެ ރޫޙާ ޚިލާފަށް މިނިސްޓްރީ އޮފް ހައުސިންގ އެންޑް އިންފްރާސްޓްރަކްޗަރއަށް ބަދަލުކުރުމަށްފަހު މުޅި މާލޭގެ ޓްރެފިކް، ސާފުތާހިރުކަން އަދި މަގުތަކުގެ ސަލާމަތީ ކަންކަމާ ގުޅިފައިވާ މިފަދަ ކަންތައް ގިނަވެ ޚިދުމަތް ފޯރުކޮށްދިނުން ލަސްވެ އިންތިހާއަށް ފަރުވާ ކުޑަވެފައިވާކަން ކަންބޮޑުވުމާއެކު ފާހަގަ ކުރަމެވެ." އެ ބަޔާނުގައި އެމްޑީޕީން ބުނެފައިވެ އެވެ.

އަޒުފާ ނިޔާވި އެކްސިޑެންޓްވުމަށް މެދުވެރިވި ހޮޅިދަނޑި ހައުސިން މިނިސްޓްރީގެ ސްޓާފުންގެ ބަޔަކު މަގުމަތީގައި ބަހައްޓައި އަދި އެހޮޅިދަނޑި އެއްވެސް ރައްކާތެރިކަމެއް ނެތް ގޮތަކަށް މިނިވަން 50 ގެ ޙަރަކާތްތަކާ ގުޅިގެން މަގުމަތި ޒީނަތްތެރިކުރުމަށް ބޭނުންކުރުމަކީ ސަރުކާރުގެ ދޯދިޔާ އަދި ރޭވުންތެރިކަމެއް ނެތް ސިޔާސަތު ހާމަވާ ކަމެއްކަމަށްވެސް އެ ބަޔާނުގައި ބުނެފައިވެ އެވެ. އަދި މިނިވަން 50 ގެ ޙަރަކާތްތައް ނިމި އެތައް ހަފްތާއެއް ވޭތުވެދިޔަ ފަހުންވެސް ކުންޏާއި މިފަދަ ތަކެތި މާލެ އެކި ހިސާބުތަކުގައި ހުރުމުން އެނގިގެންދަނީ ކަނޑައެޅިގެން މިނިސްޓަރު ޒިންމާ އަދާ ކުރުމުގައި އިހުމާލުވެފައިވާކަން ކަމުގައިވެސް އެމްޑީޕީން ބުނެފައިވެ އެވެ.

"މިނިސްޓްރީ ހިންގުމާއި ރައްޔިތުންނަށް ފޯރުކޮށްދޭން ޖެހޭ ޚިދުމަތްތައް ދިނުމުގައި މިިނިސްޓްރީ އޮފް ހައުސިން އެންޑް އިންފްރާސްޓަރަކްޗ ނުކުޅެދި ބޮއްސުންލައި ގޮސް ރައްޔިތުންގެ ފުރާނައަށް ނުރައްކާވާހިސާބަށް ކަންކަން ދިއުމުން މިނިސްޓަރ މުޢިއްޒު މަޤާމުން އިސްތިއުފާ ދެއްވުމަށް މި ޕާޓީން ގޮވާލަމެވެ." އެމްޑީޕީގެ ބަޔާނުގައި ބުނެފައިވެ އެވެ.