އޮންދިގޯ ބަށިމުބާރާތުގެ ގުރުއަތުލުން އޯގަސްޓް ބާވީސްވަނަ ދުވަހުގެރޭ ބާއްވަނީ

އަައްޑޫ އަންހެނުންނަށް ޚާއްސަ ކޮށްގެން ބާއްވާ އޮންދިގޯ ފުރަތަމަ ބަށިމުބާރާތުގެ ގުރުއަތުލުން މިމަހު ބާވީސް ވަނަ ދުވަހުގެރޭ ބާއްވާ ގޮތަށް ހަމަޖައްސައިފިއެވެ.

ބައިލައްކަ ރުފިޔާއަށްވުރެ އަގުބޮޑު މި މުބާރާތް އިންތިޒާމްކުރާ އައްޑޫ ވިމެންސް ޑިވެލޮޕްމެންޓް އިނިޝިއޭޓިވް (އައުޑީ) ގެ ރައީސާ ފާތިމަތު ހަނީފާ ވިދާޅުވީ މުބާރާތުގައި ވާދަކުރާ 10 ޓީމުގެ މެދުގައި ގުރުއަތުލުން އޮންނާނީ އެދުހުގެރޭ 8.30 ގައި އައްޑޫ ސިޓީ ހިތަދޫގައި ހުންނަ އޮންދިގޯ ވިލާގައި ކަމަށެވެ.މިމުބާރާތުގެ ޗެމްޕިއަން ޓީމަށް ފަސްދޮޅަސް ފަސްހާސް ރުފިޔާވަނީ ހުށަހަޅާފައެވެ. އޭގެ ތެރެއިން ފަންސަތިރީސް ހާސް ރުފިޔާ ދެއްވަނީ އޮންދިގޯއިންނެވެ. އަނެއް ތިރީސްހާސް ރުފިޔާއަކީ ފަސްޓް ލޭޑީ ފާތިމަތު އިބްރާހީމް ދެއްވާ ފައިސާ ކަމަށް އައުޑީގެ ރައީސާ ވިދާޅުވިއެވެ.

އޮންދިގޯއިން ވަނީ މުބާރާތުގެ ދެވަނަ ޓީމަށް ފަންސަވީސް ހާސް ރުފިޔާގެ އިނާމެއް ހުށަހަޅާފައެވެ. ތިންވަނަ ޓީމަށް ހުށަހަޅާފައިވަނީ ފަނަރަ ހާސްރުފިޔާއެވެ.

މިމުބާރާތުގެ ބަށި ރާނީއަށް ތިންހާސް ރުފިޔާވަނީ ހުށަހަޅާފައެވެ. އެންމެ މޮޅު ޖެހުންތެރިޔާއާއި ހިފުން ތެރިޔާއަށް ހުށަހަޅާފައިވަނީ ދެހާސް ރުފިޔާ ކަމަށް ފާތިމަތު ވިދާޅުވިއެވެ.

މިމުބާރާތް އޮންނާނީ އޮގަސްޓް މަހު 30އިން ސެޕްޓެމްބަރ 4 އަށެވެ. މުބާރާތް ކުރިއަށްދާނީ ހިތަދޫގައި ހުންނަ ދިރާގު އޮފީސް ކުރިމަތީގައި އޮންނަ ހުސްބިމުގައެވެ.