އަައްޑޫ އަންހެނުންނަށް މަަސައްކަތްތެރިކަން ދަސްކޮށްދޭން ހިންގި ކޯސް ނިމިއްޖެ

އައްޑޫ ސިޓީގެ އަންހެނުންނަށް މަސައްކަތްތެރިކަން ދަސްކޮށް ދިނުމަށް އައްޑޫ ސިޓީ ކައުންސިލާއި، އައްޑޫ އަންހެނުންގެ ތަރައްގީއަށް މަސައްކަތްކުރާ ކޮމިޓީ ގުޅިގެން ހިންގި ކޯސް ނިމި ބައިވެރިންނަށް ހަނދާނީ ލިޔުން މިރޭ ދީފިއެވެ.

މިރޭ 8.30 ގައި އައްޑޫ ސިޓީކައުންސިލް އިދާރާގެ ހޯލުގައި ބޭއްވި ރަސްމިއްޔާތުގައި ބައިވެރިންނަށް ހަނދާނީ ލިޔުން ހަވާލު ކޮށްދެއްވީ ޑެޕިޔުޓީ މޭޔަރ ޢަބްދުﷲ ތައްޔިބެވެ.

ބައިވެރިންނަށް ހަނދާނީ ލިޔުން ޙަވާލުކޮށް ދެއްވުމަށްފަހު ތައްޔިބު ދެއްކެވި ވާހަކަފުޅުގައި ވިދާޅުވީ އަންހެނުންގެ ތަރައްގީއަށްޓަކައި ކުރާ މިފަދަ މަސައްކަތްތަކަށް ސިޓީ ކައުންސިލުން އަބަދުވެސް އެހީތެރި ވެދެއްވާނެ ކަމަށެވެ.

މި ކޯހުގެ ބައިވެރިން ތައްޔާރުކޮށްފައިވާ ތަކެއްޗަށް ބަލާއިރި އައްޑޫ އަންހެނުންނަކީވެސް އަތްތެރި މަސައްކަތުގެ ހުނަރުހުރި ބައެއްކަން ވަރަށް ރަނގަޅަށް އެނގިގެން ހިނގައްޖެ ކަމަށްވެސް ތައްޔިބު ވިދާޅުވިއެވެ. އޭނާ ވިދާޅުވީ އެތަކެތި ބޭނުންކޮށްގެން، ހަނދާނީ ހަދިޔާ ވިއްކާ ފިހާރައެއްވެސް އައްޑޫގައި ހެދުމުގެ ފުރުސަތު އެބައޮތް ކަމަށެވެ. އެސާމާނަކީ ދިވެހި މާހައުލާ ގުޅޭ ސީދާ ދިވެހިން ތައްޔާރު ކޮށްފައިވާ ތަކެއްޗަށް ވުމުން ފަތުރުވެރިންގެ މެދުގައިވެސް މަގުބޫލު އެއްޗަކަށްވާނެ ކަމަށް ވިދާޅުވިއެވެ. މިރަސްމިއްޔާތަށްފަހު ޑެޕިޔުޓީ މޭޔަރ ތައްޔިބުވަނީ ބައިވެރިންގެ އުފެއްދުންތައް ބައްލަވާ ލައްވާފައެވެ. އެސާމާނު ބެއްލެވުމަށްފަހު ތައްޔިބުވަނީ ބައިވެރިންގެ ހުނަރާއި އުފެއްދުންތެރި ކަމަށް ތަޢުރީފް ކުރައްވައި ވާހަކަފުޅު ދައްކަވާފައެވެ.

ކޯހުގައި ކިޔަވައިދެއްވި މުދައްރިސް މުޙައްމަދު ޝިޔާމްވެސް މިރޭގެ ރަސްމިއްޔާތުގައި ވާހަކަ ދެއްކެވިއެވެ. ޝިޔާމް ވިދާޅުވީ އައްޑޫ އަންހެނުންގެ ކުރިއެރުމަށް މިފަދަ މަސައްކަތެއް ދަސްކޮށްދެއްވުމުގެ ފުރުސަތު ލިބިވަޑައިގެންނެވީތީ އުފާ ކުރައްވާ ކަމަށެވެ. އޭނާގެ ޚާއްސަ ހަދިޔާއެއްގެ ގޮތުގައި މީގެ އެޑްވާންސް ކޯހެެއް އައްޑޫ އަންހެނުންނަށް ހިންގައި ދެއްވާނެ ކަމަށްވެސް ވިދާޅުވިއެވެ. އިތުރަށް މިފަދަ މަސައްކަތް ހިލޭސާބަހަށް ދަސްކޮށް ދެއްވުމަށް ތައްޔާރަށް ހުންނެވި ކަމަށްވެސް ވިދާޅުވިއެވެ. ހިލޭ ސާބަހަށް މިމަސައްކަތް ދަސްކޮށް ދެއްވުމަކީ އައްޑޫ އަންހެނުންނަށް އޭނާގެ ފަރާތުން ދެއްވި ބޮޑު ހަދިޔާއެއް ކަމަށްވެސް ވިދާޅުވިއެވެ.

މިރަސްމިއްޔާތުގައި ވާހަކަ ދައްކަވަމުން އައްޑޫ ތަރައްގީއަށް މަސައްކަތްކުރާ ކޮމިޓީގެ ރައީސާ ފާތިމަތު ހަނީފާ ވިދާޅުވީ މިއީ އެކޮމިޓީގެ މަސައްކަތުން އައްޑޫ އަންހެނުންގެ ތަރައްގީއަށް ކޮށްދެވުނު ވަރަށް ބޮޑު ކަމެއް ކަމަށެވެ. މިމަސައްކަތް ދަސްކޮށްގެން އާމްދަނީ ލިބޭގޮތަށް އަންހެނުންނަށް މިމަސައްކަތް ކުރެވޭނެ ކަމަށްވެސް ވިދާޅުވިއެވެ. މިއީ ކާމިޔާބު ފެށުމެއް ކަމަށް ބަލައިގެން ކުރިއަށްއޮތް ތަނުގައި މިފަދަ ހަރަކާތްތައް ހިންގުމަކީ ބޭނުންތެރި ކަމެއް ކަމަށްވެސް ވިދާޅުވިއެވެ.

ފާތުމަތު ހަނީފާ ވިދާޅުވީ މިރޭގެ ރަސްމިއްޔާތަށް އައުމަށް އައްޑުއަތޮޅުގެ ރިސޯޓުތަކަށާއި، ސްވެނިއަރ ޝޮޕްތަކާއި އަދިވެސް އެފަދަ ފަރާތްތަކަށް ދަޢުވަތު ދެއްވި ކަމަށެވެ. އެހެން ނަމަވެސް އެއްވެސް ފަރާތަކުން އައިސްފައިނުވާތީ ހިތާމަ ކުރާ ކަމަށް ވިދާޅުވިއެވެ.

އޭނާ ވިދާޅުވީ "އަންހެނުންގެ މިއުފެއްދުންތަކަށް ސަބާ މޯލްޑިވްސް މެދުވެރިކޮށް އިރާދަ ކުރެއްވިއްޔާ މާކެޓްވެސް ލިބޭނެ. ރަނގަޅު އަގުގައި ވިއްކާވެސް ލެވޭނެ" ކަމަށެވެ. މި އުފެއްދުންތަކުގެ ސާމްޕަލް މާދަމާ ސަބާ މޯލްޑިވްސްއަށް ފޮނުވާނެ ކަމަށްވެސް އޭނާ ވިދާޅުވިއެވެ. މިރޭގެ ރަސްމިއްޔާތުގައި އޭނާވަނީ އައްޑޫ ސިޓީކައުންސިލަށާއި ކޯހުގެ މުދައްރިސް ޝިޔާމަށް ވަރަށް ޚާއްސަ ޝުކުރެއް ދަންނަވާފައެވެ.

އޯގަސްޓްމަހު 4 ވަނަ ދުވަހު ފެށި މިކޯހުގައި އައްޑޫގެ އެކި ރަށްރަށުން 53 މީހުން ބައިވެރިވެފައިވެއެވެ.