ނަރުދޫއިން ޑެންގޫ ކޮންޓްރޯލް ކުރުމުގެ މަސައްކަތް ފުނަދޫ ފުޓުބޯޅަ ޓީމުން ކޮށްފި
12 އޯގަސްޓް 2015 22:55
ށ. އަތޮޅު ނަރުދޫގައި ޑެންގޫ ފެތުރެމުންދާތީ އެރަށުން އެބަލި ކޮންޓްރޯލް ކުރުމުގެ މަސައްކަތް ށ. ފުނަދޫ ފުޓުބޯޅަ ޓީމުން މިއަދު ކޮށްފިއެވެ.
ށ. އަތޮޅު ހޮސްޕިޓަލުން މަޢުލޫމާތު ދިން ގޮތުގައި މިއީ މިނިވަން 50 ގެ ކުޅިވަރު މުބާރާތުގައި ބައިވެރިވި ފުނަދޫ ފުޓުބޯޅަ ޓީމުން ރާވާފައިވާ އިޖުތިމާޢީ ޙަރަކާތުގެ ތެރޭގައި ހިމަނައިގެން ކުރިއަށް ގެންދިޔަ ޙަރަކާތެކެވެ.
އެޓީމު މިއަދު ނަރުދުއަށް ގޮސް ހުރިހާ ގޭގެއަށްވަނީ ޒިޔާރަތްކޮށްފައެވެ. ދިހަ ގުރޫޕަށް ޓީމް ބަހައިގެން ކުރިއަށް ގެންދިޔަ މިހަރަކާތުގައި މަދިރި އާލާވާ ތަންތަން ނައްތާލާފައިވާ ކަމަށް ހޮސްޕިޓަލުން މަޢުލޫމާތު ދިނެއެވެ.
"މިއީ ފުޓުބޯޅަ ޓީމަކުން އިސްނަގައިގެން އިޖުތިމާޢީ މިފަދަ ހަރަކާތެއް ބޭއްވި ފުރަތަމަ ފަހަރު ކަމަށް ވެދާނެ. ފުޓުބޯޅަ ޓީމަކުން މިފަދަ ކަމެއް ކޮށްދިނީތީ ފުނަދޫ ފުޓުބޯޅަޓީމަށް ޝުކުރު އަދާކުރަން" ހޮސްޕިޓަލުގެ އިސްބޭފުޅަކު ވިދާޅުވިއެވެ.ނަރުދޫއިން މިހާތަނަށް ޑެންގޫގެ 25 ކޭސް ރިޕޯޓު ކޮށްފައިވާ ކަމަށްވެސް ހޮސްޕިޓަލުން މަޢުލޫމާތު ދިނެއެވެ.
ފުނަދޫ ފުޓުބޯޅަ ޓީމުން އިސްނަގައިގެން މިއަދު ބޭއްވި މިހަރަކާތުގައި ފުލުހުންނާއި، އަތޮޅު ކައުންސިލާއި، ހޮސްޕިޓަލުންވެސްވަނީ ބައިވެރިވެފައެވެ.
ކިޔުންތެރިންގެ ހިޔާލު