އިތުބާރު ނެތްކަމަށް ބޮޑު އަޣުލަބިއްޔަތަކުން ފާސްކޮށް ޖަމީލް ނާއިބުރައީސްކަމުން ވަކިކޮށްފި

އިތުބާރު ނެތްކަމަށް ރައްޔިތުންގެ މަޖިލީހުން ފާސްކޮށް ނައިބުރައީސްކަމުގެ މަގާމުން ޑރ. މުޙައްމަދު ޖަމީލް އަޙުމަދު ވަކިކޮށްފި އެވެ.

އިތުބާރު ނެތްކަމަށް ރައްޔިތުންގެ މަޖިލީހުން ފާސްކޮށް ނައިބުރައީސްކަމުގެ މަގާމުން ޑރ. މުޙައްމަދު ޖަމީލް އަޙުމަދު ވަކިކޮށްފި އެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި ޑރ.ޖަމީލްގެ މައްޗަށް އިތުބާރު ނެތްކަމަށް ފާސްކޮށްފައިވަނީ، އެކަމާބެހޭގޮތުން ހުށަހެޅި ގަރާރު ފާސްކުރުމަށް ވޯޓު ދެއްވި 78 މެންބަރުންގެ ބޮޑު އަޣުލަބިއްޔަތަކުންނެވެ. ޖަމީލަށް އިތުބާރު ނެތްކަމަށް ފާސް ނުކުރުމަށް ނުވަތަ އެ ގަރާރު ފާސްކުރަން ނުފެންނަ ކަމަށް ދެ މެންބަރުން ވޯޓު ދެއްވި އެވެ. އެއީ ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު އަހުމަދު މަހުލޫފް އާއި ނޮޅިވަރަމު ދާއިރާގެ މެންބަރު ހުސެއިން އަރީފެވެ.

ޑރ.ޖަމީލުގެ މައްޗަށް އިތުބާރު ނެތްކަމަށް ރައްޔިތުންގެ މަޖިލީހުން ފާސްކުރަން ބޭނުންވަނީ މަޖިލީހުގެ މެންބަރުންގެ ތިންބައިކުޅަ ދެބައި މެންބަރުންގެ ވޯޓެވެ. އެއީ މަޖިލީހުގައި ތިއްބެވި 85 މެންބަރުންގެ ތެރެއިން 57 މެންބަރުންގެ ވޯޓެވެ.

ޑރ.ޖަމީލުގެ މައްޗަށް އިތުބާރުނެތްކަމަށް ހުށަހަޅާފައިވަނީ، އިދިކޮޅު ފަރާތްތަކާ ގުޅިގެން ރައީސް ޔާމީންގެ ވެރިކަން ނިމުމަކަށް ގެނަސް ރައީސްކަމަށް އަރާ ވަޑައިގެންނެވުމަށް މަސައކަތް ކުރެއްވުމާއި، އިދިކޮޅު ފަރާތްތަކުން ރައީސް ޔާމީންގެ ސަރުކާރާ ދެކޮޅަށް މަގުމައްޗަށް ނިކުތުމުން ސަރުކާރު ދިފާއު ކުރެއްވުމަށް މަސައްކަތް ނުކުރެއްވުމާއި ނާއިބުރައީސްގެ ޒިންމާ ތަކުގެ ތެރެއިން ރައީސުލް ޖުމްހޫރިއްޔާ ހަވާލު ކުރެއްވި މަސައްކަތްތައް ނުކުރެއްވިގެން ކަމަށް ތުހުމަތުކޮށްގެންނެވެ.

މި މައްސަލައަށް ރައްޔިތުންގެ މަޖިލީހުގައި މިއަދު ކުރިއަށްގެންދިޔަ ބަހުސްގައި އިދިކޮޅު މެންބަރުންނާއި ސަރުކާރަށް ނިސްބަތްވެ ވަޑައިގަންނަވާ ގިނަ މެންބަރުންތަކެއް ވަނީ ޑރ.ޖަމީލަކީ ނާއިބު ރައީސްކަމުގެ މަގާމުގައި ބަހައްޓަން އެކަށީގެންވާ ބޭފުޅެއްނޫން ކަމަށާއި އެއީ ހިޔާނާތްތެރިއެއް ކަމަށް ސިފަ ކުރައްވައި ވާހަކަ ދައްކަވައިފަ އެވެ.