ޙުސައިން ޝިޢާރުގެ މަރުގެ މައްސަލާގައި 4 މީހަކު ހައްޔަރުކޮށްފި

މިއަހަރުގެ ޖޫންމަހުގެ 15 ވަނަ ދުވަހުގެ ވަގުތެއްގައި ސ. ހިތަދޫ، އަޠީނާ ގޭގެ ކުރިމަތީގައި ގްރޫޕަކުން ހިންގި މާރާމާރީއެއްގައި ލިބުނު ޒަޚަމްތަކަށް ސ. ހިތަދޫ ރީޖަނަލް ހޮސްޕިޓަލްގައި ފަރުވާދެމުންދަނިކޮށް މަރުވި، ސ. ހިތަދޫ، އަޠީނާ، ޙުސައިން ޝިޢާރުގެ މަރުގެ މައްސަލާގައި 4 މީހަކު ހައްޔަރުކޮށްފިއެވެ.

މިއަހަރުގެ ޖޫންމަހުގެ 15 ވަނަ ދުވަހުގެ ވަގުތެއްގައި ސ. ހިތަދޫ، އަޠީނާ ގޭގެ ކުރިމަތީގައި ގްރޫޕަކުން ހިންގި މާރާމާރީއެއްގައި ލިބުނު ޒަޚަމްތަކަށް ސ. ހިތަދޫ ރީޖަނަލް ހޮސްޕިޓަލްގައި ފަރުވާދެމުންދަނިކޮށް މަރުވި، ސ. ހިތަދޫ، އަޠީނާ، ޙުސައިން ޝިޢާރުގެ މަރުގެ މައްސަލާގައި 4 މީހަކު ހައްޔަރުކޮށްފިއެވެ.

ފުލުހުން ބުނީ މި މައްސަލައާ ގުޅިގެން ކޯޓު އަމުރެއްގެ ދަށުން ހައްޔަރުކޮށްފައިވަނީ 24 އަހަރުގެ ފިރިހެނަކާއި 22 އަހަރުގެ ފިރިހެނެއްގެ އިތުރުން 20 އަހަރުގެ 2 ފިރިހެނުންކަމަށެވެ. މި އެންމެންނަކީވެސް ދިވެހިންނެވެ.

އެމީހުންގެ ތެރެއިން 24 އަހަރުގެ މީހާއާއި 20 އަހަރުގެ އެކަކު ހައްޔަރުކޮށްފައިވަނީ 2015 ޖުލައި 13 ވަނަ ދުވަހުގެ ވަގުތެއްގައެވެ.

ފުލުހުން ބުނީ މި ދެ މީހުންގެ ބަންދާމެދު ގޮތެއް ނިންމުމަށް ސ. ހިތަދޫ މެޖިސްޓްރޭޓް ކޯޓަށް ޙާޟިރުކުރުމުން، މިނިސްޓްރީ އޮފް ހޯމް އެެފެއާޒުން ކަނޑައަޅާ ތަނެއްގައި ބަންދުގައި ބަހައްޓައިގެން ތަޙުޤީޤު ކުރިއަށް ގެންދިއުމަށް 2015 ޖުލައި 14 ވަނަ ދުވަހު ވަނީ 15 ދުވަހުގެ ބަންދުގެ މުއްދަތެއް ދީފައިވާ ކަމަށެވެ.

މި މައްސަލާގައި ހައްޔަރުކޮށްފައިވާ އިތުރު ދެ މީހުން ހައްޔަރުކޮށްފައިވަނީ އިއްޔެގެ ވަގުތެއްގައެވެ.

މި މައްސަލާގައި ހައްޔަރުކޮށްފައިވާ އެންމެންނަކީވެސް ޖިނާޢީ ތަފާތު ކުށްތަކުގެ ގިނަ ޢަދަދެއްގެ ރެކޯޑް އޮންނަ މީހުންކަމަށް ފުލުން ވަނީ ބުނެފަ އެވެ.

ޝިޔާރުގެ މަރުގެ މައްސަލަ ތަޙުޤީޤު ކުރަމުން ދަނީ މި ހާދިސާ ހިނގުމާއެކު 2015 ޖޫން 16 ވަނަ ދުވަހު މާލެއިން އައްޑޫ ސިޓީއަށް ދިޔަ ފުލުހުންގެ ސީރިއަސް އެންޑް އޯގަނައިޒްޑް ކްރައިމް ޑިޕާޓްމަންޓްގެ ޚާއްޞަ ތަޙުޤީޤު ޓީމަކުންނެވެ. މި ޓީމް އަދިވެސް ހަރަކާތްތެރިވަމުން ދަނީ އައްޑޫ ސިޓީގައެވެ.