ޤާނޫނުލްޢުޤޫބާތުގައި އެކަށީގެންވާ އަދަބު ކަނޑައެޅިގެންދިއުމާއި ދިފާޢުގެ ފުރުޞަތު ބޮޑުވުމަކީ ހެޔޮ ބަދަލެއް: ސީޕީ

މިއަދު ރާއްޖޭގައި ޢަމަލުކުރަންފެށި އާ ޤާނޫނުލްޢުޤޫބާތުގައި ކުށަށް އެކަށީގެންވާ އަދަބު ކަނޑައެޅިގެންދިއުމާއި ދިފާޢުވުމުގެ ފުރުޞަތު ބޮޑުވެގެން ދިއުމަކީ އެދެވޭ ހެޔޮ ބަދަލެއް ކަމަށް ކޮމިޝަނަރ އޮފް ޕޮލިސް ހަސަން ވަހީދު ވިދާޅުވެއްޖެ އެވެ.

މިއަދު ރާއްޖޭގައި ޢަމަލުކުރަންފެށި އާ ޤާނޫނުލްޢުޤޫބާތުގައި ކުށަށް އެކަށީގެންވާ އަދަބު ކަނޑައެޅިގެންދިއުމާއި ދިފާޢުވުމުގެ ފުރުޞަތު ބޮޑުވެގެން ދިއުމަކީ އެދެވޭ ހެޔޮ ބަދަލެއް ކަމަށް ކޮމިޝަނަރ އޮފް ޕޮލިސް ހަސަން ވަހީދު ވިދާޅުވެއްޖެ އެވެ.

އާ ގާނޫނުލް އުގޫބާތަށް އަމަލު ކުރަން ފެށުމާ ގުޅިގެން ޕީސީ ވިދާޅުވީ، ގާނޫނުލް އުގޫބާތަކީ ރައްޔިތުންނަށް ހިތްހަމަޖެހުމާއި އުފާވެރިކަން ގެނުވައިދޭނެ ޤާނޫނަކަށް ވާނެކަމަށް ޤަބޫލު ކުރެވޭ ކަމަށެވެ.

"ސަބަބަކީ މިއަދު ޢަމަލުކުރަން ފަށާ ޤާނޫނުލްޢުޤޫބާތުގެ ސަބަބުން މައްސަލަތަކުގެ ތަޙުޤީޤު މަރުޙަލާ އަވަސްވެ ޕްރޮސެކިއުޓް ކުރުމުގެ މަރުޙަލާ އާއި ޝަރުޢީ މަރުޙަލާވެސް އަވަސްވުމަށް މި ޤާނޫނުން ބޮޑެތި ފުރުޞަތުތަކެއް ލިބިދީފައިވުން. ހަމަ އެއާއެކު ކަނޑައެޅިފައިވާ ވަކި މުއްދަތެއްގެ ތެރޭގައި މައްސަލަތަކުގެ ޝަރީޢަތް ކުރިޔަށް ނުގެންދެވި ޙުކުމެއް ނައިސް ދުވަސްތަކެއް ފާއިތުވުމަށްފަހު އެމައްސަލަތައް ފެންމަތިވެ ޙުކުމަކާ ހަމައަށް ދިއުމަށް އޮތް ފުރުޞަތު މި ޤާނޫނުގެ ދަށުން ނެތިގެންދިއުމަކީވެސް ލިބިގެންދާނެ ހިތްހަމަޖެހުމެއް،" ޕީސީ ވިދާޅުވި އެވެ.

ސީޕީ އިތުރަށް ވިދާޅުވީ، ރާއްޖޭގައި ކުށުގެ ވެށި ބޮޑުވަމުންދާއިރު އަލަށް ޢަމަލުކުރަން ފެށި މިޤާނޫނާއެކު ކުށުގެ ވެއްޓަށް އެދެވޭ ހެޔޮ ބަދަލުތަކެއް އައިސް ކުށުގެ މާޙައުލުގައި އުޅޭ ޒުވާނުންނާއި ފުރާވަރުގެ ކުދިންނާއި އެހެނިހެން ޢުމުރުގެ މީހުންވެސް ކުށުން ދުރުވެ ޒިންމާދާރު ރައްވެއްސެއްގެ ގޮތުގައި ދެމިހުރުމަށް ރަނގަޅު ފުރުޞަތުތަކެއް ލިބިގެންދާނެ ކަމަށެވެ.

"ޤާނޫނުލްޢުޤޫބާތަށް މިއަދު ޢަމަލުކުރަން ފެށިއިރު އެކަމަށްޓަކައި ފުލުހުން ވާންޖެހޭ ތައްޔާރީތައް އެންމެ ފުރިހަމަ ގޮތުގައި މިވަނީ ވެވިފަ. ޤާނޫނަށް ހިޖުރަކުރާއިރު ބޭނުންވާ ތަމްރީނުތައް ފުލުހުންނަށް މިވަނީ ދެވިފައެވެ. އެކިއެކި މައްސަލަތަކުގައި ފުލުހުންގެ ހައްޔަރަށް ގެނެވޭ މީހުންނާމެދު މިޤާނޫނާ އެއްގޮތަށް ޢަމަލުކުރުމަށް ބޭނުންވާ ކަންކަން ފުލުހުންގެ މުއައްސަސާގައި ވަނީ ޤާއިމް ކުރެވިފަ. މިއީވެސް މި ޤާނޫނުގެ ސަބަބުން ރައްޔިތުންނަށް ހިތްހަމަޖެހުން ގެނުވައިދޭނެ ކަމެއްކަމަށް ޤަބޫލު ކުރަން. ރާއްޖޭގައި ހިނގާ ޖިނާޢީ ކުށްތައް ބަލައި ތަޙުޤީޤު ކުރުމުގެ އެންމެ އިސްދައުރެއް އަދާކުރާ ފަރާތްތައް މިކަމަށް ވާންޖެހޭ ތައްޔާރީތައް ވުން. މީގެ އިތުރުން މިކަމާ ގުޅުންހުރި މުއައްސަސާތަކާއެކު ޤާއިމް ކުރަންޖެހޭ ގުޅުންތައް ޤާއިމްކުރެވި ނަތީޖާ ޙާޞިލްކުރުމަށް ކުރަންޖެހޭ ތައްޔާރީތައް ފުލުހުން ވަނީ ވެފަ،" ސީޕީ ވިދާޅުވި އެވެ.

ސީޕީ ވަހީދު ވިދާޅުވީ އާ ޤާނޫނުލްޢުޤޫބާތަކީ އެތައް ދުވަހެއްގެ ބުރަ މަސައްކަތާއެކު ވުޖޫދުވި ޤާނޫނަކަށްވީއިރު މިޤާނޫނުން ރައްޔިތުންނަށް ލިބިދޭންޖެހޭ ހިތްހަމަޖެހުމާއި ފޮނި މީރުކަން ހޯދައިދީ ރާއްޖޭގައި ޖިނާޢީ ޢަދުލުގެ ނިޒާމު ހަރުދަނާކޮށް، ކުށުގެ ނުރައްކަލުން ޤައުމު ސަލާމަތް ކުރުމަށް ތަޙުޤީޤީ އިދާރާ ތަކަށާއި ޕްރޮސެކިއުޓަރުންނަށާއި ޝަރުޢީ ދާއިރާއަށް ފުރިހަމަ އެއްބާރުލުމެއް ދިނުމަކީ މުހިއްމު ކަމެއް ކަމަށެވެ. އަދި ދައުލަތުގެ ހުރިހާ މުއައްސަސާތަކާ މަދަނީ ޖަމްޢިއްޔާތަކާ ޖަމާޢަތްތަކާ ރައްޔިތުން ގުޅިގެން ކުރެވޭ އިޚްލާޞްތެރި މަސައްކަތުން ރައްޔިތުންނަށް އުފާވެރިކަމާއި ހިތްހަމަޖެހުން ލިބިގެންދާނެ ކަމީ ޝައްކެއް އޮތްކަމެއް ނޫންކަމަށްވެސް ވިދާޅުވި އެވެ.