ނައިބު ރައީސް ކަމަށް އަދީބު ގެންނަން ނުފެންނަކަމަކަށް ނުބުނަން: މައުމޫނު

ނައިބު ރައީސް ކަމުގެ މަގާމަށް ޓޫރިޒަމް މިނިސްޓަރު އަހުމަދު އަދީބު ހަމަޖެއްސެވުމަށް ފެނިވަޑައިނުގަންނަވާ ކަމަށް ރައީސް އަބުދުﷲ ޔާމީނަށް ދަންނަވާފައި ނުވާނެ ކަމަށް ކުރީގެ ރައީސް އަދި ޕީޕީއެމްގެ ރައީސް މައުމޫނު އަބުދުލް ގައްޔޫމު ވިދާޅުވެއްޖެ އެވެ.

ނައިބު ރައީސް ކަމުގެ މަގާމަށް ޓޫރިޒަމް މިނިސްޓަރު އަހުމަދު އަދީބު ހަމަޖެއްސެވުމަށް ފެނިވަޑައިނުގަންނަވާ ކަމަށް ރައީސް އަބުދުﷲ ޔާމީނަށް ދަންނަވާފައި ނުވާނެ ކަމަށް ކުރީގެ ރައީސް އަދި ޕީޕީއެމްގެ ރައީސް މައުމޫނު އަބުދުލް ގައްޔޫމު ވިދާޅުވެއްޖެ އެވެ.

ރައީސް މައުމޫން މިއަދު ކުރެއްވި ޓްވީޓެއްގައި ވިދާޅުވެފައިވަނީ “ޤާނޫނު އަސާސީގެ 122 ވަނަ މާއްދާ ބުނާގޮތުން، އެކަމަކީ ހަމައެކަނި ރައީސަށް އޮތް އިހުތިޔާރެއް ކަމަށާއި އެހެން މީހަކު އެއްޗެއް ބުނުމުގެ ޖާގައެއް ނެތް” ކަމަށެވެ.

މި ޓްވީޓްގެ އިތުރުން މިކަމާއި ގުޅޭ އިތުރު ޓްވީޓެއްވެސް މައުމޫން ވަނީ ކުރައްވާފަ އެވެ. އެ ޓްވީޓްގައި މައުމޫން ވިދާޅުވެފައިވަނީ އެއްވެސް ބޭފުޅަކަށް ނައިބު ރައީސްކަން ދެއްވުން އެދި ނުވަތަ ނުދެއްވުން އެދި ރައީސަށް އެސްއެމްއެސް ކޮށްފައި ނުވާނެ ކަމަށެވެ.

ރައީސް މައުމޫނު މިހެން ވިދާޅުވެފައި މިވަނީ، ނާއިބު ރައީސްކަމުގެ މަގާމުން ޑރ.މުހައްމަދު ޖަމީލު އަހުމަދު ވަކި ކުރުމަށްފަހު އެމަގާމަށް ޓޫރިޒަމް މިނިސްޓަރު އަހުމަދު އަދީބު ގެނައުމަށް ފެނިވަޑައިނުގަންނަވާކަމަށް އެސްއެމްއެސްއަކުން ރައީސް މައުމޫނު ރައީސް ޔާމީނަށް ދަންނަވާފައިވާކަމަށް، ބުނެ ހަވީރު ނޫހުން ފަތުރާފައިވާ ހަބަރަކާ ގުޅިގެން އޮމާންގައި ހުންނަވައެވެ.

އެކަމާބެހޭގޮތުން ބައެއް މީޑިޔާތަކަށް ރައީސް މައުމޫނު މިއަދު ވިދާޅުވެފައިވަނީ، ނާއިބު ރައީސްކަމަށް އަދީބު ހަމަޖެއްސެވުމަށް ފެނިވަޑައިނުގަންނަވާކަމަށް ވިދާޅުވިކަމަށް ދައްކާ ވާހަކަ ތަކަކީ ހަގީގަތެއްނޫން ކަމަށެވެ.

"އެއްވެސް ބޭފުޅަކު ނާއިބު ރައީސަކަށް ގެންނަވަން، ނުވަތަ ނުގެންނަވަން އެދި އަޅުގަނޑު ރައީސް އަށް އެސްއެމްއެސްއެއް ފޮނުވާފައެއް ނޯންނާނެ،" ކަމަށް މީޑިޔާތަކަށް ރައީސް މައުމޫނު މިއަދުވެސް ވަނީ ތަކުރާރު ކުރައްވައިފަ އެވެ.

ނާއިބުރައީސްކަމަށް އަދީބު ގެންނަން ފެނިވަޑައިނުގަންނަވާކަމަށް ރައީސް މައުމޫނު ރައީސް ޔާމީނަށް ދަންނަވާފައިވާކަމަށް "ހަވީރު" ނޫހުން ހަބަރު ފަތުރާފައިވަނީ ޕީޕީއެމްގެ ޕާލަމެންޓްރީ ގްރޫޕުގެ އިސް މަގާމެއްގައި ހުންނެވި މެންބަރަކާ ހަވާލާދީގެންނެވެ. ނަމަވެސް އެ މެންބަރުގެ މައުލޫމާތެއް އެ ނޫހުން ހާމަކޮށްފައެއް ނުވެ އެވެ.

ނާއިބު ރައީސްކަމުގެ މަގާމަށް އަދީބު ގެނައުމަށްޓަކައި ޑރ. ޖަމީލު ނާއިބުރައީސްކަމުގެ މަގާމުން ވަކި ކުރުމަށްޓަކައި ޑރ.ޖަމީލުގެ މައްޗަށް ވަނީ އިތުބާރު ނެތްކަމުގެ މައްސަލަ މަޖިލީހަށް ހުށަހަޅައިފަ އެވެ. ނަމަވެސް އަދި އެ މައްސަލަ މަޖިލީހުގެ ތަޅުމުގައި ކުރިއަށްދާނެ ދުވަހެއް ނޭގޭކަމަށް މަޖިލީހުގެ އިދާރާއިން ވަނީ ބުނެފަ އެވެ.

ރައީސް ޔާމީންގެ މަންދޫބެއްގެ ހައިސިއްޔަތުން ރައީސް މައުމޫނު މިހާރު ވަޑައިގެން ހުންނެވީ އޮމާންގަ އެވެ.