ޖަވާބުދާރީވުމަށް ނައިބު ރައީސަށް އެރުވި ނޯޓިސްގެ މުއްދަތު މިއަދަށް ހަމަވެފައިވާއިރު މައްސަލަ އެޖެންޑާ ކުރާނެ ދުވަހެއް ނޭގެ

ނައިބު ރައީސްކަމުގެ މަގާމުން ވަކިކުރުމަށް ރައްޔިތުންގެ މަޖިލީހަށް ހުށަހަޅާފައިވާ މައްސަލައަށް ޖަވާބުދާރީ ވުމަށް ޑރ.މުހައްމަދު ޖަމީލު އަހުމަދަށް އަރުވާފައިވާ ނޯޓިސްގެ މުއްދަތު މިއަދަށް ހަމަވެފައިވާއިރު އެ މައްސަލަ މަޖިލީހުގައި އެޖެންޑާ ކުރާނެ ދުވަހެއް ނޭގެ އެވެ.

ނައިބު ރައީސްކަމުގެ މަގާމުން ވަކިކުރުމަށް ރައްޔިތުންގެ މަޖިލީހަށް ހުށަހަޅާފައިވާ މައްސަލައަށް ޖަވާބުދާރީ ވުމަށް ޑރ.މުހައްމަދު ޖަމީލު އަހުމަދަށް އަރުވާފައިވާ ނޯޓިސްގެ މުއްދަތު މިއަދަށް ހަމަވެފައިވާއިރު އެ މައްސަލަ މަޖިލީހުގައި އެޖެންޑާ ކުރާނެ ދުވަހެއް ނޭގެ އެވެ.

ރައްޔިތުންގެ މަޖިލީހުގެ އިދާރާއިން ބުނެފައިވަނީ އެ މައްސަލަ ރައްޔިތުންގެ މަޖިލީހުގެ އެޖެންޑާގައި ހިމަނާނެ ވަކި ދުވަހެއް އަދި ނިންމާފައި ނުވާ ކަމަށެވެ.

ވެރިކަން ހިންގާ ޕީޕީއެމްގެ ޕާލަމެންޓްރީ ގްރޫޕުން އިސްވެ އޮވެގެން އިދިކޮޅު ޕާޓީތަކުގެ ބައެއް މެންބަރުންނާއެކު 61 މެންބަރުންގެ ސޮޔާއެކު ނާއިބުރައީސް ޖަމީލުގެ އިތުބާރު ނެތްކަމުގެމައްސަލަ މަޖިލީހަށް ހުށަހަޅާފައިވާއިރު، ގާނޫނުއަސާސީގައި ބުނެފައިވަނީ، އެ މައްސަލައަށް ބަހުސް ކުރުމުގެ ކުރިން މައްސަލައަށް ޖަވާބުދާރީ ވުމަށް ނާއިބު ރައީސަށް 14 ދުވަހުގެ ނޯޓިސްއެއް އަރުވަން ޖެހޭނެ ކަމަށެވެ. މަޖިލީހުން އެ ނޯޓިސް އަރުވާފައިވާއިރު އެ މުއްދަތު މިއަދަށް ވަނީ ހަމަވެ ފަ އެވެ. އަދި އަނގަބަހުންނާއި ލިއުމުންނާއި ވަކީލަކު ބޭނުން ކުރައްވައިގެން އެ މައްސަލައަށް ޖަވާބުދާރީ ވުމުގެ ފުރުސަތުވެސް ގާނޫނު އަސާސީން ނާއިބު ރައީސަށް ލިބިދެ އެވެ. އެހެންކަމުން އެ މައްސަލައަށް ޖަވާބުދާރީވެ ވަޑައިގަންނަވާނީ ލިއުމުންކަމަށް ނާއިބު ރައީސް ވަނީ ނިންމަވައިފަ އެވެ.

ނާއިބު ރައީސަށް އިތުބާރު ނެތްކަމަށް ވިދާޅުވެ ރައީސް ޔާމީން ވަނީ ބޮޑެތި ތުހުމަތުތަކެއް ޑރ.ޖަމީލުގެ ބޮލުގައި އަޅުއްވައިފަ އެވެ. އޭގެ ތެރޭގައި ރައީސް ޔާމީންގެ ވެރިކަމާ ދެކޮޅަށް އިދިކޮޅު ފަރާތްތަކުން ކުރިއަށް ގެންދިޔަ ހަރަކާތްތަކުގައި ބައިވެރިވަޑައިގެންނެވި ކަމުގެ ތުހުމަތުތައް ހިމެނެ އެވެ.

ނައިބު ރައީސް މަގާމުން ވަކިކުރުމަށް ރައްޔިތުންގެ މަޖިލީހަށް ހުށަހަޅާފައިވާ ގަރާރު ފާސްވާނީ މަޖިލީހުގެ ޖުމްލަ މެމްބަރުންގެ ތިން ބައިކުޅަ ދެބައިގެ އަޣުލަބިއްޔަތުންނެވެ. އެއީ މަޖިލީހުގައި މިހާރު ތިއްބެވި 85 މެމްބަރުންގެ ތެރެއިން 57 މެމްބަރުންގެ ވޯތެވެ.