އައްޑޫ ސިޓީގެ ކުނި މިހާރުވަނީ މެނޭޖު ކުރެވިފައި-އެމްއާރުޑީސީ

އައްޑޫ ސިޓީގެ ކުނި މެނޭޖުކުރަން މޯލްޑިވްސް ރޯޑް ޑިވެލޮޕްމަންޓް ކޯޕަރޭޝަން (އެމްއާރުޑީސީ) އާ ހަވާލުކޮށް މަަސައްކަތް ފެށި ހިސާބުން ފެށިގެން އައްޑޫ ސިޓީގެ ކުނި މެނޭޖުވެފައިވާ ކަމަށް އެމްއާރުޑީސީން ބުނެފިއެވެ.

އައްޑޫސިޓީގެ އެމްއާރުޑީސީ ސައިޓް މެނޭޖަރ ޢަބްދުﷲ ރަޝީދު ވިދާޅުވީ އެކުންފުންޏާ މަސައްކަތް ހަވާލުކުރީ އެސިޓީގެ ގެތަކުން ކުނި އުކާނުލާތާ މަހެއްހާ ދުވަސް ފަހުން ކަމަށެވެ.

އެކުންފުންޏާ މަަސައްކަތް ހަވާލުކުރީ ޖޫންމަހުގެ 11 ވަނަ ދުވަހުއެވެ. މަސައްކަތް ފަށާފައިވަނީ ޖޫންމަހުގެ 15 ވަނަ ދުވަހުއެވެ. ފަށައިގަތްއިރު ދުވާލަކަށް 50 އަށްވުރެ ގިނަ ޓަނުގެ ކުނި އުކަންޖެހުނު ކަމަށް އޭނާ ވިދާޅުވިއެވެ. ނަމަވެސް އެސިޓީގެ ގުޅިފައިވާ ރަށްރަށުން މިހާރު އުކާލަން ޖެހެނީ އެވްރެޖުކޮށް ދުވާލަކަށް 28 ޓަނު ކުނި ކަމަށްވެސް ޢަބްދުﷲ ރަޝީދު ވިދާޅުވިއެވެ.

އެކުންފުނިން ކުނި މެނޭޖުކުރަނީ ހަމައެކަނި ގުޅިފައިވާ ރަށްރަށުގައެވެ. ހިތަދޫ ގެ ކުނި މެނޭޖު ކުރަމުން ގެންދަނީ އެރަށް 6 ބަޔަކަށް ބަހާލައިގެންނެވެ. ފޭދޫ، މަރަދޫ، މަރަދޫ ފޭދޫގެ ކުނި މެނޭޖުކުރަމުން ގެންދަނީ އެރަށްތައް 7 ބަޔަކަށް ބަހާލައިގެން ކަމަށްވެސް ޢަބްދުﷲ ރަޝީދު ވިދާޅުވިއެވެ.

އޭނާ ވިދާޅުވީ އެކުންފުނިން މަސައްކަތް ކުރަމުން ގެންދަނީ 24 ގަޑިއިރު އެވެ. "މިހާރު ކުނިކޮށްޓަށްވެސް އެއްވެސް ފީއެއް ނުދީ ކޮންމެ ގަޑިއަކުވެސް ވަދެވޭނެ. އެތަން މިހާރުވަނީ ދިއްލާފައި. ޑިއުޓީއަށް މީހުންވެސް ތިބޭނެ. އެހެން ކަމުން ކޮންމެ ބަޔަކަށްވެސް މިހާރު 24 ގަޑިއިރު ކުނި އުކާލެވޭނެ. ނަމަވެސް ރިސޯޓު ތަކުން ގެންނަ ކުންޏަށް އަގު ދައްކަންޖެހޭނެ. އެފައިސާ ދައްކަންޖެހޭނީ ސިޓީ ކައުންސިލަށް،" ޢަބްދުﷲ ރަޝީދު ވިދާޅުވިއެވެ.

އޭނާ ވިދާޅުވީ އެމްއާރުޑީސީން މަސައްކަތް ކުރަމުންދަނީ 5 ވެހިކަލް ބޭނުން ކޮށްގެން ކަމަށެވެ. އޭގެ ތެރެއިން 3 ވެހިކަލަކީ ކުއްޔަށް ނަގައިގެން އުޅޭ ވެހިކަލްތަކެވެ.

"އަޅުގަނޑުމެން ކުނިކޮށްޓަށް ވަންއިރު އެތަންވަނީ ފުރިގެން ގޮސް ދޮރު ނުލެއްޕޭ ވަރުވެފައި. ނަމަވެސް މިހާރު އެތަން ސާފުކޮށް ފަސްއަހަރު ދުވަހު ކުނި އެޅޭވަރަށް ޖާގައޮންނާނީ ހަދާފައި. އަދިވެސް މިދަނީ ކުނިކޮށި ސާފު ކުރަމުން" ޢަބްދުﷲ ރަޝީދު ވިދާޅުވިއެވެ.

އޭނާ ވިދާޅުވީ ކުނިބަލާ ދާއިރު ކުނިވާ ޒާތުގެ ކުނި ކޮތަޅަކަށް ލައިފައި ރަނގަޅަށް ބަންދު ކޮށްފައި ބެހެއްޓުމަކީ އެކުންފުނީގެ އެދުމެއް ކަމަށެވެ. އަދި ފަސޭހައިން ކުނިނެގޭނެ ގޮތަށް ކުނިތައް ބެހެއްޓުމަށްވެސް ޢަބްދުﷲ ރަޝީދު އެދިވަޑައިގެންނެވިއެވެ.

އައްޑޫސިޓީގެ ކުނި މެނޭޖުކުރަން އެމްއާރުޑީސީއާ ސަރުކާރުން ހަވާލުކުރީ ވަގުތީ ގޮތުންނެވެ. އެ މަސައްކަތް ހަވާލުކުރި ދުވަހު ތިމާވެއްޓާ ބެހޭ ވަޒީރު ވިދާޅުވީ ދެމަހެއްހާ ދުވަސްތެރޭގައި އައްޑޫ ކުނި މެނޭޖު ކުރުމަށް ޙައްލެއް ލިބޭނެ ކަމަށެވެ.

އެމްއާރުޑީސީއާ މަސައްކަތް ހަވާލުކޮށްފައިވަނީ 734،792.88 ރުފިޔާގެ އަގަކަށެވެ.