ނައިބު ރައީސަށް އިތުބާރު ނުކުރައްވާކަމަށް ވިދާޅުވެ އެކަމުގެ ހެކި ރައީސް ޔަމީން ހިއްސާ ކުރައްވައިފި

ނައިބު ރައީސް މުހައްމަދު ޖަމީލް އަހުމަދުގެ މައްޗަށް އިތުބާރުނެތް ކަމަށް ވިދާޅުވެ، އެކަމުގެ ހެކި ވަރަށް ތަފުސީލްކޮށް ޕީޕީއެމް ކޯލިޝަންގެ ޕީޖީ ގްރޫޕާ ރައީސުލް ޖުމްހޫރިއްޔާ އަބްދުﷲ ޔާމީން އަބުދުލް ގައްޔޫމު ހިއްސާ ކުރައްވައިފި އެވެ.

ރައީސް ޔާމީންގެ ބައްދަލު ކުރެއްވުންތައް އާއްމުކޮށް ކުރިއަށް ގެންދަވާ މުލީއާގޭގައި އިއްޔެ މެންދުރު ފަހުގެ ވަގުތެއްގައި ސަރުކާރުގެ ކޯލީޝަންގައި ހިމެނި ވަޑައިގަންނަވާ ޕީޖީ ގްރޫޕްގެ މެންބަރުންނާއެކު ބޭއްވި ބައްދަލު ކުރެއްވުމެއްގައި ރައީސް ޔާމީން ވަނީ ކަމާބެހޭ ލިއުންތަކާއެކު އެކަންތައްތައް މެންބަރުންނަށް ސާފުކޮށްދެއްވައި ހެކި ހުށަހަޅުއްވައިފަ އެވެ.

އެމަނިކުފާނުގެ ނާއިބުރައީސްގެ މައްޗަށް އިތުބާރު ނެތްކަމަށާއި އިތުބާރު ނުކުރައްވާކަމަށް ފުރަތަމަ ފަހަރަށް ވިދާޅުވެ ރައީސް ޔާމީން މެންބަރުންނާ ހިއްސާ ކުރެއްވި މައުލޫމާތު ތަކާއި ހެކި ތަކުގެ ތެރޭގައި، އިދިކޮޅު ފަރާތްތަކުން ސަރުކާރާ ދެކޮޅަށް، "އަނިޔާވެރިކަން ނިންމުން" ގެ ނަމުގައި ފެބްރުއަރީ 27 އާއި "މޭޑޭ"ގެ ނަމުގައި މޭ 1 ގައި ބޭއްވި ބޮޑު ދެ މުޒާހަރާ ރޭވި އިސް ފަރާތްތަކާއި ނައިބު ރައީސް ޖަމީލާ ދެމެދު ބަދަލުކޮށްފައިވާ މެސެޖްތަކުގެ ކޮޕީ ހިމެނެ އެވެ. އެ ބައްދަލުވުމުގައި ބައިވެރިވެ ވަޑައިގެންނެވި މެންބަރަކު ނަން ހާމަ ނުކުރުމަށް އެދި ބުނެފައިވަނީ، ނާއިބު ރައީސް ޖަމީލާއި ސަރުކާރާ ދެކޮޅަށް އެއްވުން ބޭއްވި ފަރާތްތަކާދެމެދު މުއާމަލާތްކޮށްފައިވާ މެސެޖްތައް ހިމެނޭ ދެތިން ސަފްހާގެ ކަރުދާސް އެ ބައްދަލުވުމަށް ރައީސް ޔާމީން ހުށަހެޅުއްވި ކަމަށެވެ. އަދި ނާއިބު ރައީސްއާމެދު އެމަނިކުފާނުގެ އިތުބާރު ގެއްލުނީ އެހިސާބުން ކަމަށް ރައީސް ޔާމީން ވިދާޅުވި ކަމަށްވެސް އޭނާ ބުންޏެވެ.

އެ ބައްދަލު ވުމަށްފަހު ތިމަރަފުށީ ދާއިރާގެ މެންބަރު މުހައްމަދު މުސްތަފާ ކުރައްވާފައިވާ ޓްވީޓެއްގައި ވިދާޅުވެފައިވަނީ، ނައިބު ރައީސް ޖަމީލް "ބަޣާވާތް" ކުރަން އުޅުއްވި ކަމުގެ ހެކި ޖަމީލްގެ ވައިބާ މެސެޖްތަކުން "ޝައްކެތް ނެތް މިންވަރަށް" ރައީސް ޔާމީން ކަށަވަރު ކޮށްދެއްވައިފި ކަމަށެވެ.

އެ ބައްދަލުވުމާބެހޭ މައުލޫމާދު އެނގިވަޑައިގަންނަވާ ބޭފުޅަކު ނަން ހާމަ ނުކުރެއްވުމަށް އެދި ވަޑައިގެން ވިދާޅުވީ، ރިޔާސީ އިންތިހާބު ކާމިޔާބު ކުރެއްވުމަށް ނާއިބު ރައީސް ކޮށްދެއްވި މަސައްކަތްޕުޅަށް ރައީސް ޔާމީން ޝުކުރު އަދާކުރައްވައި އެކަން ފާހަގަ ކުރެއްވި ކަމަށެވެ. އަދި އެކަމުގެ ސަބަބުން ބޮޑެތި ބާރުތަކަކާއި މަސްއޫލިއްޔަތުތަކެއް ނާއިބު ރައީސަށް ދެއްވާފައިވާކަމަށް ރައީސް ޔަމީން ވިދާޅުވި ކަމަށެވެ. އެގޮތުން ސޯޝަލް ކައުންސިލްގެ ހުރިހާ ބާރެއް އެމަނިކުފާނު ނައިބު ރައީސަށް ދެއްވާފައިވާކަމަށް ރައީސް ޔާމީން ވިދާޅުވިކަމަށް އޭނާ މައުލޫމާތު ދެއްވި އެވެ.

އޭނާ އިތުރަށް ވިދާޅުވީ ޖަމީލާ ބެހޭގޮތުން އެ މައުލޫމާތުތައް މެންބަރުންނަށް ދެއްވީ އެ މެންބަރުން ނިސްބަތްވާ ދާއިރާތަކުގެ ރައްޔިތުން އެކަންކަމާބެހޭގޮތުން މެންބަރުންނާ ސުވާލު ކުރައްވާނެތީ އެމައުލޫމާތުތައް މެންބަރުންނަށް އެނގިވަޑައިގަންނަވަން ޖެހިވަޑައިގަންނަވާކަމަށް ދެކެވަޑައިގެން ކަމަށް ރައީސް ޔާމީން ވިދާޅުވި ކަމަށެވެ.

ރައީސް ޔާމީން މި މައުލޫމާތުތައް މެންބަރުންނާ ހިއްސާ ކުރައްވާފައި މިވަނީ ނާއިބުރައީސްގެ މައްޗަށް އިތުބާރުނެތްކަމުގެ މައްސަލަ މަޖިލީހަށް ހުށަހަޅާފައި ވަނިކޮށެވެ. އިދިކޮޅު ފަރާތްތަކާއި ސަރުކާރު ކޯލީޝަންގައި ހިމެނިވަޑައިގަންނަވާ މެންބަރުން އެކުވެގެން ހުށަހަޅާފައިވާ އިތުބާރުނެތްކަމުގެ މައްސަލައަށް ޖަވާޞުދާރީވުމުގެ ނޯޓިސް ރައްޔިތުންގެ މަޖިލީހުން މިހާރުވަނީ ނާއިބު ރައީސަށް ފޮނުވައިފަ އެވެ.