ނާއިބު ރައީސް ވަކިކުރުމުގެ މައްސަލައިގައި ރައީސްގެ ޚިޔާލުފުޅުހުރި ގޮތް ރައްޔިތުންނަށް އެނގެންޖެހޭނެ-ފައްޔާޒު
2 ޖުލައި 2015 5:23
ރައީސުލްޖުމްހޫރިއްޔާގެ ނާއިބުގެ އިތުބާރު ނެތްކަމުގެ ވޯޓެއް ނަގައި އެމަނިކުފާނު މަގާމުން ވަކިކުރާއިރު އެކަމާ ގުޅިގެން ރައީސް ޢަބްދުﷲ ޔާމީންގެ ޚިޔާލުފުޅު ރައްޔިތުންނަށް އެނގެންޖެހޭނެ ކަމަށް ލ. ގަމުދާއިރާގެ މަޖިލިސް މެންބަރު ފައްޔާޒު އިސްމާޢީލް ވިދާޅުވެއްޖެއެވެ.
"ދުވަސް" އަށް މަޢުލޫމާތު ދެއްވަމުން ފައްޔާޒު ވިދާޅުވީ ސަރުކާރު ހިންގާ މައިޕާޓީން ނާއިބު ރައީސް ޑރ. މުޙައްމަދު ޖަމީލް އަޙުމަދު ވަކިކުރުމަށް ރައްޔިިތންގެ މަޖިލީހަށް ހުށަހެޅުމަކީ ޢާއްމު އުސޫލެއް ނޫންކަމަށެވެ.
މިނިސްޓަރުންނާއި ރައީސާއި، ނާއިބު ރައީސް ވަކިކުރުމަށް މަޖިލީހަށް ހުށަހަޅާނީ ޢާއްމު އުސޫލުން ބަލާއިރު އިދިކޮޅު ފަރާތްތަކުން ކަމަށް އޭނާ ވިދާޅުވިއެވެ. އެހެންކަމުން އެމާވެސް ކަންބޮޑުވެ ވަޑައިގަންނަވާ ކަމަށް ވިދާޅުވިއެވެ.
ޕީޕީއެމްގެ ސަރުކާރުގެ ނާއިބު ރައީސް ޑރ. ޖަމީލް މަގާމުން ވަކިކުރަން އެޕާޓީން ހުށަހަޅާފައިވާއިރު އެކަމާ ގުޅިގެން ރައީސް ޢަބްދުﷲ ޔާމީންގެ ބަސްފުޅު އެނގިވަޑައި ނުގެންނެވުމަކީ ކަންބޮޑުވެ ވަޑައި ގަންނަވާ ކަމެއް ކަމަށްވެސް ފައްޔާޒު ވިދާޅުވިއެވެ. "ނާއިބު ރައީސްގެ މައްޗަށް ރައީސްގެ އިތުބާރު ނެތްކަމަށްވާނަމަ އިތުބާރުނެތް ކަމުގެ ވޯޓެއް ނަގައި މަގާމުން ވަކިކުރެވިދާނެ. އެހެން ނަމަވެސް ނާއިބް ރައީސް ޑރ. ޖަމީލް ވަކިކުރުމަކީ ރައީސް ޔާމީން ރުހިވަޑައިގަނަވާ ކަމެއްތޯ ނުވަތަ ނޫންތޯ ރައްޔިތުންނަށް އަދި އެނގިފައެއްނެތް. އެއީވެސް ކަންބޮޑުވާންޖެހޭ ކަމެއް،" ފައްޔާޒު ވިދާޅުވިއެވެ.
ރައީސަކާއި ނާއިބު ރައީސަކު ހޮވާފައިވިޔަސް ރައްޔިތުން ވޯޓުދީފައިވާ މައިގަނޑަކީ ރައީސަކު ހޮވުމަށް ކަމަށްވެސް އޭނާ ވިދާޅުވިއެވެ. އެހެން ކަމުން ނާއިބު ރައީސް ވަކިކުރުމުގައި ރައީސްގެ ޚިޔާލުފުޅު ރައްޔިތުންނަށް ކޮންމެހެންވެސް އެނގެންޖެހޭނެ ކަމަށް ވިދާޅުވިއެވެ.
ފައްޔާޒު ވިދާޅުވީ ސަރުކާރުން ސަރުކާރުގެ ނާއިބު ރައީސްގެ އިތުބާރުނެތް ކަމަށް ވޯޓުނަގާއިރު އިދިކޮޅު ފަރާތްތަކުން އެއަށް މަރުހަބާ ކިޔައި ވޯޓުދޭނެ ކަމަށް ދެކެވަޑައި ގަންނަވާ ކަމަށެވެ. "ޚާއްސަކޮށް އިތުބާރެއްނެތް އަނިޔާވެރި ސަރުކާރަކުން ސަރުކާރުގެ ނާއިބު ރައީސް މަގާމުން ވަކިކުރުމަށް ނަގާ ވޯޓެއްގައި އިދިކޮޅު ޕާޓީތަކުން ބައިވެރިވެ ވޯޓުދޭނެ ކަމަށް އަޅުގަނޑު ދެކެނީ،" ފައްޔާޒު ވިދާޅުވިއެވެ.
ނާއިބު ރައީސް ޑރ. މުޙައްމަދު ޖަމީލް އަޙުމަދުގެ އިތުބާރުނެތް ކަމުގެ ވޯޓެއްނަގައި މަގާމުން ވަކިކުރުމަށް ޕީޕީއެމްއިން ރައްޔިތުންގެ މަޖިލީހަށް ހުށަހަޅާފައިވާއިރު އެކަމާ ގުޅިގެން ރައީސްގެ ބަސްފުޅަކީ ކޮބައިތޯ ސްޕޯކްސް ޕާސަން އިބްރާހީމް މުޢާޒު ޢަލީއަށް ދެންނެވުމުން ވިދާޅުވީ "ނޯ ކޮމެންޓް" ކަމަށެވެ.
މިކަމާ ގުޅިގެން ނާއިބު ރައީސް ޖަމީލް ވިދާޅުވެފައިވަނީ އެއީ ޤާނޫނު އަސާސީގެ ތެރެއިން ގެންނަ ބަޣާވާތެއް ކަމަށެވެ. ނާއިބު ރައީސް މަގާމުން ވަކިކުރަން ހުށަހަޅާފައިވަނީ އެމަނިކުފާނުގެ ޒިންމާ ފުރިހަމައަށް އަދާނުކުރެވޭ ކަމަށް ބުނެއެވެ.
އެމަނިކުފާނު ވަކިކުރުމަށްފަހު އެމަގާމަށް ހަމަޖައްސަވާނީ މިހާރުގެ ޓޫރިޒަމް މިނިސްޓަރ އަޙުމަދު އަދީބު ކަމަށް މަޖިލީހުގެ ބައެއް މެންބަރުން ފާޅުގައި ގެންދަވަނީ ވިދާޅުވަމުންނެވެ.
ކިޔުންތެރިންގެ ހިޔާލު