ޑެންގީ ހުން ނުރައްކާތެރި ހިސާބަކަށް ފެތުރެމުންދާތީ ސްކޫލުތަކުގެ ކިޔެވުން ބަންދު ކޮށްފި

ރާއްޖޭގައި މިހާރު ފެތުރެމުން އަންނަ ޑެންގީ ހުން ނުރައްކާތެރި ހިސާބަކަށް ދިއުމާ ގުޅިގެން ރާއްޖޭގެ ހުރިހާ ސްކޫލުތަކެއްގެ ކިޔެވުން މާދަމާ އިން ފެށިގެން ބަންދު ކުރާ ގޮތަށް ސަރުކާރުން ނިންމައިފި އެވެ.

ރާއްޖޭގައި މިހާރު ފެތުރެމުން އަންނަ ޑެންގީ ހުން ނުރައްކާތެރި ހިސާބަކަށް ދިއުމާ ގުޅިގެން ރާއްޖޭގެ ހުރިހާ ސްކޫލުތަކެއްގެ ކިޔެވުން މާދަމާ އިން ފެށިގެން ބަންދު ކުރާ ގޮތަށް ސަރުކާރުން ނިންމައިފި އެވެ.

ކެބިނެޓްގެ ބައެއް މިނިސްޓަރުންނާއި ކޮމިޝަނަރ އޮފް ޕޮލިސް ހިމެނޭގޮތަށް އެކުލަވާލާފައިވާ ޑެންގީ ކޮންޓްރޯލްކުރުމާބެހޭ ޓާސްކްފޯސް އިން ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން އެޑިއުކޭޝަން މިނިސްޓަރު ޑރ. އައިޝަތު ޝިހާމް ވިދާޅުވީ ޕްރީސްކޫލްތަކުގެ ކިޔެވުމުގެ އިތުރުން ގްރޭޑްސްކޫލްތަކުގެ ކިޔެވުންވެސް ސަރުކާރުން ވަކި އެއްޗެއް އަންގަންދެން މާދަމާ އިން ފެށިގެން ބަންދުވާނެ ކަމަށެވެ. އެހެން ނަމަވެސް ދުނިޔޭގެ ބޮޑެތި އިމްތިހާނު ތަކުގައި ބައިވެރިވާންޖެހޭތީ، އަންނަ އޮކްޓޫބަރު މަހު ފެށޭ އޯ-ލެވެލް އިމްތިހާނަށް ތައްޔާރުވާ ދަރިވަރުންނަށް ހާއްސަ އިނާޔަތްތަކުގެ ދަށުން ކިޔެވުމުގެ އިންތިޒާމު ހަމަޖައްސަވާނެ ކަމަށެވެ.

ރާއްޖޭގެ އެކި ހިސާބުތަކުގައި ނުރައްކާތެރިކަމާއެކު ޑެންގީހުން ފެތުރެމުންދާއިރު، މިހާތަނަށް ޑެންގީހުމުގެ އެތަކެއް ހޭސްތައް އެކި ހިސާބުތަކުން ރެކޯޑް ކުރެވިފައިވާކަމަށް މިއަދު ހެލްތު މިނިސްޓަރު އިރުތިޝާމް އާދަމް ވިދާޅުވި އެވެ.

މިނިސްޓަރު ވިދާޅުވީ ޑެންގީ ހުމުގެ ބަލީގައި މިހާތަނަށް ތިން މީހަކު މަރުވެފައިވާކަމަށެވެ. އޭގެ ތެރޭގައި ހިމެނޭ އެންމެ ކުޑަކުއްޖާ މަރުވެފައިވަނީ އިއްޔެގެ ވަގުތެއްގަ އެވެ. ބ.އޭދަފުށީ ހޮސްޕިޓަލްގައި ފަރުވާދެމުން ދަނިކޮށް އިއްޔެ މަރުވެފައިވަނީ ހަތްމަހުގެ ތުއްތު ކުއްޖެކެވެ.