އައްޑޫ ސިޓީގެ ކުނި މެނޭޖުކުރުމުގެ މަސައްކަތް އެމްއާރުޑީސީއާ ޙަވާލުކޮށްފި

އައްޑޫ ސިޓީގެ ކުނި މެނޭޖުކުރަން މޯލްޑިވްސް ރޯޑް ޑިވެލޮޕްމަންޓް ކޯޕަރޭޝަން (އެމްއާރުޑީސީ)އާ މިއަދު ޙަވާލުކޮށްފިއެވެ.

މިމަސައްކަތް އެކުންފުންޏާ ޙަވާލުކުރެއްވީ ވަގުތީ ގޮތުންނެވެ. ނަމަވެސް ދެމަހެއްހާ ދުވަސްތެރޭގައި އައްޑޫ ކުނި މެނޭޖު ކުރުމަށް ޙައްލެއް ލިބޭނެ ކަމަށް އުންމީދު ކުރައްވާ ކަމަށް އެންވިރަންމަންޓް މިނިސްޓަރ ތާރިގް އިބްރާހީމް މިއަދު ވިދާޅުވިއެވެ.

ކުނި މެނޭޖުކުރުމުގެ އެއްބަސްވުމުގައި އެންވަޔަރްމަންޓް މިނިސްޓްރީގެ ފަރާތުން ސޮއިކުރެއްވީ މިނިސްޓަރ ތާރިގު އިބްރާހީމެވެ. އެމްއާރުޑީސީގެ ފަރާތުން ސޮއިކުރެއްވީ ޑެޕިއުޓީ މެނޭޖިން ޑިރެކްޓަރ އަޙުމަދު މަމްދޫހެވެ. އެކުންފުންޏާ މިމަސައްކަތް ޙަވާލުކުރެއްވީ 734،792.88 ރުފިޔާގެ އަގަކަށެވެ.

އައްޑޫގައި އުފެދޭކުނި މެނޭޖުކުރާނެ ފަރާތެއް ނެތްތާ ދުވަސްކޮޅެއް ވެއްޖެއެވެ. އެދުވަސްތަކުގައި އައްޑޫ ރައްޔިތުންނަށްވަނީ ވަރަށް ބޮޑުތަކުލީފް އުފުލަން ޖެހިފައެވެ. ކުނި އުކާލެވޭނެ ގޮތެއް ނެތި ކުނި އިތުރުވުމުގެ ސަބަބުން ބަލިމަޑު ކަމެއް އުފެދުމުގެ ބިރުވެސް އައްޑުއަށްވަނީ ދިމާވެފައެވެ. މަޢުލޫމާތު ލިބިފައިވާ ގޮތުގައި އައްޑޫގައި ކުރިން ކުނި މެނޭޖުކުރަމުންދިޔަ ފަރާތަށް ދީފައިވާ މުއްދަތުވަނީ ހަމަވެފައެވެ. އެހެން ކަމުން އައްޑޫ ސިޓީ ކައުންސިލުން މަސައްކަތް ކުރަމުން އައީ ކުނި އުކައިދިނުމުގެ މަސައްކަތް ޒެޑް އެންޓަޕްރައިސަސް ކިޔާ ކުންފުންޏަކާ ޙަވާލު ކުރުމަށެވެ.

މިނިސްޓަރ ތާރިގް ވިދާޅުވީ މިފަދަ ކަންކަމަކީ ގިނަ ދުވަސްވަންދެން ބަލަހައްޓައިގެން ތިބެވޭނެ ކަންކަން ނޫންކަމަށެވެ. ކުރިއަށްއޮތީ ރޯދަމަސް ކަމުން ގެތަކުގައި އުފެދޭ ކުނިވެސް އިތުުރުވާނެ ކަމަށް މިނިސްޓަރ ވިދާޅުވިއެވެ. އެހެން ކަމުން ސަރުކާރުން ނިންމީ ވީހާވެސް އަވަހަކަށް އެމައްސަލަ ޙައްލުކޮށް ދިނުމަށް ކަމަށް މިނިސްޓަރ ވިދާޅުވިއެވެ.

މިމަސައްކަތް ބަޔަކާ ހަވާލު ކުރުމުގެ މަސައްކަތް މަޑުޖައްސާލުމަށް އޭސީސީންވަނީ އައްޑޫ ސިޓީ ކައުންސިލަށް އަންގާފައެވެ. އެހެން ނަމަވެސް ވަގުތީ ހައްލެއް ނަމަވެސް މިކަމަށް ގެންނަން ސަރުކާރަށް ފެންނާތީ އެމްއާރުޑީސީ އާ ހަވާލު ކުރީ ކަމަށް މިނިސްޓަރ ވިދާޅުވިއެވެ.

ކުނީގެ މައްސަލަ ކުރިމަތިވެފައިވާތީ އެކަމާ ހިތްހަމަނުޖެހިގެން ބައެއް ފަރާތްތަކުން ވަނީ ރެއާއި މިއަދުވެސް ހިތަދޫގައި އޮންނަ ކުނި ކޮށީގައި ރޯކޮށްލާފައި ކަމަށް މަޢުލޫމާތު ލިބިފައިވެއެވެ.