އެމްޑީޕީގެ ކެންޑިޑޭޓް ބަލިކުރައްވައި ދިއްގަރުދާއިރާގެ ބައިއިލެކްޝަން ބޮޑުތަފާތަކުން ފާރިޝް ކާމިޔާބު ކޮށްފި

މިއަދު ބޭއްވި ދިއްގަރުދާއިރާގެ ބައިއިލެކްޝަން ބޮޑުތަފާތަކުން ޕީޕީއެމްގެ ކެންޑިޑޭޓް ފާރިޝް މައުމޫން ކާމިޔާބު ކުރައްވައިފިއެވެ.

އޭނާ މިއިންތިޚާބު ކާމިޔާބު ކުރެއްވީ އެމްޑީޕީގެ ކެންޑިޑޭޓް އަޙުމަދު ރާޒީއާ ވާދަކޮށްގެންނެއެވެ. ފާރީޝަށްވަނީ ބެހެއްޓި 6 ފޮށިންވެސް ކުރިލިބިފައެވެ. އޭނާއަށް ޖުމްލަ ލިބިފައިވަނީ 1232 ވޯޓެވެ. ރާޒީއަށް ލިބިފައިވަނީ 756 ވޯޓެވެ.ފާރިޝް އަށް މިގޮނޑި ލިބުމުން ޕީޕީއެމްގެ ޕާލިމެންޓް ގްރޫޕުގައި ފެކްޝަންތަކެއް ހެދިގެންދާނެ ކަމަށް އިދިކޮޅު ބައެއް ފަރާތްތަކުން ގެންދަނީ ބުނަމުންނެވެ. ނަމަވެސް އެޕާޓީގެ ޕީޖީ ލީޑަރ ނިހާން ވިދާޅުވީ އެކަން އެހެން ނުވާނެ ކަމަށެވެ.ނިހާން ވިދާޅުވީ މިއަދު އިންތިޚާބުގެ ނަތީޖާ ދައްކާ ގޮތުން ރާއްޖޭގެ ޑިމޮކްރަސީ އޮތީ ޖަލުގައި ނޫންކަމާއި ޑިމޮކްރަސީ އޮތީ ދުޅަހެޔޮކޮށްކަން ހާމަވެގެން ހިނގައްޖެ ކަމަށެވެ.

ދިއްގަރު ދާއިިރާގެ އިންތިޚާބު ބޭއްވީ އެ ދާއިރާގެ މެމްބަރަކަށް ހުންނެވި އަޙުމަދު ނާޒިމްގެ މައްޗަށް މަކަރާއި ޙީލަތުގެ ކުށް ސާބިތުވެ އޭނާ ޖަލަށްލާން ސުޕްރީމް ކޯޓުން ހުކުމް ކުރުމުންނެވެ.

މިއިންތިޚާބުގައި ވާދަކުރެއްވީ އަމިއްލަ ގޮތުން ކުރިމަތި ލައްވާފައިވާ މޫސާ ނަސީރު އަޙުމަދާއި އަދި ޝަމީމް ޢަލީ އާއި އެމްޑީޕީގެ ކެންޑިޑޭޓް އަޙުމަދު ރާޒީ އާއި ޕީޕީއެމްގެ ކެންޑިޑޭޓް އަޙުމަދު ފާރިޝް މައުމޫނެވެ.

މި އިންތިޚާބުގައި ވޯޓުލުމަށް 2،555 މީހުންވަނީ ރަޖިސްޓްރީކޮށްފައެވެ. މީގެ ތެރެއިން 73 އިންސައްތަ މީހުން ވޯޓުލި ކަމަށް އިލެކްޝަންސް ކޮމިޝަނުންވަނީ ބުނެފައެވެ.