ދިއްގަރު ދާއިރާގެ ބައިއިލެކްޝަންގެ ވޯޓުލުމުގައި މިހާތަނަށް އެއްވެސް ޝަކުވާއެއްނެތް

ދިއްގަރު ދާއިރާގެ ބައިއިލެކްޝްންގެ ވޯޓުލުން މިއަދު ހެނދުނު 8:00 އިން ފެށިގެން ކުރިއަށް އެބަދެއެވެ. ވޯޓުލާން ފެށިފަހުން އެއްވެސް ޝަކުވާއެއް ލިބިފައި ނުވާ ކަމަށް އިލެކްޝަންސް ކޮމިޝަނުން ވަނީ ބުނެފައެވެ.

ވޯޓުލާން ފެށިފަހުން އެއްވެސް ޝަކުވާއެއް ލިބިފައިނެތަސް ކެންޕން ކުރުން މަނާގަޑީގައި މުލީގައި ހިނގި ކަމަކާ ގުޅޭ ޝަކުވާއެއް ލިބިފައިވާ ކަމަށް އިލެކްޝަން ކޮމިޝަނުން ބުންޏެވެ. އެއީ ސިޓީ ބެހި މައްސަލައެއް ކަމަށާއި އެކަން ބަލަމުންދާ ކަމަށް ކޮމިޝަން މެންބަރ އަކުރަމް ވިދާޅުވިއެވެ.

މިއަދު ހެނދުުނު 8:00 އިން ފެށިގެން ހަވީރު 4:00 އާ ހަމަށް ވޯޓުލުން ކުރިއަށްދާނެއެވެ. 4:00 ގައި ވޯޓުފޮށި ބަންދުކުރާނީ އެގަޑިޖެހޭއިރު ވޯޓުލާން ބަޔަކުނެތްނަމައެވެ. ވޯޓު ގުނަން ފަށާނީ ވޯޓު ފޮށި ބަންދުކުރާތާ 30 މިނިޓަށްފަހުއެވެ. ވޯޓު ގުނައި ނިމުމާ އެކު އެ ރަށެއްގައި ވަގުތީ ނަތީޖާ އިއުލާން ކުރާނެއެވެ. ރަސްމީ ނަތީޖާ އިޢުލާން ކުރާނީ މިރޭ 8:30 ގައި ދިއްގަރުގައެވެ.

މިއިންތިޚާބުގައި ވާދަކުރައްވަނީ އަމިއްލަ ގޮތުން ކުރިމަތި ލައްވާފައިވާ މޫސާ ނަސީރު އަޙުމަދާއި އަދި ޝަމީމް ޢަލީ އާއި އެމްޑީޕީގެ ކެންޑިޑޭޓް އަޙުމަދު ރާޒީ އާއި ޕީޕީއެމްގެ ކެންޑިޑޭޓް އަޙުމަދު ފާރިޝް މައުމޫނެވެ.

މި އިންތިޚާބުގައި ވޯޓުލުމަށް 2،555 މީހުންވަނީ ރަޖިސްޓްރީކޮށްފައެވެ. މާލޭގައި ތިބި ދިއްގަރު ދާއިރާގެ ރައްޔިތުން ވޯޓުލުމަށް ފޮށި ބަހައްޓާފައި ވަނީ އިސްކަންދަރު ސްކޫލްގައެވެ.