ނާޒިމް މާލެ ވަޑައިގެންނެވީ ބޭސްފަރުވާ ނުނިންމައި- ޢާޒިމް
24 މޭ 2015 18:14
ރާއްޖޭގެ ކުރީގެ ޑިފެންސް މިނިސްޓަރ ރިޓަޔަރޑް ކާނަލް މުޙައްމަދު ނާޒިމް ބޭސްފަރުވާއަކަށް ސިންގަޕޫރަށް ވަޑައިގެންނެވުމަށްފަހު އެނބު މިއަދު ރާއްޖެ ވަޑައިގެންނެވީ ބޭސްފަރުވާގެ ކަންކަން ނުނިމެނީސް ކަމަށް ނާޒިމްގެ ކޮއްކޮ އާދަމް ޢާޒިމް ވިދާޅުވެއްޖެއެވެ.
އެގާރަ އަހަރުގެ ޖަލުޙުކުމެއް ތަންފީޒު ކުރަމުންދާ ނާޒިމްގެ ސިޙީ ޙާލަތު ހުރިގޮތުން ބޭސަފަރުވާއަށް ރާއްޖެއިން ބޭރަށް ވަޑައިގެންނެވުމަށް ސަރުކާރުން ދެއްވީ 45 ދުވަހެވެ. އެމުއްދަތު ހަމަވާން އެއް ދުވަސް އޮއްވައި މިއަދު ރާއްޖެ ވަޑައިގެންނެވީ މޯލްޑިވްސް ކަރެކްޝަނަލް ސާވިސަސް އިން ނާޒިމް މާލެ ގެންނެވުމަށް ޢާއިލާއަށް އަންގަވާފައި ވަނިކޮށްނެވެ.
ޢާޒިމް ވިދާޅުވީ އަދި ތިންމަސްފަހުން ކާނަލް ނާޒިމް ޑޮކްޓަރަށް ދައްކަން ޖެހޭ ކަމަށެވެ. ތިންމަސް ފަހުން ބޭރަށް ވަޑައިގެންނެވުމުގެ ހުއްދަ ލިބޭނެ ކަމަށް އުންމީދު ކުރައްވާ ކަމަށްވެސް ޢާޒިމް ވިދާޅުވިއެވެ. ސިންގަޕޫރަކީ ބޭސްފަރުވާ ކުރުމުގެ ޚަރަދު އިންތިހާއަށް ބޮޑުތަނެއް ކަމަށްވުމުން އަގުހެޔޮކޮށް ބޭސް ކުރެވޭނެ ޤައުމަކަށް ވަޑައިގެންނެވުގެ ހުއްދަ ސަރުކާރުން ދެއްވާނެ ކަމަށް އުންމީދު ކުރައްވާ ކަމަށްވެސް ވިދާޅުވިއެވެ.
ނާޒިމް މިއަދު ރާއްޖެ ވަޑައިގެންނެވުމުން އެމަނިކުފާނު ދުށުމަށްޓަކައި ޢާއިލާގެ ބޭފުޅުން އެއަރޕޯޓަށް ވަޑައިގެންނެވިއެވެ. އެހެންނަމަވެސް އެއްވެސް ބޭފުޅަކަށް އެމަނިކުފާނު ފެނިފައެއް ނުވެއެވެ. އެއާޕޯޓުން އެމަނިކުފާނު ގެންދެވީ ސީދާ އައްސޭރި ޖަލަށެވެ.
ފަރުވާ ނިމުމުގެ ކުރިން ނާޒިމް އެނބުރި ވަޑައިގެންނެވީ ސަރުކާރުގެ އެންގެވުމަށް ޙުރުމަތްތެރިކޮށް ހިއްތެވުމުގެ ގޮތުން ކަމަށްވެސް ޢާޒިމް ވިދާޅުވިއެވެ.
ކިޔުންތެރިންގެ ހިޔާލު