ފުލުހުންނަށް އަނިޔާ ކުރުމަކީ ބަލައިގަނެވޭނެ ކަމެއްނޫން-ސީޕި
24 މޭ 2015 2:31
ފުލުހުންނަށް އަނިޔާ ކުރުމަކީ އެއްގޮތަކަށްވެސް ބަލައިގަނެވޭނެ ކަމެއްނޫން ކަމަށް ކޮމިޝަނަރައޮފް ޕޮލިސް (ސީޕީ) ޙުސައިން ވަޙީދު ވިދާޅުވެއްޖެއެވެ.
މާލޭގެ ގެއަކަށް ފުލުހަކު ވެއްދުމަށްފަހު އަނިޔާކުރި މައްސަލާގައި ވާހަކަ ދައްކަވަމުން ސީޕީވިދާޅުވީ އެއީ އެއްގޮތަކަށްވެސް ޤަބޫލުކުރެވޭނެ ކަމެއް ނޫންކަމަށެވެ.
ފުލުހުންނަކީ އަބަދުވެސް ރައްޔިތުންގެ ސަލާމަތާއި ރައްކާތެރިކަމަށް ރެއާއި ދުވާލު މަސައްކަތްކުރައްވާ ބައެއް ކަމަށްވެސް ވިދާޅުވިއެވެ. އެފަދަ ބައަކަށް އަނިޔާކޮށް ގެއްލުން ދިނުމަކީ ބަލައިގަންނާނޭ އަދި ޤަބޫލުވެސް ކުރައްވާނެ ކަމެއް ނޫންކަމަށް ސީޕީ ވިދާޅުވިއެވެ.
މާލޭގެ ގެއަކަށް ފުލުހަކު ވެއްދުމަށްފަހު އަނިޔާ ކޮށްފައިވަނީ ހުކުރުދުވަހުގެ ރޭ 11:00 އެހައިކަންއިރުއެވެ. އެގެއަށް ވައްދައި ފުލުސް މީހާއަށް ހަމަލާ ދިނުމުން އޭނާގެ ބޯ ވަނީ ފަޅައިގެން ގޮސްފައެވެ. އަދި އައިޖީއެމްއެޗްގައި އޭނާއަށް ފަރުވާ ދިނުމަށްފަހު ވަނީ ދޫކޮށްލާފައެވެ.
ސީޕީ ވިދާޅުވީ ފުލުހުންނަށް އަނިޔާކުރުމަކީ ވަރަށް ނާތަހުޒީބު އަދި އެހައިމެ ދަށުދަރަޖައިގެ ފިނޑި ޢަމަލެއް ކަމަށެވެ. މިފަދަ ޢަމަލުތައް ހިންގައިގެން ފުލުހުން ކުރަމުންދާ ޤާނޫނީ މަސައްކަތްތަކާއި، ރައްޔިތުންގެ ޙިމާޔަތުގައި ކުރަމުންދާ މަސައްކަތަށް އެއްވެސް ހުއްޓުމެއް ނުގެނެވޭނެ ކަމަށެވެ.
ބަޔަކު މީހުން މިގޮތަށް ދޭ ޙަމަލާއަކުން، ޖީނާޢީ ކުށްތައް ހުއްޓުވުމުމަށް ފުލުހުން ކުރަމުންދާ ބުރަމަސައްކަތުގައި އެންމެ އިންޗިއެއްވެސް ފަހަތަށް ނުޖެއްސޭނެ ކަމަށެވެ.
ކިޔުންތެރިންގެ ހިޔާލު