ރައީސް ޔާމީންގެ މަސައްކަތް ޒުވާނުން ބަލައިގަންނަކަން އެމަނިކުފާނުގެ އުފަންދުވަހުން އެނގުނު- ޢަބްދުﷲ ރިފާއު

ރައީސް ޢަބްދުﷲ ޔާމީންގެ މަސައްކަތް ޒުވާނުން ބަލައިގަންނަކަން އެމަނިކުފާނުގެ އުފަންދުވަސް ފާހަގަ ކުރުމަށް ބޭއްވި ޙަރަކާތްތަކުންވެސް ވަރަށް ބޮޑަށް ހާމަވެގެން ދިޔަކަމަށް ރައްޔިތުންގެ މަޖިލީހުގެ މާފަންނު ދެކުނު ދާއިރާގެ މެމްބަރ ޢަބްދުﷲ ރިފާޢު ވިދާޅުވެއްޖެއެވެ.

ރިފާޢު ވިދާޅުވީ ރައީސް ޔާމީންގެ 56 ވަނަ އުފަންދުވަސް ފާހަގަ ކުރުމަށް މާލޭގައި މިއަދު ބޭއްވި ހަރަކާތްތައް އިންތިޒާމް ކުރުމާއި، ތައްޔާރު ކުރުމުގައި ވަރަށްގިނަ ޒުވާނުން ޙަރަކާތްތެރިވި ކަމަށެވެ. އަދި ރައީސްގެ އުފަންދުވަހާ ގުޅިގެން ބޭއްވި ހަރަކާތްތަކުގައި ގިނަ ޒުވާނުން ބައިވެރިވި ކަމަށްވެސް ވިދާޅުވިއެވެ.

"މިކަންކަމުން އެނގުނީ ރައީސް ޔާމީންގެ ސިޔާސަތުތައް ޒުވާނުން ބަލައިގަންނަކަން. ވަރަށްގިނަ ޒުވާނުން މިއަދުވަނީ ރައީސް ޔާމީންގެ އުފަންދުވަހުގެ ޙަރަކާތްތަކުގައި އެކި ގޮތްގޮތުން ބައިވެރިވެ ޙަރަކާތްތެރިވެފައި،" ރިފާޢު ވިދާޅުވިއެވެ.

މާލޭގެ އިތުރަށް ބައެއް ރަށްރަށާއި، އަވަށްޓެރި ބައެއް ޤައުމުތަކުގައިއުޅޭ ޔާމީންގެ ސަޕޯޓަރުންވަނީ އެމަނިކުފާނުގެ އުފަންދުވަސް ފާހަގަކުރުމަށް ތަފާތު ޙަރަކާތްތައް ބާއްވާފައެވެ. އެމަނިކުފާނުގެ އުފަންދުވަހާ ގުޅިގެން ބޮޑު ކޭކެއްވެސްވަނީ ފަޅާފައެވެ.

މާލޭގެ 3 ސަރަޙައްދެއްގައި މިއަދުވަނީ ރައީސް ޔާމީންގެ އުފަންދުވަސް ފާހަގަ ކުރެއްވުމަށް ހަރަކާތްތައް ބާއްވާފައެވެ. އެގޮތުން މިއަދު ހަވީރު 4:00 އިން 6:00 އަށް އެހަރަކާތްތައް ހިންގިއެވެ.