ރޯދަަމަހުގެ ރަސްމީގަޑިއަކީ 10:00 އިން 2:00 އަށް ކަމަށް ކަނޑައަޅައިފި

މިއަހަރުގެ ރޯދަމަހުގެ ރަސްމީގަޑިއަކީވެސް ހެނދުނު 10:00 އިން މެންދުރުފަހު 2:00 ކަމަށް ރައީސް އޮފީހުން ހަމަޖައްސައިފިއެވެ.

މީގެ އިތުރަށް ޝައްވާލުމަހުގެ ފުރަތަމަ 7 ދުވަހު ސަރުކާރުގެ އޮފީސްތަކުގެ ރަސްމީ ގަޑިއަކީވެސް ހެނދުނު 10:00 އިން މެންދުރުފަހު 2:00 އަށް ކަމަށް ވަނީ ހަމަޖައްސަވާފައެވެ.

"މިގޮތަށް މިއަހަރުގެ ރަމަޟާންމަހުގެ ރަސްމީގަޑި ހަމަޖެއްސެވުމާ ގުޅިގެން، ރަސްމީގަޑިއަށް ފައްތަވައިގެން މަސައްކަތްތައް ރޭއްވެވުމަށް ޚާއްޞަ ސަމާލުކަމެއް ދެއްވުމަށް ދަންނަވަން ރައީސުލްޖުމްހޫރިއްޔާ ވިދާޅުވި" ކަމަށް ރައީސް އޮފީހުގެ މިނިސްޓަރ ޢަބްދުﷲ އަމީން ސޮއިކުރައްވައި ނެރެފައިވާ ދެންނެވުމެއްގައިވެއެވެ.

ކަލަންޑަރުގައި ބުނެފައިވާ ގޮތުން މިއަހަރުގެ ރޯދަމަހުގެ ފުރަތަމަ ދުވަހަކީ ޖޫންމަހުގެ 18 ވަނަ ދުވަހެވެ.