ހަރުގޭގެ ބޭނުން ހިފާނީ ޔާމީންގެ އަނިޔާވެރިކަމުގައި ސިއްކަ ޖެހުމަށް-ޝިފާޒު
18 މޭ 2015 22:29
އެމްޑީޕީން މިރޭ ހުޅުވި "އަނިޔާވެރިކަން ނިންމަން ހަރުގެ" ގެ ބޭނުން ހިފާނީ ރައީސް ޔާމީންގެ އަނިޔާވެރިކަމުގައި ސިއްކަ ޖެހުމަށް ކަމަށް އެމްޑީޕީގެ ނާއިބު ރައީސް މުޙައްމަދު ޝިފާޒު ވިދާޅުވެއްޖެއެވެ.
އާޓިފިޝަލް ބީޗް ކުރިމަތީގައި ހުޅުވި ޖަގަހައިގައި ވާހަކަ ދައްކަވަމުން ޝިފާޒު ވިދާޅުވީ "ރައީސް ޔާމީންގެ އަނިޔާވެރިކަމުގައި ސިއްކަ ޖެހުމަށް މިހަރުގޭގެ ބޭނުން ހިފާނެކަން ރައީސް ޔާމީން ހަނދާން ކުރަންވާނެ. މި މަސައްކަތް ހުއްޓާލާނީ މި އަނިޔާވެރި ވެރިކަން ޚަތިމް ކޮށްފައި،" ކަމަށެވެ.
ޝިފާޒު ވިދާޅުވީ ސަރުކާރުން މަޝްވަރާއަށް ގޮވާލިޔަސް ރައީސް ނަޝީދު މިނިވަން ނުކުރާހާ ހިނދަކު "އަނިޔާވެރިކަން ނިންމަން" ކުރަމުންދާ މަސައްކަތް ހުއްޓާ ނުލާނެ ކަމަށެވެ.
ރައީސް ނަޝީދުގެ އިތުރަށް، އެމްޑީޕީގެ ޗެއާޕާސަން ޢަލީ ވަޙީދާއި، ޢަދާލަތުގެ ޕާޓީގެ ރައީސް އައްޝައިޚް އިމްރާން ޢަބްދުﷲ އާއި، ޖޭޕީގެ ކައުންސިލް މެންބަރ ސަބާހު ރަޝީދާއި، ކާނަލް ނާޒިމްގެ މައްސަލައާ ގުޅިގެން ވާހަކަ ނުދައްކާ ނުވަތަ އަޑު ނުއުފުލާނެ އެއްވެސް އެއްވުމެއް އަދި ފޯރަމެއްވެސް ނޯންނާނެ ކަމަށެވެ. އެބޭފުޅުން މިނިވަން ކުރަންދެން އެމަސައްކަތް ކުރެއްވުމުގައި ދެމިތިބޭނެ ކަމަށްވެސް ވިދާޅުވިއެވެ.ޖޭޕީގެ ލީޑަރ ޤާސިމް އިބްރާހީމަކީ އިޖުތިމާޢީ ރޮނގުންނާއި އެހެނިހެން ގޮތްގޮތުން ޚިދުމަތް ކުރައްވަމުން ގެންދަވާ ބޭފުޅަކަށްވުމުން ޤާސިމަށް ސަރުކާރުން ކުރަމުންދާ އަނިޔާއާއި ތުރާތައް ހުއްޓާލަންދެން އެވާހަކަވެސް ދައްކަވާނެ ކަމަށް ޝިފާޒު ވިދާޅުވިއެވެ.
ޝިފާޒު ވިދާޅުވީ ރައީސް ނަޝީދުގެ ވެރިކަން ބަދަލްވުމަށްފަހު ބައިނަލްއަގުވާމީ ފަރާތްތަކުގެ ބައިވެރިވުމާއެކު ނެރެފައިވާ ކޯނީގެ ރިޕޯޓުގައި އެންމެ ބޮޑަށް ފާހަގަކޮށްފައިވާ އެއްކަމަކީ ނަޝީދު ވެރިކަމަށް ވަޑައިގެންނެވީ ކޯލިޝަނެއްގެ ތެރެއިން ކަމަށެވެ. ނަމަވެސް ވެރިކަން ވެއްޓުނުއިރު ކޯލިޝަން ރޫޅާލާފައިވާތީ ވެރިކަމުގައި ސައްހަ ކަމެއްނެތްކަން ފާހަގަ ކޮށްފައިވާ ކަމަށެވެ. އެހެން ކަމުން ރިޕޯޓަށް ބަރޯސާވާއިރު ރައީސް ޔާމީންގެ ސަރުކާރުގެ ސައްޙަކަމެއްވެސް މިހާރު ނޯންނާނެ ކަމަށް ވިދާޅުވިއެވެ.
ބައިނަލް އަގުވާމީ ފަރާތްތަކުން މިހާރުވެސް ރާއްޖޭގެ ކަންކަން ވަރަށް ގާތުން ބަލަމުންދާ ކަމަށާއި ޚާއްސަކޮށް އީޔޫއިން އެކަން ވަރަށް ރަނގަޅަށް ބަލަމުންދާ ކަމަށެވެ. އެފަރާތްތަކުންވަނީ ރާއްޖޭގެ ކަންކަން ހިނގަމުންދާ ގޮތުން ވަރަށް ކަންބޮޑުވެފައި ކަމަށްވެސް ވިދާޅުވިއެވެ. އަންނަ މަސްތެރޭގައި ރާއްޖެއާމެދު ފިޔަވަޅު އަޅައިފާނެ ކަަމަށްވެސް ޝިފާޒު ވިދާޅުވިއެވެ.
އިދިކޮޅު ފަރާތްތަކުން ކުރިންވެސް ސަރުކާރަށް މަޝްވަރާއަށް ދަޢުވަތު ދެއްވުމުން ރައީސް ޔާމީން ވަނީ އެކަމަށް ފުރުސަތު ނުދެއްވާފައި ކަމަށްވެސް ވިދާޅުވިއެވެ. އެހެން ކަމުން ސަރުކާރުން އަމިއްލައަށް މަޝްވަރާކުރަން ހުށަހެޅުމަކީ ބައިނަލް އަގުވާމީ ޕްރެޝަރ ހުރި މިންވަރު ވަރަށް ބޮޑަށް ހާމަވާ ކަމެއް ކަމަށް ވިދާޅުވިއެވެ.
އޭނާ ވިދާޅުވީ ކިތަންމެ އަނިޔާއެއް ކުރިމަތިކުރުވިޔަސް "ރައީސް ޔާމީނުގެ އަނިޔާވެރި ކަމަށް ބޯލަނބައި ފަހަތަށް ނުޖެހޭނަން. ބޭނުން ކަމެއްވަންދެން އެކަމަކާގެން ކުރިއަށް ދާނަން،" ކަމަށެވެ.
އޭނާ ވިދާޅުވީ ރައީސް ޔާމީން ގެންދަވަނީ އެއްވެ އުޅުމުގެ މިނިވަންކަމާއި ޚިޔާލުފާޅު ކުރުމުގެ މިނިވަންކަން ނައްތާލަން މަސައްކަތް ކުރަމުންނެވެ. އެހެން ނަމަވެސް "މި ހަރުގެއަށް އެއްވާނަން. ޚިޔާލުފާޅު ކުރާނަން. އެކަން ނުކުރެވޭނެ ގޮތެއް ރައީސް ޔާމީނަކަށް ނުހެދޭނެ. އަޑު އުފުލަންފެށީމާ އަޅުގަނޑުމެންގެ ލީޑަރުންނަށްވެސް ވީގޮތް އެނގޭ،" ޝިފާޒު ވިދާޅުވިއެވެ.
އޭނާ ވިދާޅުވީ ވަރަށް އަވަހަށް ބޮޑު އެއްވުމެއް މާލޭގައި ބާއްވާނެ ކަމަށާއި، އެ އެއްވުންވާނީ ފެބުރުއަރީ 27 އާއި މޭޑޭގެ އެއްވުމަށްވުރެވެސް ބޮޑު އެއްވުމަކަށް ކަަމަށެވެ. އެ އެއްވުމަށް ވީހާވެސް ގިނަބަޔަކު ޖޫންމަހު ފުރަތަމަ ހަފްތާގައި މާލެއައުމަށް ޝިފާޒު އެދިވަޑައިގެންނެވިއެވެ.
މިރޭގެ ހަރުގެ ހުޅުވައިދިނީ މޭޑޭގެ މުޒާހަރާއިން ހައްޔަރުކުރި މީހުންގެ ތެރެއިން މިހާރު ދޫކޮށްފައިވާ 30 މީހެކެވެ.
ކިޔުންތެރިންގެ ހިޔާލު