ސަރުކާރުން އުންމީދު ކުރަނީ ރަނގަޅު ނަތީޖާއަކަށް-ތަރުޖަމާނު

އިދިކޮޅު ސިޔާސީ ޕާޓީތަކާއެކު ބާއްވާ ރަސްމީ މަޝްވަރާއިން ރަނގަޅު ނަތީޖާއަކަށް އުންމީދު ކުރައްވާ ކަމަށް ރައީސް އޮފީހުގެ ތަރުޖަމާނު އިބްރާހީމް މުޢާޒު ޢަލީ ވިދާޅުވެއްޖެއެވެ.

"އުންމީދު ކުރަނީ ރަނގަޅުވާނެ ކަމަށް. މަޝްވަރާތައް އަދި ނުއެއް ފެށޭ. ފަށައިގެން އިދިކޮޅު ޕާޓީތަކުގެ ރެސްޕޮންސަށް ބަލާފަ ސީދާ އެއްޗެއް ބުނަން އެނގޭނީ،" މުޢާޒު ވިދާޅުވިއެވެ.އިދިކޮޅު ފަރާތްތަކާއެކު މަޝްވަރާ ކުރުމުގެ ރަސްމީ ދަޢުވަތު ސަރުކާރުން މިއަދު ވަނީ ދީފައެވެ. އެހެން ނަމަވެސް މަޝްވަރާތައް ފަށާނެ ތާރީޚެއް އަދި ކަނޑައެޅިފައެއް ނުވެއެވެ.

މިމަޝްވަރާތަކުގައި ބައިވެރިވާނެ ކަމަށް ސަރުކާރަށް މިހާރު ރަސްމީކޮށް އަންގާފައިވާ ޖުމްހޫރީޕާޓީގެ ރަޖިސްޓްރަރ އަޙުމަދު ސަޢުދުވެސް ވިދާޅުވެފައިވަނީ މަޝްވަރާއިން ރަނގަޅު ނަތީޖާއެއް ފެންނާނެ ކަމަށް ޔަޤީން ކުރައްވާ ކަމަށެވެ. އަދި މަޝްވަރާ ކުރުމަށް ސަރުކާރުން ހުށަހަޅާފައިވަނީ އެޕާޓީންވެސް ބޭނުންވި ކަންކަން ކަމަށާއި އެކަމަށްޓަކައި ސަރުކާރަށް މަރުޙަބާ ކިޔާ ކަމަށެވެ.

މަޝްވަރާ ކުރުމަށް ސަރުކާރުން ކަނޑައަޅާފައިވާ ދާއިރާތަކުގެ ތެރޭގައި ހިމެނެނީ ސިޔާސީ ގޮތުން މިހާރު އުފެދިފައިވާ ނުތަވަސްކަމާއި، ޚިޔާލު ތަފާތުވުންތަކަށް ޤާނޫނީ ނިޒާމްގެ ތެރެއިން ޙައްލުތަކެއް ހޯދުމާއި، ރައްޔިތުންގެ އެއްބައިވަންތަކަމާ ގުޅޭގޮތުން އެކުގައި މަސައްކަތް ކުރުމެވެ. އޭގެ އިތުރަށް ރާއްޖޭގެ ޑިމޮކްރެޓިކް ނިޒާމް މިހާރަށްުރެ ހަރުދަނާކޮށް، ބައިނަލްއަޤުވާމީ މިންގަނޑުތަކާ އެއްގޮތްވާ ގޮތުގެ މަތިން ހިންގުމަށް ރާއްޖޭގެ ޤާނޫނީ ނިޒާމާއި ޤާނޫނީ އަދި ޝަރުޢީ ނިޒާމް ހަރުދަނާކުރަން އަޅަންޖެހޭ ފިޔަވަޅު އެޅުމަށް ގުޅިގެން މަސައްކަތް ކުރުންވެސް ހިމެނެއެވެ.

މަޝްވަރާތަކުގައި ސަރުކާރުގެ ފަރާތުން އެމްޑީޕީއާ އެކު މަޝްވަރާކުރަން ކަނޑައަޅާފައިވަނީ ހޯމްމިނިސްޓަރ ޢުމަރު ނަސީރާއި، ފިޝަރީޒް މިނިސްޓަރ ޑރ. މުޙައްމަދު ޝައިނީއާއި، ރައީސް އޮފީހުގެ މިނިސްޓަރ ޢަބްދުﷲ އަމީނެވެ.

ޖުމްހޫރީ ޕާޓީ އާއި ޢަދާލަތު ޕާޓީއާ އެކު ސަރުކާރުން މަޝްވަރާ ކުރާނެ ޓީމުގައި ހިމެނެނީ ޓޫރިޒަމް މިނިސްޓަރ އަޙުމަދު އަދީބާއި ރައީސް އޮފީހުގެ މިނިސްޓަރ މުޙއްމަދު ޙުސައިން ޝަރީފާއި އެންވަޔަރަންމަންޓް މިނިސްޓަރ ތާރިޤު އިބްރާހީމާއި، ހައުސިން މިނިސްޓަރ ޑރ. މުޙައްމަދު މުޢިއްޒެވެ.

އެއްވެސް ޝަރުތެއް ކުރިމަތި ނުކޮށް މިމަޝްވަރާގައި ބައިވެރިވާނެ ކަމަށް މިހާތަނަށް އަންގާފައިވަނީ ޖުމްހޫރީޕާޓީންނެވެ. އެޕާޓީން މިމަޝްވަރާގައި ބައިވެރިވާނީ ޑެޕިޔުޓީ ލީޑަރ އަމީން އިބްރާހީމާއި، ޑެޕިޔުޓީ ލީޑަރ، ދަނގެތީ ދާއިރާގެ މެމްބަރ އިލްހާމް އަޙުމަދާއި، އެޕާޓީގެ ޕާލިމެންޓްރީ ގްރޫޕްގެ ޑެޕިޔުޓީ ލީޑަރ އަދި ކިނބިދޫ ދާއިރާގެ މެމްބަރ ޢަބްދުﷲ ރިޔާޒާއި، ރައްޔިތުންގެ މަޖިލީހުގެ މަތިވެރި ދާއިރާގެ މެމްބަރ ޙުސައިން މުޙައްމަދެވެ.