ފަރުބަދައަކަށް ވުމުގެ ކުރިން އަނިޔާވެރި ވެރިކަން މުލުން ލުހެލަން ޖެހޭ-އަޙުމަދު ޢީސާ

ރައީސް ޔާމީންގެ އަނިޔާވެރިކަން "ފަރުބަދައަކަށް ވުމުގެ ކުރިން" އަނިޔާވެރި ވެރިކަން މުލުން ލުހެލަން ޖެހޭ ކަމަށް ރައްޔިތުންގެ މަޖިލީހުގެ ކެނދިކުޅުދޫ ދާއިރާގެ ކުރީގެ މެންބަރ އަދި އެދާއިރާގެ އެމްޑީޕީގެ މިހާރުގެ ރައީސް އަޙުމަދު ޢީސާ ވިދާޅުވެއްޖެއެވެ.

ފުލުހުންކުރި އަނިޔާއަށް ފަރުވާ ހޯދުމަށް އޭޑީކޭ ހޮސްޕިޓަލުގައި އޮންނަވައިގެން ރާއްޖެޓީވީއަށް އިއްޔެ ދެއްވި އިންޓަރވިއެއްގައި އަޙުމަދު ޢީސާ ވިދާޅުވީ މޭޑޭގެ ޙަރަކާތުގައި ފުލުހުންވަނީ އޭނާ ހައްޔަރު ކުރުމަށްފަހު ފުލުހުންގެ ވެހިކަލަކަށް އަރުވައި ވަރަށް ބޮޑަށް އަނިޔާ ކޮށްފައި ކަމަށެވެ. އެ އަނިޔާވަނީ ހަށިގަނޑުގެ އެކިތަންތަނަށް ކޮށްފައި ކަމަށްވެސް ވިދާޅުވިއެވެ.

އޭނާ ހައްޔަރު ކޮށްފައިވަނީ އަސްރަފީ ބުކްޝޮޕް ކައިރިން ކަމަށާއި، ހައްޔަރުކޮށްގެން ގެންގޮސް ފުލުހުންގެ ލޮރީއަކަށް އެރުވުމަށްފަހު ސާޅީހަކަށް މިނެޓު ވަންދެން ފުލުހުން އަނިޔާކުރި ކަމަށެވެ. އޭނާގެ ބޮލާއި، ބުރިކައްޓާއި، އަދިވެސް އެެހެން ތަންތަނުގައި ފުލުހުން ތެޅި ކަމަށް ވިދާޅުވިއެވެ. އަދި ބޭރަށް ނޭނގޭ ގޮތަށް ތެޅުމަށްވެސް ބައެއް ފުލުހުން އިރުޝާދު ދިން ކަމަށް ވިދާޅުވިއެވެ.

ތަޅަމުންދިޔައިރު، މީހެއްގެ ގައިގައި ތަޅާކަމަށްވާނަމަ ޢީސަގެ ގައިގައި ތެޅުމަށް ފުލުހަކު އެހެން ފުލުހުންގާތު ބުނިކަމަށްވެސް ޢީސަ ވިދާޅުވިއެވެ. އަނިޔާ ކުރުމަށްފަހު ދޫނިދުއަށް ގެންދަން ލޯންޗަށް އެރުވުމަށްފަހު އަނިޔާ ނުކުރާ ކަމަށްވެސް ވިދާޅުވިއެވެ. އަދި ގޮޅީގައިވެސް އަނިޔާ ނުކުރާ ކަމަށް ވިދާޅުވިއެވެ.

އޭނާ ވިދާޅުވީ ގޮޅީގައި އޮތްއިރު ހޭވެސް ނެތުނު ކަމަށާއި ހިނގާ ބިނގާ އުޅުމަށްވެސް ދަތިވި ކަމަށެވެ. އަދި އޭނާ ގިނިކަންޏާ އޮންނެވި ގޮޅިއަށް ހޮޑުލެވުނު ކަމަށްވެސް ވިދާޅުވިއެވެ.

ފުލުހުން ތެޅުމުގެ ސަބަބުން ކަރާ ދިމާއިން މައިބަދައަށާއި، އުނަގަނޑާ ދިމާއިން ވެސް މައިބަދައަށް އަނިޔާ ވެފައިވާ ކަމަށް ޑޮކްޓަރުން ބުނެފައިވާ ކަމަށް ޢީސަ ވިދާޅުވިއެވެ. ޑޮކްޓަރުން ވިދާޅުވެފައިވާ ކަމަށެވެ. އަނިޔާގެ ސަބަބުން އަތް އައްސިވުމާއި ބޮލަށް އެނބުރުންއެރުން އަދިވެސް ރަނގަޅު ނުވާކަމަށް ވިދާޅުވިއެވެ. އެއަނިޔާގެ ސަބަބުން އޮޕްރޭޝަނެއް ކުރަންޖެހޭ ކަމަށްވެސް ޑޮކްޓަރުން ލަފާދީފައިވާ ކަމަށް ވިދާޅުވިއެވެ. އެކަމަށް މިއަދު ލަންކާއަށް ފުރާނެ ކަމަށްވެސް ވިދާޅުވިއެވެ.

ޢީސަ ހައްޔަރުކޮށް ފުލުހުންގެ ޝިކާރައަކަށްވުމުގެ ކުރިން އޭނާވަނީ މޭޑޭގައި އާންމުންގެ ބަޔަކު އަނިޔާކުރި ފުލުހަކު ސަލާމަތްކޮށްގެން ގޮސް ފުލުހުންނާ ޙަވާލު ކޮށްފައެވެ.

ޢީސަ ވިދާޅުވީ މިސަރުކާރުން ގެންދަނީ އެއްވެސް ހައްދެއްނެތި ރައްޔިތުންނަށް އަނިޔާކުރަމުން ކަމަށްވެސް އެހެން ކަމުން އެއަނިޔާވެރިކަން ފަރުބަދައެއްހާ ބޮޑުނުވަނީސް ޔާމީންގެ ވެރިކަން މުލުން ލުހެލަންޖެހޭ ކަމަށެވެ. ކިތަންމެ ވަރަކަށް އަނިޔާކުރިޔަސް މޭޑޭގައި ހައްޔަރުކުރި އެންމެވެސް އެނބުރި މުޒާހަރާއަށް ނުކުންނާނެ ކަމަށާއި، އެންމެފަހު ވަގުތާޖެހެންދެން އޭނާވެސް އަނިޔާވެރިކަމާ ދެކޮޅަށް މަސައްކަތް ކުރައްވާނެ ކަމަށް ވިދާޅުވިއެވެ.

ޢީސައަށް އަނިޔާކޮށް އިންސާނީ ކަރާމާތަށް އަރައިގެންފައިވާ ކަމަށްވާނަމައެކަން ބަލައި އެކަމުގައި ޝާމިލްވާ ފުލުހުންނާމެދު ފިޔަވަޅު އަޅުއްވާނެ ކަމަށް ސީޕީ ޙުސައިން ވަޙީދު ވިދާޅުވެފައިވާ ކަަމަށް މީޑިއާގައި ބުނެފައިވެއެވެ.