އަޅުގަނޑުމެން މިދަނީ މޭޑޭގެ ޙަރަކާތާ ގުޅިގެން ހައްޔަރު ކުރަންޖެހޭ މީހުން ހައްޔަރު ކުރުމުގެ އަމުރު ހޯދަމުން-ޕޮލިސް
14 މޭ 2015 6:09
މޭޑޭގެ ބައިވެރިން ދުޢާއަށް އަތްތައް އުފުލައިގެން: ފޮޓޯ-މުންޗި
ޢަދާލަތު ޕާޓީ އިސްވެއޮވެގެން މެއިމަހު ފުރަތަމަ ދުވަހު ބޭއްވި އެއްވުމުގައި ހިނގައިދިޔަ ކަންކަމާ ގުޅިގެން ނުވަތަ އެ އެއްވުމާ ގުޅިގެން ހޯދަން ބޭނުންވާ މީހުން ހައްޔަރު ކުރުމުގެ އަމުރު ކޯޓުން ހޯދަމުންދާ ކަމަށް ފުލުހުން ބުނެފިއެވެ.
ފުލުހުންގެ މީޑިއާއިން ބުނީ ބައެއް މީހުން ހައްޔަރު ކުރުމުގެ އަމުރު މިހާރު ލިބިފައިވާ ކަމަށެވެ.
މ.މާފަންނު ވިލާ ޤާސިމް އިބްރާހީމް ހައްޔަރު ކުރުމުގެ އަމުރެއް ފުލުހުން ހޯދާފަައިވޭތޯ ދެންނެވުމުން ފުލުހުންގެ މީޑިއާއިން އެކަމެއް ޔަގީން ނުކޮށްދިނެވެ. "ވަކި މީހަކު ފާހަގަކޮށްގެންނޫން އަމުރު ހޯދަނީ. އެދުވަހުގެ ޙަރަކާތާ ގުޅިގެން ހައްޔަރު ކުރަން ބޭނުންވާ އެންމެން ހައްޔަރު ކުރުމަށް އަމުރު ހޯދަމުން މިދަނީ،" މީޑިއާއިން ވާހަކަ ދެއްކި ބޭފުޅާ ވިދާޅުވިއެވެ.
މިހާތަނަށް ކިތައް މީހުން ހައްޔަރު ކުރުމުގެ އަމުރު ހޯދާފައިވޭތޯ ދެންނެވުމުން އެ ޢަދަދުވެސް ފުލުހުން ހާމާއެއް ނުކުރިއެވެ.
ފުލުހުން ހައްޔަރުކުރަން ބޭނުންވާ ލިސްޓުގައި ޤާސިމް އިބްރާހީމްވެސް ހިމޭނެ ކަމަށް މީޑިއާގައި ވަނީ ހާމަކޮށްފައެވެ.
ޤާސިމް ހައްޔަރު ކުރަން ބޭނުންވާ ސަބަބެއް ކަމަށްވަނީ މޭޑޭގެ ޙަރަކާތަށް ޚަރަދުކުރި ކަމުގެ ތުހުމަތުގައި ކަމަށް މަޢުލޫމާތު ލިބިފައިވެއެވެ. އެ ޙަރަކާތަށް ޚަރަދު ކުރީ ޤާސިމް ކަމަށް ޕީޕީއެމްގެ ނާއިބު ލީޑަރ އަޙުމަދު އަދީބު ވަނީ ތުހުމަތު ކުރައްވާފައެވެ.
ކިޔުންތެރިންގެ ހިޔާލު